Kinikilala ang sex bilang isang pisikal na gawain. Ayon pa sa mga ulat, maaari din itong ituring na isang moderate exercise. Ngunit may kakayahan ba ang sex na mapabuti ang kalusugan ng ating mga puso? Totoo ba ang mga sinasabing benepisyo ng sex sa puso?
Benepisyo Ng Sex Sa Puso: Isang Uri Ng Pag-Eehersisyo?
Nilinaw na natin na ang sex ay isang uri ng ehersisyo, ngunit upang maunawaan ang koneksyon sa pagitan ng sex at ng heart health, kailangan nating sagutin ang tanong na ito: Gaano karaming physical activity ang nakukuha natin sa sex?
Ang sex bilang isang pisikal na gawain ay hindi awtomatikong nangangahulugang mabuti ito sa puso. Kung tutuusin, kailangan mong ikonsidera ang maraming salik gaya ng intensity, frequency (dalas), at duration (haba) ng workout.
Iniulat ng John Hopkins Medicine ang tatlong uri ng ehersisyo na nagdudulot ng benepisyo ng sex sa puso. Ito ang aerobic exercises, resistance training, at ehersisyong nakatuon sa stretching, flexibility, at balance.
Ang Sex Ay Isang Aerobic Exercise
Tila lumalabas na ang sex ay gaya rin ng iba pang porma ng aerobic exercise.
Sinabi pa ng Harvard University na tulad ng aerobic exercises, pinatataas ng sex ang blood pressure, heart rate, at syempre, pinatataas din nito ang pangangailangan ng puso sa oxygen.
Upang malaman ang level of activity na nakukuha natin sa sex, may ilang mga mananaliksik ang nagsagawa ng pag-aaral upang makita kung gaano pinatataas ng sex ang blood pressure at heart rate ng mga tao.
Sa pag-aaral, sinubaybayan ng mga mananaliksik ang mga kalahok (participants) habang sila ay gumagamit ng treadmill. Pagkatapos, sinubaybayan din sila habang nakikipagtalik (penetrative sex na may male orgasm).
Tiningnan nila ang heart rate at blood pressure ng mga kalahok. Matapos nito, tinanong nila ang mga kalahok hinggil sa level ng exertion na kanilang naranasan.
Lumabas sa resulta ng pag-aaral na tumaas ang blood pressure at heart rate ng mga lalaki habang nakikipagtalik. Gayunpaman, hindi ito kasintaas ng naabot habang sila ay naglalakad sa treadmill.
Dagdag pa, nang kinapanayam ng mga mananaliksik ang mga kalahok hinggil sa kanilang level of exertion, sinabi ng mga kalahok na mas nakapapagod ang treadmill kaysa sa pakikipagtalik. Sa bilang na 1-5 (5 bilang pinakamataas), sinabi ng mga kalahok na ang paglalakad sa treadmill ay nasa 4.6 habang 2.7 lang sa pakikipagtalik.
Hindi Sapat Ang Sex
Batay sa pag-aaral na nabanggit sa itaas tungkol sa benepisyo ng sex sa puso, mas nakapapagod ang paglalakad sa treadmill kaysa sa sex. Gayunpaman, pinataas pa rin nito ang heart rate at blood pressure ng mga kalahok. Maaaring kulang ito sa intensity, ngunit gaya ng maaaring sabihin ng iba, nagawa pa rin nito ang kanyang trabaho.
Ngunit lumalabas na hindi lang pala intensity ang kulang sa sex. Kulang din ito sa frequency at duration.
Isipin mo ito, ayon sa mga eksperto, kailangan mo ng hindi bababa sa 150 minutong moderate activity sa loob ng isang linggo upang makuha ang buong benepisyo ng aerobic workouts. Ibig sabihin, kailangan mo ng hindi bababa sa 30 minutong pag-eehersisyo araw-araw sa loob ng limang araw kada isang linggo.
Ang average na sexual encounter ay tumatagal lamang ng 5 hanggang 15 minuto. At syempre, hindi lahat ng couple ay nagtatalik araw-araw.
Dahil sa lahat ng “disadvantages” na ito ng sex bilang isang anyo ng ehersisyo, ibig bang sabihin na hindi na ito maganda sa puso? Mayroon ba talagang koneksyon ang sex at heart health?
Nakatutulong Ba Ang Sex Upang Maiwasan Ang Mga Sakit Sa Puso?
Hindi man mapapalitan ng sex ang tipikal na aerobic exercise, hindi naman ito nangangahulugang walang benepisyo ng sex sa puso.
Sa katunayan, natuklasan ng mga mananaliksik na ang mga lalaking nakikipagtalik lamang ng isang beses sa isang buwan ay mas malapit sa panganib ng pagkakaroon ng mga sakit sa puso kumpara sa mga lalaking dalawang beses makipagtalik sa isang linggo.
Bukod pa dyan, ang mga babaeng nagsasabing masaya sila sa kanilang sex lives ay mas mababa ang tsansang magkaroon ng atake sa puso.
Habang wala pang mga pag-aaral na tumutukoy sa eksaktong paliwanag kung papaano nangyayari ang benepisyo ng sex sa puso, naniniwala ang mga mananaliksik na dahil ito sa iba pang benepisyo ng sex.
Benepisyo Ng Sex Sa Puso At Kalusugan
Nakababawas Ng Stress
Binigyang diin ng mga doktor na ang long-term stress ay maaaring mauwi sa pagtaas ng blood cholesterol, blood glucose, at blood pressure. Lahat ng ito ay mga risk factor sa pagkakaroon ng cardiovascular illnesses. Dagdag pa, nakapagdudulot din ng ilang pagbabago sa katawan ang stress. At ito’y nagiging sanhi ng plaque build up sa mga ugat.
Ang magandang balita, nakababawas ng stress ang sex. Ito ay dahil nakapagpapalabas ng endorphins ang sex na isang kemikal na ginagamit ng katawan upang makayanan ang stress at sakit (pain). Naglalabas din ang sex ng iba pang hormones na nagpapaganda ng mood.
Nakapagpapatibay Ng Ugnayan
Nakapagdudulot ng intimacy ang sex sa mga mag-partner. Ayon sa mga doktor, mahalaga ang pagkakaroon ng matibay na ugnayan sa isa’t isa sapagkat napabubuti nito ang nararanasang anxiety, depression at pakiramdam na nag-iisa. Ang mga nararamdamang ito ay naiiugnay sa mataas na panganib ng cardiovascular disease gaya ng atake sa puso at stroke.
Nakapagpapaganda Ng Tulog
Iba’t ibang mga ulat at pag-aaral ang nagsasabing nakapagpapataas ng panganib ng pagkakaroon ng mga sakit sa puso ang sleep deprivation.
Mabuti na lang at isa sa mga benepisyo ng sex ay nakapagpapaganda ng tulog. Nagbubunsod ang sex ng paglalabas ng relaxing hormones gaya ng oxytocin at prolactin. Ang mga hormones na ito ay parehong nakatutulong upang makatulog ka nang mas mabilis.
Dagdag pa, ang pagkakaroon ng kasiya-siyang pakikipagtalik bago matulog ay nakapagpapaganda ng kalidad ng pagtulog dahil sa endorphins.
