Para Saan Ang Tsaang Gubat?
Ang Tsaang Gubat, na may scientific name na Ehretia microphylla Lam, ay isang kilalang halaman na matatagpuan sa Pilipinas. Para saan ang Tsaang Gubat? Kilalang-kilala ito bilang halamang gamot at malawakang ginagamit kahit noong pang bago ito pormal na kilalanin ng Department of Health dahil sa napakaraming medicinal benefits.
Sa traditional medicine, ang Tsaang Gubat ay ginagamit bilang “tea” upang isulong ang pangkalahatang kalusugan. Dagdag pa, ginagamit din ito bilang disinfectant habang nanganganak at pangmumog upang makaiwas sa pagkasira ng mga ngipin.
Sa ngayon, nakarehistro ang Tsaang Gubat sa ilalim ng Bureau of Food and Drugs Administration bilang epektibong halamang gamot.
Paano Ito Gumagana?
Nakatuon ang mga benepisyo ng halamang gamot na Tsaang Gubat sa pagpapabuti ng digestive system. Narito ang mga potensyal na gamit nito:
1. Nakatutulong ang Tsaang Gubat sa pagpawi ng sakit ng tiyan
Madalas, ang pamumulikat ng stomach muscles ang sanhi ng pananakit ng tiyan. Ang pamumulikat (spasms) ay muscular contractions kung saan pinipiga ang iyong muscles kaya’t sobrang sumasakit. Ang Tsaang Gubat ay may antispasmodic properties, kaya kapag kumonsumo nito, maaaring hihinto ang pamumulikat at mababawasan nang husto ang sakit.
2. Nakatutulong upang gamutin ang gastroenteritis
Ang Gastroenteritis, kilala bilang “stomach flu” ay kadalasang nangyayari kapag nakakain ka ng kontaminadong pagkain. Inilalarawan ito bilang pamamaga ng tiyan (stomach) o ng mga bituka. Isa sa mga benepisyo ng halamang gamot na Tsaang Gubat ay ang anti-inflammatory property nito. Ang pag-inom ng Tsaang Gubat ay maaaring makatutulong upang mabawasan ang pamamaga at mawala ang mga sintomas ng Gastroenteritis.
3. Pinapawi ng Tsaang Gubat ang mga sakit, gaya ng pagtatae at disenteriya
Ang pagtatae at disenteriya (impeksyon sa bituka) ay kadalasang nakikita sa hindi maayos na gastrointestinal movement, spasms, o motility. May taglay na antispasmodic properties ang Tsaang Gubat na makatutulong upang mahinto ang irregular na gastrointestinal movement.
Mayroon ding antibacterial properties ang Tsaang Gubat dahil sa taglay nitong ethanol. Kung ang sanhi ng iyong pagtatae ay bacteria, makatutulong ang Tsaang Gubat sa paggamot ng microbial cause.
4. Pwedeng gamitin bilang pangmumog (mouthwash)
Isa sa mga pinakakinikilalang benepisyo ng halamang gamot na Tsaang Gubat ay ang taglay nitong fluoride. Sa isang pag-aaral, uminom ng isang basong Tsaang Gubat ang mga estudyante araw-araw sa loob ng mahigit isang taon at napag-alamang napigilan nito ang pagkabulok ng ngipin. Sa Pilipinas, talamak ang paggamit nito bilang pangmumog.
5. Maaari itong maging panlinis ng katawan at sugat
Ang antibacterial property ng Tsaang Gubat ang dahilan kung bakit maganda itong panlinis ng katawan at sugat. Hindi lang nito nililinis ang sugat, nakatutulong din ito sa pagpapagaling. Natuklasan pa nga ng isang pag-aaral na pinabibilis nito ang paggaling ng sugat.
6. Maaaring makatulong ang Tsaang Gubat sa laban sa allergy
Isa pa rin sa mga benepisyo ng Tsaang Gubat ang anti-allergy properties nito. Sa isang pag-aaral, pinaghambing ang epekto ng loratadine at Tsaang Gubat sa pagpapagaling ng allergic rhinitis. Dito napatunayang pareho silang epektibo.
Lumabas din sa resulta ng pag-aaral na puwedeng gawing pamalit ang Tsaang Gubat sa Loratadine, na isa nang matatag na commercial drug. Kung magpapalit ng gamot, mas mabuting kumonsulta sa iyong doktor.
Mga Pag-Iingat At Babala
Upang mapakinabangan nang ligtas at epektibo ang magandang mga benepisyo ng Tsaang Gubat, kailangan mong isaalang-alang ang mga sumusunod:
Bagaman bihirang mangyari, puwede kang magkaroon ng allergic reactions kapag nagpahid ka ng Tsaang Gubat sa iyong balat, gaya kapag ginamit mo ito bilang panlinis ng sugat.
Tulad ng kaso ng isa pang halamang gamot na Sambong, wala pang mga pag-aaral na magpapatunay na ligtas itong inumin ng mga buntis at nagpapasusong ina.
Gaano Kaligtas Ang Halamang Gamot Na Ito?
Sa pangkalahatan, ligtas naman ang Tsaang Gubat kung iinumin sa inirerekomendang doses nito. Pinakamainam na kumonsulta sa iyong doktor.
Mga Espesyal Na Pag-Iingat At Babala
Upang hindi magkaroon ng allergic reactions, subukang gawin ang quick skin test sa iyong galang-galang (wrist) o siko.
Dahil hindi pa natutukoy kung ligtas bang gamitin ng mga buntis at nagpapasusong ina ang Tsaang Gubat, pinakamabuti kung iiwasan muna ito.
Side Effects And Interactions
Bagaman lubos na ipinapakilala ang mga benepisyo ng halamang gamot na Tsaang Gubat, wala pang masyadong tuklas hinggil side effects at reaksyon nito sa iba pang gamot. Mas mabuti pa ring mag-ingat, lalo na kung may sinusunod kang espesyal na diet o umiinom ng iba pang gamot.
Interactions
Bagaman hindi pa lubusang napag-aaralan o nagagamit para sa commercial production ang mga benepisyo ng halamang gamot na Tsaang Gubat, ang Philippine Council for Health Research and Development ay nag-ulat na ang model patent ay naipagkaloob na at ang mga tagapagtaguyod nito ay naghahanap na ng pharmaceutical companies upang gumawa ng mga tableta ng Tsaang Gubat.
Dosage
Ang mga sumusunod na form at dosage ay puwede. Kaunting paalala: ang mga mungkahing ito ay hindi dapat unahin o kaysa sa payo ng iyong doktor.
Tea Bags Ng Tsaang Gubat
Available na ang mga ito para sa pagpapabuti ng pangkalahatang kalusugan. Ang ipinapayong paghahanda nito ay ihalo ang tsaa sa isang tasa ng mainit ng tubig sa loob ng 1 – 2 minuto. Uminom ng 1 tasang tsaa kada araw.
Sariwang Dahon Ng Tsaang Gubat
Upang makagawa ng iyong tsaa, hugasan ang dahon ng Tsaang Gubat gamit ang tubig. Tadtarin ang mga dahon hanggang sa magkaroon ka ng isang tasa nito. Pakuluan ang isang tasang dahon ng Tsaang Gubat sa dalawang tasang tubig na may katamtamang lakas ng apoy sa loob ng 15 hanggang 20 minuto.
Ano Ang Kadalasang Dami Ng Tsaang Gubat?
Puwede mong gamitin ang tsaa bilang pangmumog sa oras na lumamig ito. Para sa pagtatae, uminom ng 1 tasang tsaa tuwing 4 na oras. Upang gumanda ang pangkalahatang kalusugan, uminom ng 1 tasang tsaa bawat araw.
Paano Ito Puwedeng Ikonsumo?
Puwedeng kainin ang Tsaang Gubat nang hilaw o sariwa sa salad, o puwedeng ibabad ang pinatuyong dahon nito sa mainit na tubig upang maging tsaa.
Key Takeaways
Para saan ang Tsaang Gubat? Kilalang-kilala na ang mga benepisyo ng halamang gamot na Tsaang Gubat, lalo na ang tsaa nito na itinuturing na ligtas at epektibo sa paggamot ng ilang karamdaman. Ngunit marami pang mga pananaliksik ang kailangan upang maunawaan ang mas marami pa nitong benepisyo.
Matuto pa tungkol sa Halamang Gamot dito.
