Masustansyang Pagkain Para sa Puso: Anu-ano ang Dapat Mong Kainin?

Iba’t iba ang mga dahilan kung bakit madalas natin marinig ang payong kumain ng mga masusustansyang pagkain. Isa na dito ang pagnanais na magkaroon ng magandang pangangatawan. Maaari rin naman ito ay dahil sa kagustuhang umiwas sa anumang uri ng sakit. Ngunit, alam mo ba na mayroong mga masustansyang pagkain para sa puso? Halina’t alamin natin kung ano-ano ang mga ito.

Isa ang sakit sa puso sa mga pinakanakamamatay na kondisyon na mundo. May ilang mga partikular na pagkain na kilalang nagpapataas ng panganib sa sakit sa puso. Sa katunayan, ang ilang mga pagkain ay maaaring makaimpluwensya sa mga sumusunod:

• Timbang
• Blood pressure
• Antas ng kolesterol 
• Panganib ng diabetes

Ang mga ito ay maaaring maugnay sa panganib para sa sakit sa puso. Kung kaya, malaki ang gampanin ng diyeta sa pangkalahatang kalusugan. Makatutulong kung alam mo kung ano mga masustansyang pagkain para sa puso at kung aling mga pagkain ang dapat limitahan tungo sa heart-healthy diet.

Anu-ano ang mga Masustansyang Pagkain Para sa Puso?

Narito ang ilan sa mga masustansyang pagkain para sa puso na maaari mong ipasok sa iyong diyeta:

Mga berdeng gulay 

Ang mga gulay na kabilang sa kategoryang green leafy vegetables tulad ng spinach, kale, Swiss chard, at maging ang pechay ay mainam para sa iyo dahil sagana ito sa mga nutrisyon. Naglalaman ang mga ito ng vitamin K na may taglay na proteksyon para sa mga arteries. Dagdag pa rito, nakatutulong din ang mga naturang gulay para sa wastong pamumuo ng dugo. 

Ayon sa isang pagsusuri, ang pagdagdag ng green leafy vegetables sa diyeta ay nakatulong sa pagbaba ng kaso ng sakit sa puso na hanggang 16%. 

Sa kabilang banda, ang iba pang berdeng gulay tulad ng broccoli at asparagus ay may kaakibat din na sustansya. Ang ilan dito ay ang mga sumusunod:

• Vitamin C
• Vitamin E
• Potassium
• Folate
• Calcium
• Fiber

Mga prutas

Kung mayroong mga gulay na kabilang sa masustansyang pagkain para sa puso, mayroon din namang mga prutas na pwede ihanda. 

Ang oranges, cantaloupes, papaya, at avocadoes ay mayaman sa mga sumusunod na nutrisyon na mainam para sa kalusugan ng puso:

• Beta-carotene
• Potassium
• Magnesium
• Fiber

Bukod sa mga nasabing prutas, kilala rin ang mga berries, tulad ng strawberries, blueberries, rasberries, at blackberries, na mayaman sa antioxidanys. Isa sa mga naturang antioxidants ay ang anthocyanins na responsable sa iyong puso. Pinoprotektahan nito ang puso mula sa oxidative stress at pamamaga na maaaring makaambag sa pagunlad ng sakit sa puso. 

Mga mani

Ang mga masustansyang mani tulad almonds at walnuts ay nakatutulong hindi lang para maibsan ang iyong gutom, pati na rin sa iyong puso. 

May taglay na heart-healthy monounsaturated fats at fiber ang almonds na nakatutulong bilang proteksyon laban sa sakit sa puso. Samantala, kapansin-pansin naman din sa ilang pag-aaral ang epekto ng regular na pagkain ng walnuts sa sakit sa puso.

Mga isda

Ginagampanan ng mga fatty fish, na kung tawagin, ang responsibilidad na protektahan ang puso mula sa panganib ng anumang cardiovascular disease. Napagalaman din sa isang pananaliksik na ang pagkain ng isda ay nakakapagpababa rin ng panganib sa depression, maging sa buhay.

Ilan sa mga isda na mayaman sa omega 3 ay ang mga sumusunod:

• Salmon
• Tuna
• Mackerel
• Herring
• Trout

Dark chocolate

Sa iba’t ibang uri ng tsokolate, ang dark chocolate raw ang pinakamasustansya sa lahat tulad ng ibang nabanggit na masustansyang pagkain para sa puso, ito ay naglalaman ng mga antioxidants. 

Ayon sa isang pag-aaral, ang katamtamang pagkonsumo ng tsokolateng ito (mas mababa sa 6 na servings sa isang linggo) ay maaaring makapagbawas ng iyong panganib sa coronary heart disease, stroke, at diabetes. 

Mga Tips kung Paano Maiwasan ang Iba’t ibang Sakit sa Puso

Dahil nauunawaan namin na hindi basta-basta ang pagdagdag ng ilan sa mga nabanggit na masustansyang pagkain para sa puso, mayroong kaming inihandang mga madadaling tips na maaari mong sundan sa iyong proseso tungo sa iyong heart-healthy diet. 

• Kontrolin ang pagkain sa pamamagitan ng pagsasaalang-alang ng portion size ng bawat klase ng pagkain sa iyong plato. Maaari mong gawing mas malaki ang bahagi ng mga prutas at gulay. 
• Paglimita sa mga pagkain na mayroong mga unhealthy fats (saturated at trans fats) tulad ng mga cookie, keyk at chichirya. Mangyari ring limitahhan ang mga pagkaing mataas ang sodium content. 
• Ugaliin ang pagplano ng mga kakainin sa pangaraw-araw habang isinasaalang-alang ang mga nabanggit na masustansyang pagkain para sa puso. 
• Hayaan ang sarili na kumain ng “treat” paminsan-minsan. Hindi naman masamang bigyan ang sarili ng keyk o chichirya, ngunit huwag hayaan itong maging dahilan upang sukuan ang plano tungo sa masustansyang pagkain.

Mahalagang Mensahe 

Maraming benepisyo ang dulot ng pagkain ng mga masustansyang pagkain, Isa na rito ang pagprotekta sa sarili sa anumang uri ng sakit sa puso. Kung kaya, ugaliing kumain nang tama at wasto hindi lang para matamo ang nais mong katawan, higit pa para sa iyong pangkalahatang kalusugan. 

Alamin ang iba pa tungkol sa Tips sa Masustansiyang Pagkain dito. 

[embed-health-tool-bmr]