Natural Na Gamot Sa Ulcer, Ano Ba Ang Maaaring Subukan?

Ang ulcer ay karaniwan sa mga Pilipino. Ngunit ang magandang bagay ay ang mga sintomas nito ay maaaring pamahalaan sa bahay. Ano ang pinakamahusay na natural na gamot sa ulcer?

Ano Ang Peptic Ulcer?

Ang peptic ulcer ay sugat na matatagpuan sa lining ng tiyan (gastric ulcer), o sa itaas na bahagi ng small intestines (duodenal ulcers). Ang pinakakaraniwang sanhi ng kondisyong ito ay impeksyon sa Helicobacter pylori bacteria, at pangmatagalang paggamit ng NSAIDS (non-steroidal anti-inflammatory drugs) at aspirin.

Pananakit ng tiyan ang pinakakaraniwang sintomas na nararanasan ng mga taong dumaranas ng peptic ulcer.

Mga Tip Sa Paggamot Sa Bahay Para Sa Peptic Ulcer

Ang isang mahalagang bagay na dapat linawin tungkol sa peptic ulcer ay ang mga maanghang na pagkain at stress ay hindi nagdudulot nito. Gayunpaman, may posibilidad na makapagpalala ito ng mga  sintomas.

Kung naghahanap ka ng pinakamahusay na natural na gamot sa ulcer, isaalang-alang ang sumusunod:

Muling Isaalang-Alang Ang Iyong Mga Gawi

Upang maiwasang lumala ang iyong mga ulcer, subukang huminto sa paninigarilyo, at iwasan ang pag-inom ng alak.

Ang dahilan nito ay ang paninigarilyo ay maaaring mas makapagpahina ng lining ng tiyan patungo sa pagbuo ng ulcer. Ito ay dahil sa kakayahang nitong makagambala sa proteksiyon na lining ng tiyan.

Bukod pa rito, ang paninigarilyo ay maaaring makapagpataas ng acid sa tiyan, na maaaring magpalala ng mga sintomas.

Sa kabilang banda, sinasabi ng mga doktor na ang pag-inom ng alak ay maaaring magdulot ng pamamaga at pagdurugo. Ang dahilan nito ay maaari ring masira ng alkohol ang proteksiyon na lining ng tiyan at bituka. Higit pa rito, maaari rin itong maging sanhi ng pangangati.

Subukang Iwasan Ang Pag-Inom Ng Gatas

Ang ilang mga tao na may mga peptic ulcer ay gumagaan ang pakiramdam pagkatapos uminom ng gatas. Gayunpaman, sa paglaon, ito ay maghihikayat ng labis na produksyon ng asido na magpapalala sa sakit.

Kung mahilig ka sa gatas o ito ay isang malaking bahagi ng iyong diyeta at nutrisyon, makipag-usap sa iyong doktor tungkol sa magagandang mga pamalit.

Bawasan Ang Stress

Tulad ng nabanggit kanina, ang stress ay hindi nagiging sanhi ng mga ulcer, ngunit maaari itong makapagpalala ng mga sintomas.dagdag pa rito, ang pagbabawas ng stress o epektibong pagharap sa stress ay ang pinakamahusay na natural na gamot sa ulcer.

Sabi ng mga eksperto, malaki ang maitutulong kung matutukoy mo ang sanhi ng iyong stress. Kung posible na alisin ang mga sanhi, subukang gawin ito. Kung hindi mo kaya, pagkatapos ay magsagawa ng ilang mga pagsasanay na nagpapababa ng stress.

Siguraduhing Sapat Ang Tulog

Kapag kulang ka sa tulog, malamang na mas madaling ma-stress ka. Bukod pa rito, ang sapat na pagtulog ay mabuti para sa iyong immune system. At samakatuwid ito ay makakatulong sa paglaban sa ulcer o mapabilis ang proseso ng paggaling.

Pag-Isipan Ang Iyong Mga Gamot

Tinalakay sa rtikulong ito na ang pangmatagalang paggamit ng NSAIDS at aspirin ay maaaring magdulot ng mga peptic ulcer. Upang malunasan ang iyong kondisyon, maaaring  makipag-ugnayan sa iyong doktor tungkol sa iyong mga gamot.

Halimbawa:

• Itanong kung posibleng palitan ang NSAIDS ng iba pang mga pain-reliever.
• Magtanong kung may posibleng paraan para protektahan ang iyong tiyan at maliit na bituka kung hindi maiiwasan ang NSAIDS.
• Tingnan kung ayos lang na piliin ang pinakamababang dosis ng NSAID bilang gamot.

Natural Na Gamot Sa Ulcer

Bukod sa mga tip na nakalista sa itaas, ang pinakamahusay na natural na gamot sa ulcer ay maaaring isa sa mga sumusunod na hakbang.

Magdagdag Ng Probiotics Sa Iyong Diet

Ang mga probiotic ay mga buhay na organismo na gumagana upang matiyak ang balanse ng mabuti at masamang baterya sa ating mga katawan. Higit pa rito, ang pagkakaroon ng probiotics ay tumutulong sa ating digestive system na mapanatili ang pinakamabuting lagay ng kalusugan.

Sa isang pag-aaral, nalaman ng mga mananaliksik na habang hindi kayang patayin ng mga probiotic ang H. pylori bacteria, makakatulong pa rin sila sa pamamahala ng mga ulser dahil maaari nilang:

• Bawasan ang dami ng bacteria na naroroon
• Tumulong na mapawi ang mga sintomas
• Pabilisin ang proseso ng pagbawi

Kung naghahanap ka ng magagandang mapagkukunan ng probiotics, isaalang-alang ang mga pagkaing may probiotics, tulad ng yogurt. Higit pa rito, maaari ka ring kumunsulta sa iyong doktor para sa isang magandang probiotic supplement.

Kumain Ng Honey

Kilalang pampatamis ang pulot, ngunit bukod doon, ginagamit din ito bilang panlunas sa mga sakit tulad ng ubo at sipon.

Ang magandang balita ay isang pagsusuri noong 2016 na iminungkahi na makakatulong din ito sa mga ulser. Ang isang uri ng pulot na tinatawag na Manuka honey ay nagpakita ng antibacterial property laban sa H. pylori – isa sa mga sanhi ng peptic ulcer.

Bukod pa rito, sinabi rin sa pagsusuri na ang pulot ay may malaking potensyal sa “panggamot ng mga sugat o mga ulcer sa tiyan.”

Isaalang-Alang Ang Bawang

Ang bawang ay isang sikat na pampalasa na nagdaragdag ng kakaibang lasa sa aming pagkain. Sino ang mag-aakala na ito ay maaaring isa sa iyong mga pagpipilian pagdating sa pinakamahusay na natural na gamot sa ulcer?

Isang pagsusuri na ginawa noong 2015 ang nagsabi na pinipigilan ng bawang ang paglaki ng H.pylori bacteria. Sa isa pang pag-aaral, sinabi ng mga mananaliksik na ang pagkonsumo ng 2 clove ng bawang sa isang pagkain dalawang beses araw-araw ay maaaring labanan ang H.pylori.

Gayunpaman, ang ibang mga pag-aaral ay nagpapahiwatig na ang bawang ay hindi epektibo pagdating sa paglaban sa bacteria o sa pag-iwas sa mga ulcer. Samakatuwid, kailangan pa nang higit pang mga pag-aaral upang kumpirmahin ang lunas na ito.

Sa huli, kung magpasya kang magdagdag ng bawang sa iyong listahan ng mga natural na gamot sa ulcer, huwag kalimutang makipag-usap sa iyong manggagamot.

Habang ang bawang ay karaniwang ligtas, maaari pa rin itong makaapekto sa iyo kung mayroon kang pinagbabatayan na kondisyon.

Magkaroon Ng Healthy Diet

Sa wakas, ang pinakamahusay na natural na gamot sa ulcer ay isang malusog na diyeta. Kumain ng mga whole grain, at mga prutas at gulay na mayaman sa bitamina A at C.

Ang isang malusog na diyeta ay nakakatulong na palakasin ang immune system upang labanan ang impeksyon at tulungan kang gumaling nang mas mabilis. Higit pa rito, positibo itong nakakaapekto sa iyong pangkalahatang kalusugan.

Key Takeaways

Kung mayroon kang peptic ulcer, ang pagkonsulta sa iyong doktor ay ang pinakamahusay na paraan ng pagkilos. Maaari silang magrekomenda sa iyo ng mga antibiotic, acid-blocker na nagpapababa ng produksyon ng acid, o mga antacid na nagne-neutralize sa acid.

Gayunpaman, maaari mong piliin ang pinakamahusay na natural na gamot sa ulcer mula sa mga opsyon na aming tinalakay. Tumutok sa mga pagbabago sa pamumuhay, tulad ng pag-iwas sa paninigarilyo at alkohol, pagbabawas ng stress, at pagkuha ng sapat na tulog.

Key-takeaways

Matuto pa tungkol sa Digestive Health dito.