Masama Ba Ang Sobrang Pag Inom Ng Tubig At Paano Ito Nakakamatay?

Hindi naman bago sa atin ang mga benepisyo at kahalagahan ng pag-inom ng tubig, pero aware ka ba na mayroon tayong tinatawag na water intoxication? Kung saan pwede itong maging sanhi ng kamatayan ng isang tao? Marahil ang ilan sa atin ay hindi alam ang bagay na ito, at tiyak na marami ang nagtatanong kung masama ba ang sobrang pag-inom ng tubig. Ngayon, sa artikulong ito malalaman natin ang lahat ng kasagutan tungkol sa mga tanong na ito.

Basahin ang mga mahahalagang impormasyon tungkol water intoxication.

Masama Ba Ang Sobrang Pag-Inom Ng Tubig?

Ayon sa mga doktor hindi dapat bumaba ng 8 basong tubig ang ating iniinom sa araw-araw upang manatili tayong hydrated. Pero minsan nakadepende sa aktibidad na ginagawa ng tao kung ilang basong tubig ang kanilang dapat inumin, lalo na kung ikaw ay pinagpapawisan sa’yong ginagawa. Sapagkat habang ang tao ay pinagpapawisan indikasyon ito na nangangailangan tayo ng tubig sa katawan.

Dagdag pa rito, hinihikayat din ang tao na uminom ng maraming tubig lalo na kung tayo ay may sakit upang magkaroon tayo ng kaginhawaan sa katawan. Pero dapat mo pa ring tandaan na mapanganib para sa atin ang sobrang pag-inom ng tubig, dahil maaari itong humantong sa pagkamatay ng isang tao, at ang tawag sa ganitong senaryo ay water poisoning — o hyponatremia water intoxication. Kaya naman mahalaga na alam mo ang mga dahilan kung bakit hindi maganda ang sobra-sobrang pag-inom ng tubig. Narito ang mga sumusunod:

Bumababa Ang Electrolytes Sa Katawan Ng Isang Tao

Sa oras na naging labis ang tubig na nainom ng isang tao bumababa ang electrolytes ng isang indibidwal partikular na ang sodium sa ating katawan. Hindi dapat ito bumaba ng sobra dahil ang sodium ay mahalaga sa pagbabalanse ng fluid sa labas at loob ng cells.

Pamamaga Ng Cells

Tandaan na sa oras na tuluyang bumaba ang level ng sodium sa katawan ng tao, asahan na ang fluid na nagmumula sa labas ng cells ay papasok sa loob nito na nagdudulot ng pamamaga sa cells. Kung saan mayroon itong kakambal na hindi magandang epekto sa utak at buong katawan ng isang tao.

Paano Nakakamatay Ang Sobrang Pag-Inom Ng Tubig?

Kapag napabayaan ang water intoxication at hindi naagapan ang mga sintomas nito pwedeng mauwi sa coma, brain damage at pagkamatay ito. Kaya naman mahalaga na makita ang mga sintomas na nagpapakita na sobra sa tubig ang isang tao.

Mga Sintomas Ng Sobra Ka Na Sa Tubig Na Naiinom

Narito ang list ng symptoms ng water intoxication na dapat mong malaman:

• Pagkakaroon ng double vision
• Pagiging drowsy
• Paghina ng muscles o kalamnan
• Pagtaas ng presyon ng dugo
• Kawalan ng kakayahan na matukoy ang sensory information
• Pagkalito
• Cramping
• Nahihirapan sa paghinga

Dagdag pa rito, dapat mo ring tandaan na kadalasan ang mga paunang sintomas ng water poisoning ay katulad sa sintomas ng pagkakaroon ng dehydration. Narito ang mga sumusunod:

• Pagkahilo
• Pagsusuka
• Pagsakit ng ulo

Sino Ang Nasa Risk Na Makaranas Ng Pagkalason Sa Tubig?

Ang mga taong may mga medikal na komplikasyon ang prone sa water intoxication. Narito ang mga sumusunod:

• May sakit sa atay
• Pagkakaroon ng problema sa bato
• Hindi makontrol na diabetes
• Schizophrenia
• Congestive heart failure

Huwag din kakalimutan na nasa mas mataas na risk din ang mga taong laging nauuhaw partikular ang mga taong may iniinom na gamot. Narito ang mga sumusunod na medikasyon na iniinom ng isang tao na pwedeng maging sanhi ng kanilang pagkauhaw:

• Diuretics
• Antipsychotic drugs
• Ecstasy
• Nonsteroidal anti-inflammatory drugs

Madalas Ba Ang Kaso Ng Water Intoxication?

Bihira ang mga kondisyon na ito, subalit maganda kung iiwasan ito dahil sa mga medikal na komplikasyon na pwedeng maranasan ng isang tao.

Masama Ba Ang Sobrang Pag-Inom Ng Tubig? Huling Paalala

Para maiwasan ang water intoxication magandang malaman mo ang mga senyales kung kulang ka ba sa tubig. Maaari mong tingnan ang kulay ng ihi na inilalabas mo. Kapag “dark yellow” ito ibig sabihin nito kulang ka sa tubig. At kapag naman “colorless” ang iyong ihi nangangahulugan ito na sobra ka sa tubig at may posibilidad ka na makaranas ng water poisoning.

Laging mong tandaan na dapat maging “pale yellow” ang kulay ng ihi mo dahil ito ang palatandaan na sapat at angkop ang tubig sa katawan.

Matuto pa tungkol sa Masustansiyang Pagkain dito.

[embed-health-tool-bmi]