Ang ating pag-ubo ay isang natural reflex na tumutulong na i-clear ang mga daanan ng hangin mula sa irritants, gaya ng alikabok, usok, o mucus. Maaari rin maging sintomas ang ubo ng mga impeksyon, allergy, at underlying medical condition. Sa oras din na ang mga daanan ng hangin ay nairita, ang cough reflex ng katawan natin ay nagiging activated, na nagiging sanhi ng “forceful expulsion” ng hangin mula sa mga baga. Kung saan nakakatulong ito na alisin ang anumang foreign o mucus na maaaring humaharang sa mga daanan ng hangin.
Gayunpaman, may mga pagkakataon na ang pag-ubo ay may kasamang plema na kadalasang sintomas ng mga impeksyon sa respiratory tract tulad ng bronchitis, pneumonia, o sipon. Ang mga impeksyong ito ay maaaring magdulot ng pamamaga at pangangati sa respiratory tract, na maaaring humantong sa pagtaas ng produksyon ng uhog. Ang labis na uhog ay maaaring maipon sa mga daanan ng hangin, na nagiging dahilan ng pag-ubo dahil sinusubukan ng ating katawan na ilabas ito.
Tandaan mo rin na kapag nagkaroon ka nang hindi gumagaling na ubo na may plema, mahalagang magpatingin sa healthcare provider para sa pagsusuri. Makakatulong sila na matukoy ang pinagbabatayan ng iyong mga sintomas at magrekomenda ng naaangkop na paggamot.
Pero ano nga ba ang posibleng sanhi ng hindi gumagaling na ubo? Para malaman ang sagot, patuloy na basahin ang article na ito.
6 Na Dahilan Bakit Hindi Gumagaling Ang Ubong May Plema
Narito ang ilang mga dahilan kung bakit nagkakaroon ng hindi gumagaling na ubo ang isang tao:
- Bronchitis
Tinatawag na bronchitis ang pamamaga ng bronchial tubes na maaaring magdulot sa iyo ng pag-ubo na may plema. Ang acute bronchitis ay kadalasang nalulutas o gumagaling kusa, pero ang chronic bronchitis ay maaaring humantong sa pangmatagalang pinsala sa baga at patuloy na pag-ubo.
- Hika
Ang asthma ay isang chronic lung disease na nagdudulot ng pamamaga at pagkipot ng mga daanan ng ating hangin. Kung saan ang pag-ubo na may kasamang plema ang isa sa karaniwang sintomas ng hika.
- Pinagbabatayan na impeksyon sa paghinga/respiratory infection
Kapag ang ubo ay sanhi ng bacterial o viral infection, maaari itong magpatuloy o magtanggal hanggang sa magamot ang impeksyon sa pamamagitan ng antibiotic o antiviral medication.
- Chronic obstructive pulmonary disease (COPD)
Ang COPD ay isang progresibong sakit sa baga na nagdudulot ng pamamaga — at sanhi ng pagkipot ng mga daanan ng hangin, na nagpapahirap sa ating paghinga. Kung saan ang patuloy at hindi gumagaling na ubo na may plema ay karaniwang sintomas ng COPD.
- Paninigarilyo
Maaaring makapinsala ang paninigarilyo sa mga baga at maging dahilan ng chronic bronchitis — at iba pang mga problema sa paghinga na maaaring humantong sa patuloy na pag-ubo na may plema.
- Allergy
Pwede rin na magdulot ng pamamaga sa mga daanan ng hangin at humantong sa patuloy na pag-ubo na may plema ang pagkakaroon mo ng allergic reaction, bilang response ng iyong katawan sa triggers at irritants.
Paalala ng mga doktor
Kung mayroon kang patuloy na pag-ubo na may plema, huwag mag-atubili na magpakonsulta sa doktor. Dahil napakahalagang magpatingin sa isang healthcare professional para sa pagsusuri, at pagkuha ng tamang diagnosis at paggamot. Tandaan mo rin na depende sa underlying cause ang ibibigay sa iyong treatment. Maaari kang bigyan ng paggamot ng iyong doktor tulad ng mga antibiotic, bronchodilator, steroid, o iba pang mga gamot. Pwede rin nila ipayo sa iyo na magkaroon ng mga pagbabago sa pamumuhay gaya ng pagtigil sa paninigarilyo, o pag-iwas sa mga allergens upang matigil ang pag-ubo na may plema.
