Epekto ng Kape sa Katawan: Anu-Ano Ang Mabuti at Masamang Epekto Nito?

Ang kape ay isa sa mga pinakapopular na inumin sa buong mundo. Sa katunayan, milyon-milyong mga tao sa mundo ang nangangailangan ng kape tuwing umaga. Ngunit bukod sa kakayahan nitong gisingin tayo at ihanda para sa isang buong araw, alam mo bang mayroon din itong positibo at negatibong epekto sa ating kalusugan? Ano ang epekto ng kape sa katawan ng tao? 

[embed-health-tool-bmi]

Ano-ano ang mga Positibo at Negatibong Epekto ng Kape sa Katawan? 

Maraming mga tao ang umiinom ng kape araw-araw kaya naman mahalagang malaman kung ano-ano ang mga maaaring maging epekto ng kape sa katawan. Sa ganitong paraan, malalaman ng mga tao kung sobra ba ang iniinom nilang kape o ayos lamang para sa kanila ang uminom ng parehong dami ng nakasanayan nila sa araw-araw. 

Magsimula tayo sa mga benepisyo ng pag-inom ng kape. 

Epekto ng Kape sa Katawan: Mga Benepisyo ng Kape 

Ang kape ay mayaman sa caffeine, bitaminang B2 o riboflavin, magnesium, at iba pang plant compounds. Ang mga ito ay may malaking tyansa ng pagkakaroon ng benepisyo sa kalusugan ng isang tao. 

Nakapagpapababa ito ng Banta ng Sakit sa Puso 

Una sa lahat, ang tamang dalas at dami ng pag-inom ng kape ay makatutulong para mapababa ang mga bantang pangkalusugan na dulot ng sakit sa puso. Isa ito sa mga positibong epekto ng kape sa katawan. Maaaring nakagugulat ito sa iba sapagkat maraming mga taong may sakit sa puso ang umiiwas sa pag-inom ng kape. 

Gayunpaman, sa tamang dalas at dami ng pag-inom, makatutulong ang kape para maprotektahan ang isang tao mula sa sakit sa puso. 

Napatunayan ng mga mananaliksik na ang regular na pag-inom ng kape ay may potensyal na makabawas sa posibilidad ng coronary heart disease lalo na sa mga kababaihan. 

Ang parehong caffeinated at decaffeinated na kape ay nakapagbibigay ng ganitong benepisyo kaya naman possible na ito ay dulot ng ibang compound ng kape at hindi ng caffeine. 

Gayunpaman, mahalagang isaalang-alang na ang benepisyong ito mula sa kape ay posible lamang kung ang pagkonsumo ay nasa moderasyon o tamang dami, na may kakaunting asukal, kung posible. Ang sobrang pag-inom ng kape naman ay maaaring magkaroon ng kabaligtarang epekto. 

Nakatutulong din ang Kape na Mabawasan ang Banta ng Diabetes

Isa pang magandang epekto ng kape sa katawan ay ang pagbaba ng bantang dulot ng diabetes. Pinaniniwalaang ang caffeine ay may epekto sa kung paanong ginagamit ng ating katawan ang insulin. Kaya naman ang pag-inom ng kape ay maaaring makabawas sa banta ng pagkakaroon ng type 2 diabetes. 

Gayunpaman, mahalagang isaalang-alang na posible lamang ito kung ang kape ay may kakaunti o walang asukal. Kung lalagyan mo ang iyong kape ng maraming asukal, kailangan mo pa ring magbawas ng iyong pagkonsumo ng asukal o gumamit ng sugar substitute. 

Nakapagpapababa rin ito ng Banta ng Alzheimer’s at Parkinson’s Disease 

Ang pag-inom ng kape ay nakita ring nakapagpapababa ng banta ng pagkakaroon ng Alzheimer’s at Parkinson’s Disease. 

Nagagawa ito ng kape dahil ang caffeine ay sinasabing nakapagpapahinto ng mga receptors sa utak na nagiging dahilan ng cognitive decline. Ito ay nangangahulugan na ang pag-inom ng kape hanggang sa pagtanda ay makatutulong para maiwasan o makatulong na ma-delay ang pagkakaroon ng Alzheimer’s at Parkinson’s Disease. 

Ang mga Bantang Pangkalusugang Dulot ng Kape 

Sa kabila ng maraming mga benepisyong pangkalusugan, may negatibong epekto ang kape sa katawan kapag sumobra ito. Narito ang ilan sa mga bantang pangkalusugan na naiuugnay sa pagkakape:

Esophageal Cancer 

Isa sa mga bantang naiuugnay sa sobrang  pag-inom ng kape ay ang kanser. Bagaman hindi naiuugnay ang bantang iyo sa mga kemikal na nasa mismong kape, ngunit sa temperatura ng kape na iniinom ng mga tao. 

Natuklasan na ang pag-inom ng kape na may temperaturang naglalaro sa 60 degrees celsius ay nakapagpapataas ng banta ng esophageal cancer. Ito ay dahil ang temperatura ng kape ay maaaring maging sanhi ng pamamaga sa mga selula ng esophagus. 

Gayunpaman, ang ibang mga maiinit na inumin ay maaaring magdulot ng ganitong banta, at hindi lamang maiuugnay sa kape. Kaya maaaring uminom ng kape sa mas mababang temperatura upang mapababa ang bantang ito. 

Cardiovascular Disease 

Habang ang pag-inom ng kape ay nakapagpapababa ng bantang dulot ng cardiovascular disease, ang sobrang pag-inom nito ay maaaring magkaroon ng kabaligtarang epekto. Ito ay nangangahulugan na ang sobrang pag-inom ng kape ay nakapagpapataas ng banta ng sakit sa puso. 

Ito ay nangyayari dahil ang caffeine ay nakapagpapataas ng presyon ng dugo. At ito ay nagdudulot ng pagbilis ng pagtibok ng puso, o pagkakaroon ng abnormal na bilis ng pagtibok nito. Kung ang isang tao ay uniinom ng maraming kape araw-araw, ang ganitong posibilidad ay maaaring magdulot ng sakit sa puso sa mahabang panahon. 

Kaya ang pinakamainam na gawin ay uminom nang kape nang may moderasyon. 

Iba Pang Problema

Bukod pa sa mga nabanggit na problemang pangkalusugan, ang pag-inom ng kape ay maaaring makapagpataas ng banta ng pagkakaroon ng isang tao ng heartburn, anxiety, madalas na pag-ihi, at palpitation. 

Bagaman ang mga ito ay maituturing na mga maliliit na mga bagay, maaaring maging nakababahala ang mga ito sa hinaharap. 

Isa pang posibleng problematikong epekto ng kape sa katawan ay ang kahirapan sa pagtulog. Maaari itong magdulot ng insomnia kung ang isang tao ay palagiang umiinom ng kape. 

Kaya naman mahalagang maging maalam sa ukol sa mga epekto ng kape sa katawan. Kung ikaw ay kinakabahan, maaari mo sigurong bawasan ang dalas at dami ng pag-inom mo ng kape. Kailangan mo rin sigurong bawasan ang pag-inom ng kape kung nahihirapan ka nang makatulog.

Kung iinom ka ng kape nang may moderasyon, maaari mong makuha ang mga benepisyong dulot nito nang hindi nag-aalala sa mga bantang maaaring kaakibat ng pag-inom nito. 

Isinalin mula sa orihinal na Ingles na sinulat ni Jan Alwyn Batara.

Matuto ng higit pa tungkol sa masustansyang pagkain, dito.

[embed-health-tool-bmi]