Nakalulungkot may ilang magulang na ipinapahiya ang kanilang anak bilang pagdidisiplina. Inaakala ng ilang magulang na isa itong mahusay na paraan para mabago ang pag-uugali ng isang bata tungo sa mas katanggap-tanggap na bata.
Nagdudulot ng malalim na sugat sa mga bata ang pamamahiya. Pati ang pakiramdam na wala silang halaga ay posible ring maging epekto nito
Narito ang 5 masamang epekto ng pamamahiya sa bata na dapat malaman ng mga magulang.
Bakit Hindi Magandang Ang Pagpapahiya Sa Bata?
1. Pagkasira Ng Relasyon Ng Anak At Magulang
Normal sa’ting mga magulang ang naisin na makabuo ng isang malapit na ugnayan sa anak. Ngunit mahirap itong ma-achieve kapag madalas natin silang pinapahiya — lalo sa publiko. Maaari itong maging sanhi ng pagkakaroon nila ng pakiramdam na mahina at hindi sila iginagalang ng magulang. Ang ganitong pakiramdam ng anak ay humahantong sa kawalan ng tiwala sa pagmamahal ng magulang.
2. Takot Na Sumubok Ng Iba’t ibang Bagay
Ang pagpapahiya sa bata ng magulang ay maaaring magtulak sa kanila na matakot sumubok ng mga bagong bagay. Ito ay dahil sa pag-iisip na baka sila ay mapagalitan, mapahiya, o kutyain ng magulang. Nagiging sanhi din ito upang pigilan ng bata na tuklasin ang iba pang mga bagay dahil sa takot na magkamali at hindi matanggap sa oras na hindi maging kaaya-aya ang resulta.
3. Pagbaba Ng Kanilang Self-esteem
Natural sa mga magulang ang hangarin na magkaroon ng tiwala sa sarili ang anak upang makayanan ang hamon ng buhay. Ngunit kung lagi mong ipinapahiya ang iyong anak bilang paraan ng pagdidisiplina, posibleng hindi maging matibay ang self-esteem ng iyong anak.
Sa pagpapahiya sa bata, pwede silang makabuo ng iba’t ibang kaisipan sa kanilang sarili tulad ng pagiging mahina na humahantong sa kawalan ng tiwala sa sarili. Mahalaga sa isang bata na maramdaman na may nagtitiwala sa kanila upang magkaroon ng lakas ng loob magtiwala sa kanilang kakayahan.
4. Gawin Ng Anak Ang Pamamahiya Sa Ibang Tao
Maaaring tularan ng iyong anak ang pamamahiya sa pag-aakala na tamang gawin ito. Puwedeng gawin nila ito para mabawasan ang frustration nila sanhi ng iyong pagpapahiya sa kanila. May mga pagkakataon na namamahiya ang iyong anak para maramdaman nilang malakas sila. Ito’y dahil kapag ikaw ang kaharap nila ay nagiging mahina ang tingin nila sa kanilang sarili.
5. Pagkakaroon Ng Mental Illness
Dahil sa pagpapahiya sa bata, maaaring makaranas ng depresyon at pagkabalisa ang anak. Ito ay isang malaking problema dahil ang mental illness ay maaaring humantong sa pagkakaroon ng suicide thoughts. Sa oras na hindi ito maagapan, pwedeng mag-self harm ang iyong anak at kanilang ikamatay.
Key Takeaways
Hindi mo dapat ugaliin na ipahiya ang anak para lamang matuto sa kanilang pagkakamali, dahil mas maganda pa rin na disiplinahin sila sa paraang makatao na naaangkop batay sa kanilang pangangailangan.
Kung nalilito ka sa kung paano disiplinahin ang iyong anak, maaari kang magtanong sa mga doktor at eksperto para sa mga payo sa pagdidisiplina ng anak. Huwag kang mahiya na magtanong o magpakonsulta. Makakatulong ito sa’yo at sa’yong anak para mas tumibay ang inyong relasyon.
[embed-health-tool-vaccination-tool]
