Halamang Gamot Sa Pigsa: Ano Ba Ang Mabisa?

Noong bata ka, natatandaan mong nagkaroon ka ng pigsa at binigyan ka nito ng hindi kanais-nais na pakiramdam. Dahil ang nanay mo ay malaki ang paniniwala sa bisa ng mga natural na pamamaraan ng paggamot, tulad ng mga halamang gamot, ito ang ginamit sa iyo. At tunay nga naman, ito ay naging mabisa upang gumaling ang iyong pigsa. Alamin kung ano-ano ang mga halamang gamot sa pigsa na maaaring mong gamitin. 

Pagkilala Sa Kung Ano Ang Pigsa

Isang natatanging pagkakakilanlan sa pigsa ay ang nana sa balat na dulot ng impeksyon. Ito ay karaniwang nagsisimula bilang isang impeksiyon sa isang follicle ng buhok at kumakalat sa nakapaligid na lugar. Ang impeksyon ay kadalasang sanhi ng bacteria na Staphylococcus aureus. Ito rin ay kilala bilang boils sa Ingles. 

Ang mga pigsa (furuncles) ay karaniwang nagsisimula bilang mamula-mula o purplish, malambot na bukol. Mabilis na napupuno ito ng nana, at unti-unting lumalaki at nagiging masakit hanggang sa mapunit at maubos ito. Kadalasan ito ay nabubuo sa mga sumusunod na lugar:

• Mukha
• Likod ng leeg
• Kilikili
• Hita 
• Puwet 

Maaari itong maihalintulad sa carbuncles dahil pareho silang masakit na abscess sa balat na buhat ng bacterial infection. 

Hindi naman nakakaalarma ang pagkakaroon ng pigsa dahil kadalasan naman itong kusang nawawala. Subalit, maaari kang mailang at maabala dahil dito. Kung kaya, mayroong iba’t ibang paraan ng paggamot tulad ng warm compress at mga halamang gamot sa pigsa. 

Mga Sintomas Ng Pigsa

Pwede kang magkaroon ng pigsa sa loob ng ilang oras o araw. Karaniwan itong nagsisimula bilang isang malambot at namamagang pulang bukol. Maaaring makaramdam ng init sa pagpindot. Habang tumatagal, maaaring maobserbahan ang mga sumusunod na senyales at sintomas:

• Pananakit ng apektadong lugar
• Pagkakaroon ng nana sa loob
• Patuloy na paglaki ng higit sa 2 pulgada (5 cm)
• Paninilaw o pamumuti ng gitnang bahagi (tulad ng tigyawat)
• Pagkalat sa ibang lugar
• Pag-crust over

Mga Halamang Gamot Sa Pigsa

Mayroong iba’t ibang paraan upang gamutin ang mga ito kabilang na rito ang paggamit ng mga halamang gamot. Sa katunayan, mayroong isang kumunidad sa Northern India na gumagamit ng hindi bababa sa 32 na indibidwal na plant species para rito. Narito ang ilan sa mga halamang gamot sa pigsa:

Tea Tree Oil 

Kilala ang tea tree oil dahil sa matapang na antibacterial at antiseptic properties. Nakatutulong ang mga naturang katangian upang magamot ang bacterial infection na nagdudulot ng pigsa. 

Dahil puro ito, maaari mong i-dilute ang tea tree oil sa onting tubig at gumamit ng bulak upang mapahid ito sa apektadong lugar.

Castor Oil 

Alam mo ba na ang castor oil ay tinuturing din na halamang gamot sa pigsa? Ito ay naglalaman ng isang compound tinatawag na ricinoleic acid. Isang natural ngunit makapangyarihang anti-inflammatory at antibacterial. Dahil sa mga katangiang ito, ikinokonsidera ng ilan ang paggamit ng castor oil para sa mawala ang pigsa. 

Neem Oil

Katulad ng dalawang unang nabanggit, ang neem oil, o Indian lilac, ay may antiseptic, antibacterial, at antimicrobial properties na makatutulong sa paggamot sa mga impeksyon sa balat, kabilang ang mga pigsa. 

Turmeric Powder

Kabilang din sa listahan ng halamang gamot sa pigsa ang turmeric. Ang turmeric powder ay mayroong antibacterial and anti-inflammatory properties na mainam upang gumaling ang mga pigsa. Para magamit ito bilang pamahid, haluin ito sa tubig, luya, o pareho upang makagawa ng paste. Matapos gawin ang bagong solution,  ilapat ang paste sa lugar ng pigsa dalawang beses sa isang araw. 

Maliban sa mga halamang gamot sa pigsa, maaaring magreseta ang doktor ng pain reliever, tulad ng paracetamol o ibuprofen, upang maibsan ang pananakit. Antibiotic naman kung ang pigsa ay masyado ng malaki. Makatutulong ang mga medication upang gamuting ang mga malulubha at pabalik-balik na impeksyon. 

Alamin ang iba pa tungkol sa Halamang Gamot dito.