Ano ang Food Poisoning?
Sa paghahanda ng pagkain at inumin, mahalagang manatiling malinis sapagkat anumang pagkain na hindi naihanda nang maayos ay maaaring maging sanhi ng kontaminasyon na magdudulot ng food poison. Ang food poison, na mas karaniwang tinatawag na food poisoning ay isang sakit na nakukuha sa mga sirang pagkain at inumin o kontaminadong pagkain at inumin na may bakterya, virus, parasites o toxins na ating nakain. Gayunpaman, tulad ng iba pang mga sakit, may ilang gamot sa food poison na maaari din natin gawin sa ating mga tahanan.
Sintomas ng Food Poison
Bukod sa pag-alam kung ano ang food poison at gamot sa food poison, mahalagang malaman din ang mga sintomas nito.
- Pagsusuka
- Pagtatae na minsan ay may kasamang dugo
- Pananakit ng tiyan
- Lagnat
- Panginginig
- Nausea
- Pananakit ng ulo
- Panlalambot o panghihina
Gamot sa Food Poison
Oral Rehydration Powder
Isa sa mga iniiwasang mangyari sa isang taong na-food poison ay dehydration o pagkawala ng likido sa katawan at iba pang mga nutrisyong kailangan nito. Habang hindi pa humuhupa ang pagsusuka at pagtatae, iwasan muna ang solid na pagkain at mga produktong dairy. Manumbalik lamang sa pagkain at pag-inom kapag bumuti na ang pakiramdam.
Maaaring subukang ang pag-inom ng oral rehydration powder na mabibili sa mga pharmacy. Kung wala man nito, puwede kang gumawa ng sarili mong timpla sa pamamagitan ng pagtunaw ng ½ kutsarita o 3 gramo ng asin, ½ kutsarita ng baking soda at 4 na kutsara ng asukal sa 4 ½ na tasa o isang litro ng tubig. Siguraduhin lamang na sa malinis na tubig gagawin ang mixture na ito upang hindi lumala ang food poisoning.
BRAT Diet
Isa pa sa maaaring makatulong na gamot sa food poisoning ay ang BRAT diet. Ito ay banayad lamang sa tiyan sapagkat binubuo lamang ito ng saging, kanin, applesauce at toast. Kainin mo ito hanggat hindi pa bumubuti ang iyong pakiramdam.
Ang mga pagkaing ito ay makatutulong upang muling manumbalik ang iyong lakas na nawala dulot ng food poisoning. Kung hindi mo man ito nais, siguraduhin lamang na ang kakainin mo ay mga pagkaing mababa lamang ang taba hanggang sa bumuti ang iyong pakiramdam.
Pag-inom ng Luya o Mint Tea
Kapwa kilalang halamang gamot ang luya at mint. Batay sa ilang pag-aaral, ang luya ay nakatutulong sa pagpapawi ng pagduduwal habang ang mint naman ay nag-aayos ng tiyan. Makatutulong din ang pag-inom ng mga tsaa nito upang manatili kang hydrated habang ikaw ay may sakit.
Over The Counter na Gamot
Sa ibang sitwasyon, maaaring bumili ng mga gamot na over the counter tulad ng gamot sa pagtatae ngunit tandaan na hindi ito ipinapayo lalo na kung bata ang na-food poison.
Bagamat nabanggit ang ilan sa mga posibleng gamot sa food poison na magagawa sa inyong tahanan. Tandaan na kaagad pa rin kumonsulta sa doktor kung hindi nagkakaroon ng pagbabago sa nararamdaman o mas lumalala ito.
Paano Maiiwasan ang Food Poison?
Upang maiwasan ang food poison, gawin ang sumusunod:
- Regular na paghuhugas ng kamay kapag nagluluto ng pagkain o bago humawak ng pagkain
- Hugasan ang mga gamit tulad ng kutsara, tinidor, plato at mga panluto
- Hugasan ang mga gulay , prutas at karne
- Lutuin nang mabuti ang mga pagkain
- Ilagay sa refrigerator ang mga tirang pagkain na nakalagay sa selyadong container
- Huwag kumain ng mga pagkaing may masangsang na amoy
- Iwasang uminom ng mga tubig na mula sa balon o batis
- Huwag kakain ng mga expired na pagkain o mga pagkaing sira ang balot
- Lutuin ang mga frozen na pagkain sa tamang oras na nakalagay sa pakete nito
