Ano Ang BRAT Diet? Lahat Ng Dapat Mong Malaman

Kung nakararanas ka ng sakit sa tiyan, (pagkahilo, pagsusuka, pagtatae), kadalasan ay wala kang gana kumain at nahihirapan kang tumunaw ng pagkain. Kung magpapatuloy pa ito, makararanas ka ng pagkapagod, kakulangan sa pagkain, at kakulangan sa tubig sa katawan. Upang malunasan ang ganitong kondisyon, nakabuo ng tinatawag na BRAT diet, na nakatutulong sa sakit sa tiyan. Ano ang iba pang mga benepisyo ng BRAT diet sa pagsusuka at pagtatae?

Ano ang BRAT diet?

Ang BRAT diet ay inirerekomenda sa mga taong nagsisimulang magpagaling mula sa pagkahilo, pagsusuka, o pagtatae. Isaisip na ang BRAT diet ay hindi para sa mga bata o matanda na palagiang sumusuka. Upang lubos kang matulungan, narito ang mga plano sa diet na maaari mong sundin:

Halimbawa ng plano sa diet

Unang 8 hanggang 12 mga oras

• Kung huminto na ang pagsusuka, ipinapayo na hayaan mong makapagpahinga ang iyong tiyan upang tuluyang gumaling.
• Matapos ang isa o dalawang oras, maaari kang lumagok ng kakaunting tubig o di kaya ay kumagat ng yelo. 

Para sa sunod na 12 hanggang 24 na mga oras

• Kung naging mabuti na ang iyong kondisyon maaaring mas maraming malinis na tubig na ang iyong inumin.
• Para sa pagsusuka at pagtatae, uminom ng mga inumin na may electrolytes, maiiwasan nito ang kakulangan sa tubig sa katawan. Narito ang mga ibang maiinom na maaari mong inumin: apple juice, flat soda, herbal tea, o di kaya ay ang non-greasy broth.
• Tandaang huwag kumain sa loob ng isang oras dahil ang sintomas ng sakit sa tiyan ay maaaring bumalik.

Pangalawang Araw

• Ito ang araw na sisimulan mo na ang BRAT diet para sa pagsusuka at pagtatae. Maaari kang magdagdag ng saging paunti-unti, kanin, applesauce, toast, at iba pang mga bland foods sa iyong diet.
• Maliban sa kadalasang BRAT meal, pupwede ka ring kumain ng saltine crackers, cereal na walang gatas, at iba pang malalambot na pagkain.

Pangatlong Araw

• Kung bumalik na sa normal ang iyong gana sa pagkain, maaari ka nang magdagdag pa ng ibang mga pagkain.
• Maaari mong idagdag ang mga sumusunod na pagkain: poached o scramble na itlog, nilaga o steamed na puting karne (manok o pabo), nilutong carrots o patatas (walang balat) at nilagang mga prutas.

Anong mga Pagkain ang Dapat Iwasan?

Nakalista sa ibaba ang mga pagkaing dapat iwasan para makuha ang benepisyo ng BRAT diet:

• Gatas at iba pang produktong dairy
• Prito, mamantika, fatty, maanghang, at hindi lutong mga pagkain
• Mga pagkaing pinatataas ang intestinal gas tulad ng broccoli, repolyo, cauliflower at beans
• Citrus o mga prutas na acidic tulad ng mga orange, lemon, pinya at kamatis
• Mga prutas na magpapataas ng gas at magdudulot ng sakit sa tiyan tulad ng ubas, cherry at mga berry na may buto
• Inumin na masyadong mainit at malamig
• Alak at kape

Kung patuloy na bumubuti ang iyong pakiramdam, maaari ka nang paunti-unting bumalik sa normal na diet ngunit alalahanin na ihuli sa listahan ng maaaring kainin ang gatas at iba pang produktong dairy.

Ano ang kinakailangan tandaan

• Laging uminom ng sapat na tubig, at ipagpatuloy uminom ng mga inuming may electrolytes upang mapalitan ang nababawas na tubig ng katawan.
• Bigyan ang sarili ng sapat na panahon upang magpagaling, matulog, magpahinga hangga’t kailangan.
• Huwag pilitin ang sarili na bumalik sa normal na gawain lalo na kung ang mga gawain ay humihingi ng higit na pisikal na lakas sa paggawa. 
• Siguraduhin na agarang ipakunsulta ang pangangatawan, lalo na kung palagian ang pagsusuka o pagtatae. Mas mabuting malaman ang dahilan ng pagkakaroon ng ganitong kondisyon upang maiwasan ang paglala.
• Humingi sa doktor ng mga maaaring lunas upang guminhawa ang kondisyon.
• Inumin ang gamot sa tamang oras at bumalik sa doktor para sa follow-up check-up

Alamin ang tungkol sa Healthy Eating dito.

Isinalin sa Filipino ni Jerra Mae Dacara

[embed-health-tool-bmi]