home

What are your concerns?

close
Inaccurate
Hard to understand
Other

Share


Or copy link

New

Am Para Sa Baby: Mainam Ba Itong Ipainom Sa Mga Baby?

Am Para Sa Baby: Mainam Ba Itong Ipainom Sa Mga Baby?

Pamilyar na ang mga magulang sa “am” o rice water, pati na rin ang mga gamit ng am para sa baby. Ngunit sa ibang lugar, lalo na sa mga probinsya, karaniwan itong ginagamit na pamalit sa breast milk o infant formula milk. Ano ba ang nutrisyon na nakukuha ng mga baby sa am? Alamin dito ang kasagutan.

Ano ang am para sa baby?

Bago natin alamin ang benepisyo ng am para sa baby, alamin muna natin kung ano nga ba ang am.

Ang am ay tubig na nakukuha kapag nagsasaing ng kanin. Kapag nagsaing, ay maaaring salain ang kanin, at ang tubig na nakukuha mula dito ay itinatabi at pinapalamig para inumin ng mga sanggol.

Ang ilang magulang ay binibigay ang am na direkta sa kanilang mga baby, ngunit ang iba naman ay hinahalo ito sa formula milk.

Ngunit ang tanong dito ay ligtas nga ba ang am? Ano ba ang benepisyo ng am para sa baby?

am for baby

Hindi puwede sa mga sanggol 6 na buwan pababa ang am

Bilang magulang, ang isa sa dapat mong alalahanin ay ang kaligtasan ng iyong anak. Lalo na at nagde-develop pa lamang ang digestive system ng iyong anak, at hindi mo siya dapat bigyan ng kahit anong makakasama dito.

Ang am o rice water naman ay ligtas basta’t maayos at malinis ang pagkahanda dito. Pero kailangan mo ring malaman na posibleng mayroon palang rice allergy ang iyong baby. Mayroon nang ilang pag-aaral na nalamang posibleng maging allergen ang rice water.

Bukod dito, hindi rin basta-basta dapat binibigyan ng am ang mga sanggol.

Ang mga sanggol na 6 na buwang gulang pababa ay maaari lang uminom ng gatas ng ina, o kaya formula milk. Ito ay dahil mas nabubusog agad ang mga sanggol sa am, at baka hindi na sila makainom ng mas masustansyang gatas; bukod dito ay baka hindi kayanin ng kanilang mga tiyan ang am.

Paano ba nagsimula ang pagbibigay ng am?

Nagsimula pa ang pagbibigay ng am noong 1950s kung saan nakaranas ng vitamin B deficiency ang maraming sanggol. Dahil hindi pa noon madaling makabili ng mga supplement, at mataas sa vitamin B ang am, inirekomenda ito ng mga doktor sa mga ina. Bukod dito, ginagamit rin na oral rehydration solution ang am para sa mga nakaranas ng diarrhea.

Kumalat ang mga benepisyo ng am sa mga magulang, at ito marahil ang dahilan kung bakit ginagamit pa rin ito hanggang ngayon.

Dapat bigyan ng am si baby kapag…

Iisa lang ang pagkakataon na dapat bigyan ng magulang ng am ang kanilang mga anak. Ito ay kung mayroong diarrhea o pagtatae ang kanilang sanggol, at wala silang mabili na oral rehydration soluation.

Ayon sa isang pag-aaral, mas nakabubuti raw ang am kumpara sa mga electrolyte solution pagdating sa diarrhea. Ayon pa sa isang pag-aaral, ang am raw na hinaluan ng kaunting asin ay epektibong alternative sa electrolyte solution.

Pero syempre, mahalaga na dalhin muna ang iyong anak sa doktor upang matingnan, lalong-lalo na kung mayroon siyang diarrhea.

Hindi dapat gamitin ang am kapalit ng breast milk

Bagamat ang am ay mayroong vitamin B, wala itong carbohydrates, protein, fats, at iba pang nutrients na kinakailangan ng iyong sanggol. Dahil dito, hindi dapat ginagamit na substitute ang am para sa breast milk.

Ayon sa mga eksperto, pinakamainam pa rin ang breast milk for babies. Ang formula milk ay dapat gamitin kung hindi nakakapag-breastfeed ang ina, o kaya kung mayroong kondisyon ang sanggol na bawal siyang uminom ng gatas.

Paano kung ihalo ito sa formula milk?

Mahalaga ang tamang timpla ng formula milk upang makakuha ng wastong sustansya ang iyong sanggol.

Ibig sabihin, hindi dapat basta-basta hinahaluan ng kung anu-ano ang formula milk. Kung sumobra ang tubig, ay baka kulangin sa nutrisyon na nakukuha ang iyong sanggol; kung kulangin sa tubig ay baka makaranas sila ng dehydration. Hindi nga payag ang ibang eksperto sa paggamit ng mineral water, dahil maaaring masyadong mataas ang salt content nito.

Ibig sabihin, dapat sundan ng mga magulang ang tamang timpla na nakasulat sa lata. Huwag itong dagdagan o bawasan, o haluan pa ng ibang mga bagay.

Karagdagang Kaalaman

Hinding hindi dapat gamitin ang am na kapalit ng breast milk. Kung nais mo itong subukan, mabuting magpakonsulta muna sa doktor. Ito ay dahil hindi sapat ang nutrisyon na ibinibigay ng am, kaya’t baka hindi ito maging masustansya para sa iyong sanggol.

Alamin ang tungkol sa Baby Nutrition dito.

Hello Health Group does not provide medical advice, diagnosis or treatment.

Picture of the authorbadge
Written by Lorraine Bunag, R.N. Updated 2 weeks ago
Medically reviewed by Ruben Macapinlac, MD, DPPS