backup og meta

Paano Nakaapekto Ang Wastong Nutrisyon Sa Pangkalahatang Pangkalusugan?

Medically reviewed by Jezreel Esguerra, MD · General Practitioner


Written by Tracey Romero · Updated Jan 26, 2023

    Paano Nakaapekto Ang Wastong Nutrisyon Sa Pangkalahatang Pangkalusugan?

    Narinig na nating lahat ang mga katagang, “You are what you eat.”  Ngunit, karamihan sa atin ay hindi nauunawaan ang epekto ng wastong nutrisyon sa ating katawan, maging sa ating kabuuang kalusugan. 

    Ang mga pagkain ay nagtataglay ng iba’t ibang mga sustansiya. Ito ang tumutulong sa ating katawan na gumana’t gampanan ang mga tungkulin. Ang nutrisyon sa pagkain ay ang mga nourishing substances na mahalaga sa pagpapanatili ng pagsulong at paglaki ng ating katawan. Kaya naman, maaaring bumagsak ang ating kalusugan kapag ang ating katawan ay kapos sa natatanggap na nutrisyon. O mas masama pa, walang nutrisyong natatanggap. 

    Magbasa pa upang matuto tungkol sa epekto ng wastong nutrisyon sa kalusugan.

    Pag-Unawa Sa Epekto Ng Wastong Nutrisyon Sa Kalusugan

    Kung ang isang tao ay hindi nakakakuha ng wastong nutrisyon mula sa kanilang diyeta, maaaring huminto o bumagal ang metabolic processes ng kanilang katawan.

    Maaari nating isipin ang mga sustansiya bilang impormasyon o tagubilin para sa ating katawan. Kapag walang tagubilin o impormasyon, hindi magagampanan nang maayos ng ating katawan ang bawat tungkulin.

    Mas makakabuti kung sa ganitong paraan natin iisipin ang pagkain, sa halip na nakatutok sa kung gaano karaming gramo o calories ang ating kinokonsumo.

    Sa ganoong paraan, magpokus sa pagpili ng tamang uri ng pagkain na dapat isama sa ating diyeta, sa halip na mga dapat ibukod. Tandaan, hindi kalaban ang pagkain.

    Ang nutrisyong natatanggap natin sa partikular na mga pagkain ay makatutulong upang maiwasan ang sakit at mapalakas ang ating kalusugan.

    Ang Epekto Ng Nutrisyon Sa Kalusugan: Malnutrisyon Sa Mga Developing Countries 

    Sa mga developing countries o sa mga bansa na patuloy na umuunlad, maaaring maging mahirap para sa mga tao na makuha ang sapat at wastong nutrisyon na kanilang kailangan. Laganap sa ganitong mga bansa ang mga nakahahawang sakit, at malaking bahagi nito ay dahil sa malnutrisyon.

    Gayunpaman, ang mga mamamayan ng naturang developed countries ay maaari ring makaranas ng malnutrisyon. Maraming mga tao ang madalas na pumipili ng kaginhawaan sa halip na piliin ang malusog na diyeta. Ito ang dahilan kung bakit maraming tao ang may gusto sa instant meals at fast food kaysa sa malusog na pagkain. Ito’y dahil nakakabusog at mabilis ihanda.

    Ipinakikita sa isang pag-aaral na ang calorie intake ng mga Amerikano ay nasa humigit-kumulang 3,600 calories  bawat araw. Sa kabila ng malaking halaga ng calories na kinokonsumo ng mga Amerikano, karamihan sa mga pagkain na kinakain nila ay mataas sa sodium at fat, kaysa iba pang sustansiya.

    Isa pang makabuluhang dahilan kung bakit ang mga tao ay hindi nakakakuha ng sapat na nutrisyon sa mga developed countries ay dahil sa mga uso. Ang epekto ng nutrisyon sa kalusugan ayon sa kasarian ay siniyasat sa iba’t ibang pananaliksik.

    Ipinakikita sa isang pag-aaral na ang mga kabataang babae na sumusubok sa mga fad diets ay kulang sa copper at potassium. Ang mga resultang ito ay isang dahilan ng pag-aalala. Dahil ang mga bitamina at mineral ay nakatutulong upang maiwasan ang mga malalang kondisyon at ipinapanatiling malusog ang ating katawan.

    Mga Panganib Ng Maling Diyeta At Nutrisyon

    Ang higit na nagbibigay-diin sa epekto ng nutrisyon sa kalusugan ay ang paraan ng diyeta ng isang indibidwal. Responsable ito sa humigit-kumulang 30-40% ng lahat ng uri ng kanser. Kahit na hindi isang lunas o direktang dahilan sa kanser ang nutrisyon, ito ay may mahalagang papel pa ring ginagampanan.

    Ang epekto ng nutrisyon sa kalusugan ay makikita rin sa kung paano ito nakakaapekto sa kabataan. Kung ang mga bata ay hindi nakatatanggap ng wastong nutrisyon, hindi nila maaabot ang kanilang optimal weight and height. Kasabay nito, maaari silang makaranas ng sintomas ng malnutrisyon at iba pang kondisyon.

    Dagdag pa rito, ang poor diet ay maaaring maging sanhi ng pagiging overweight o obese ng isang tao. Lalo na kung sila ay kumakain ng diyeta na matataas sa processed foods. Gayunman, hindi lang ang pagtaas ng timbang ang problema.

    Ang obesity at pagiging overweight ay naiugnay sa maraming kondisyon at sakit, tulad ng sakit sa puso, altapresyon, diabetes, sakit sa bato, bukod sa iba pa.

    Ano Ang Mangyayari Kung Kulang Sa Nutrisyon Ang Katawan?

    Kapag hindi natin nakokonsumo ang daily dietary requirements ng ating katawan, nakokompromiso nito ang kakayahan ng ating katawan na gampanin ang kanyang tunkulin.

    Kakulangan Sa Protina

    Ang iyong katawan ay maaari ding magdusa dahil sa kakulangan sa protina. Kung hindi ka kumakain ng tamang uri ng mga protina, o hindi kumokonsumo ng sapat na protinan, maaari kang magkaroon ng problema sa atay, makaranas ng pagbaba ng enerhiya, paghina ng immune system, at makita ang pagliit ng kalamnan.

    Pagkabulok Ng Ngipin

    Hindi rin natin maaaring balewalain ang epekto ng diyeta sa ating mga ngipin. Kapag kumakain ka ng diyeta na mataas sa asukal, madali itong hahantong sa pagkabulok ng ngipin.

    Ang mga asukal at acidic na parte ng pagkain ay maaaring magpahina sa iyong ngipin. Lalo na kung hindi ka nagsasanay sa pagkakaroon ng proper oral hygiene. Ang diyeta na kulang sa nutrisyon ay maaaring humantong sa gum problems. Maaari ding maging mahirap sa iyo ang labanan o pigilan ang impeksiyon.

    Kakulangan Sa Vitamin D

    Ang kakulangan sa bitamina ay nagiging mas malaking problema sa mga tao sa buong mundo. Halimbawa, ang karaniwang bitamina na kulang sa mga tao ay ang bitamina D. Ang kakulangan sa vitamin D ay maaaring humantong sa pagbagsak ng mga matatanda, diabetes, mga impeksiyon, ilang uri ng kanser, at mga sakit sa immune system.

    Kakulangan sa Calcium

    Ang isa pang karaniwang nutrient na kulang sa maraming tao ay ang calcium. Ang calcium ay isang masaganang mineral sa ating mga katawan at napakahalaga sa paggawa ng importanteng mga tungkulin, tulad ng hormone secretion at muscle function. Maaaring humantong sa hypocalcemia, osteoporosis, dental changes, at iba pa ang kakulangan sa calcium.

    Physical Decline

    Ang kakulangan sa nutrisyon ay maaaring magkaroon ng malaking epekto sa kalidad ng buhay ng isang tao at itsura ng kanilang katawan.

    Halimbawa, kung ikaw ay kulang sa folate, vitamin C, at iron, maaari kang magkaroon ng brittle at tuyong buhok. Maaari ka ring makaramdam ng pagod dahil ikaw ay kulang sa iron. At magkaroon ng spoon-shaped o ridged nails mula sa mababang halaga ng calcium, protina, vitamin A, at iba pa.

    Bukod pa rito, ang kakulangan sa partikular na mga nutrients, lalo na ang mga bitamina, ay maaaring makapinsala sa aspetong cognition. Ang mga resulta sa pananaliksik na ito ay hindi pa tiyak dahil ito ay isinagawa sa mga hayop. Gayunpaman, isang halimbawa ng resulta ng nutrient deficiency ang pakiramdam na pagod at antok. Na nakakaapekto sa pag-iisip ng isang indibidwal.

    Paano Ako Makakakuha ng Mas Maraming Sustansya?

    Upang makasigurado na nakakakuha ka ng maraming nutrisyon, siguraduhin na ikaw ay kumakain ng malulusog at balanseng diyeta.

    Kabilang dito ang pagtiyak na ikaw ay kumakain ng sapat na pagkain mula sa five food groups araw-araw. Pinakamainam kung susubukan mong magluto ng maraming masusustansiyang pagkain hangga’t maaari, sa halip ng pagkain ng processed food, na puno ng mga preservatives. Magiging mainam din kung maliliit na halaga lamang ng maalat, mataba, at matamis na pagkain ang ikokonsumo.

    Makabubuti ring kumonsulta sa doktor bago uminom ng anumang supplement. Ang ibang supplements ay maaaring magkaroon ng side effects, at maaaring hindi mo ito kailangan kung kakain ka ng isang balanced diet. Masusuri ng doktor ang iyong kalusugan at matutukoy kung kailangan mo bang uminom ng mga supplements o hindi.

    Dapat nating unahin palagi ang ating kalusugan. Gumawa ng mas tamang mga desisyon upang mapanatili natin ang ating katawan sa pagganap ng tungkulin nito sa pinakamainam na antas (optimal level). Ang higit na pag-aaral sa wastong nutrisyon at epekto nito sa ating kalusugan ay makatutulong upang mabuhay tayo ng mas kasiya-siya.

    Isinalin mula sa Ingles ni Fiel Tugade. 

    Matuto pa tungkol sa Nutrition Facts dito.

    Disclaimer

    Hello Health Group does not provide medical advice, diagnosis or treatment.

    Medically reviewed by

    Jezreel Esguerra, MD

    General Practitioner


    Written by Tracey Romero · Updated Jan 26, 2023

    advertisement iconadvertisement

    Was this article helpful?

    advertisement iconadvertisement
    advertisement iconadvertisement