Kilala ang Pilipinas sa pagkakaroon ng maraming superstitions, at hindi na nakapagtataka kung naniniwala ang mga tao sa iba’t ibang pregnancy myths na mayroon sa bansa dahil bahagi na ito ng kanilang kultura at tradisyon.
Kadalasan, ang mga paniniwala rin ng mga Pilipino sa paglilihi ang nagiging pundasyon ng mga payo na ibinibigay ng mga matatanda sa mga buntis. Gayunpaman, hindi sa lahat ng pagkakataon ay tama at accurate ang lahat ng paniniwala tungkol sa pagbubuntis.
May mga pagkakataon na pwedeng makasama ang mga superstitious belief sa ipinagbubuntis na bata, kaya naman napakahalaga para sa atin na malaman ang facts and myths sa paglilihi upang maiwasan ang mga medikal na komplikasyon.
Narito ang mga sumusunod na facts and myths sa paglilihi na dapat mong malaman:
Myth #1: Ang pregnancy cravings ay nakakaapekto sa itsura ng iyong anak
Ang “paglilihi” o “early conception phase” ay kadalasang sanhi ng pag-aalala sa mga buntis, dahil apektado ang kanilang mga bagay na gustong kainin, madama, makita, marinig, at maamoy. Kaugnay nito, may paniniwala sa Pilipinas na nakakaapekto ang pregnancy cravings o sa magiging itsura ng iyong anak.
Fact #1: Sa katunayan, walang siyentipikong batayan na nagba-back up sa claim na nakakaapekto ang pregnancy cravings sa magiging itsura ng bata. Gayunpaman, ang pagpunan sa pregnancy cravings nila ay makakatulong para maging masaya, komportable, at mapagaan ang kanilang pisikal at emosyonal na stress.
Myth #2: Kapag blooming ka babae ang anak, pero kapag losyang ka lalaki ang baby mo
Maraming pagbabago ang nagaganap sa katawan ng isang babae sa panahon ng kanyang pagbubuntis — at normal lamang ito. Gayunpaman may mga naniniwala na ang pisikal na anyo ng isang buntis ay maaaring maging isang preview ng kasarian ng batang kanyang ipinagbubuntis.
Halimbawa, ang mga babaeng may “pregnancy glow” ay inaasahang manganganak ng babae, habang ang mga babaeng may hyperpigmentation o medyo hindi gaanong “radiant” ang itsura ay manganganak ng isang batang lalaki.
Fact #2: Hindi maitatanggi na sikat na sikat ang paniniwala ng mga Pilipino tungkol sa pregnancy glow. Subalit ang claim na ito ay hindi pa rin tiyak dahil ang tanging paraan lamang upang matukoy ang kasarian ng isang batang ipinagbubuntis ay sa pamamagitan ng ultrasound at iba pang mga pagsusuri o test na isinasagawa ng doktor sa kanyang pasyente.
Myth #3: Ang pagkain ng maanghang o spicy food ay makakatulong para sa pagle-labor ng isang buntis
May mga buntis na mahilig sa pagkain ng spicy foods, kung saan pinaniniwalaan na nakakatulong daw ito sa pagnanais na mag-labor ng isang babae. Gayunpaman ang claim na ito ay wala ring sapat na medikal na ebidensya.
Fact #3: Ayon sa mga medical professional ang ligtas na paraan lamang para sa ligtas na pagsisimula ng labor ay ang pag-take ng medication na ibinigay o nagmula sa health professionals. Lagi rin tandaan na ang pag-inom o pag-take ng gamot na walang approval ng doktor o supervision ay maaaring makasama sa bata at sa ina.
Myth #4: Pagkain ng kambal na saging ay makakapagpataas ng tsansa na magkaanak ng kambal
Ayon sa matatandang paniniwala kung gusto mo magkaanak ng twins maaari kang kumain ng kambal na saging. Makakatulong daw ito upang maisakatuparan ang iyong kahiligan sa pagkakaroon ng anak ng kambal.
Fact #4: Ang claim sa pagkain ng kambal na saging para sa anak na twins ay imposible dahil ang ilan sa mga factor para magkaroon ng kambal na anak ay ang mga sumusunod:
- genetics
- family history
- paraan ng fertilization
Myth #5: Hindi dapat nagsusuot ng kwintas ang mga buntis dahil mapupunta sa leeg ang umbilical cord ng bata
Isa sa paniniwala ng mga Pilipino sa pagbubuntis ay ang pagsusuot ng kwintas at towel sa leeg ay magiging dahilan para mapunta sa leeg ang umbilical cord ng sanggol. Masasabi na ang claim na ito ay nakakatawa, subalit isa ito sa mga superstitious belief ng mga Pilipino.
Fact #5: Walang factual basis ang paniniwalang ito, pero posible na mapunta sa leeg ang umbilical cord ng bata. Ang tawag sa ganitong pangyayari sa bata ay “nuchal cord coli” at nagaganap ito dahil sa sariling paggalaw ng bata sa sinapupunan.
Key Takeaways
Ang mga nabanggit ay ilan lamang sa facts and myths sa paglilihi at pagbubuntis ng mga tao sa Pilipinas. Kaugnay nito, mahalaga na ma-assess natin kung ano ang mga paniniwala ang dapat sundin at hindi nararapat gawin. Sapagkat ang iyong bawat desisyon ay pwedeng makaapekto sa iyong pregnancy journey, kaya dapat maging alerto, maingat, at matalino ka.
At para masigurado natin ang kaligtasan ni baby, maaari tayong magpatingin sa doktor upang makakuha ng medikal na payo, paggamot, at diagnosis.
Matuto pa sa Pagiging Buntis dito.
