4 Simpleng Tips Para Makamit Ang Mabuting Epekto Ng TV Sa Mga Bata

Walang duda na malaking bahagi ng buhay ng mga Pilipinong mag-aaral ang panonood ng telebisyon. Gayunpaman, dalawang oras lamang ng screen time bawat araw ang inirerekomenda ng American Association of Pediatrics para sa mga batang mahigit sa dalawang taon na ang edad. 

Pakitandaan na ang artikulong ito ay para lamang sa mga magulang ng mga batang nag-aaral na, lalo na sa mga nasa grade school. Ang tinutukoy rin nating mga pantelebisyong palabas ay yaong may educational content. 

Ang mga sumusunod ay mga mabuting epekto ng TV sa bata:

Mabuting Epekto ng TV sa Bata

Nagsusulong ng pagkatuto at saya ang telebisyon

Pwedeng manood ang mga mag-aaral ng educational at informative programs na makadaragdag sa kanilang pagkatuto. Bukod dyan, nagbibigay rin ito sa kanila ng kawili-wiling pahinga paminsan-minsan. 

Ayon sa isang pag-aaral na may pamagat na “Impact of Television on the Language Development of Young Children”, binanggit ng mga mananaliksik na ang mga batang nakapapanood ng ilang programang pantelebisyon ay mas mahusay na nakaaalala ng mga letra sa alpabeto. Bukod dito, nagagawa rin nilang sabihin ang magkakaugnay na kuwento habang sinusubukang magbasa. May isa pang pag-aaral na nagsabing ang mga batang nanood ng isang partikular na palabas sa telebisyon ay may magandang vocabulary scores. 

Isa sa mabuting epekto ng TV sa bata ay nagagawa nitong ilahad ang karamihan sa mga aralin sa masaya at kawili-wiling paraan na nagugustuhan ng mga bata.

Nagsusulong din ito ng values education

Bukod sa pagkatuto ng mga letra, numero, at hugis, alam mo bang ginagaya rin ng mga bata ang “prosocial” na pag-uugali mula sa panonood ng piling mga programang pantelebisyon?

Ang prosocial na pag-uugali ay tumutukoy sa damdamin at mga pagkilos na may layuning tumulong sa iba. Ang mga batang may prosocial na pag-uugali ay nagpapakita ng pag-aalala para sa kapakanan, nararamdaman, at karapatan ng ibang tao.

Binanggit sa isa pang pag-aaral na kayang ilapat ng isang bata ang kanyang natutunan mula sa panonood ng prosocial na programang pantelebisyon sa tunay na buhay.

Maaari silang makakuha ng ilang self-regulation habits

Isa pang mabuting epekto ng TV sa bata ay nakakukuha sila ng self-regulation habits mula sa mga tauhan ng palabas. 

Tumutukoy ang self-regulation sa kakayahan ng tao na tingnan at kontrolin ang mga emosyon, nararamdaman, iniisip, at ikinikilos niya ayon sa hinihingi ng sitwasyon.

Halimbawa, sa isang educational TV show na nagtatampok sa tauhang nahihirapan sa paglutas ng math problem, hindi lamang ito nagtuturo sa mga bata kung paano sosolusyunan ang problema sa math, ipinapakita rin dito ang mga positibong pag-uugali gaya ng pagiging kalmado, paghingi ng tulong, at pagbibigay tuon sa gawain.

Tips para sa good viewing habits

Ngayong natutunan na natin ang ilan sa mabuting epekto ng TV sa bata, pag-usapan naman natin ang pagtatakda ng good viewing habits.

Mahalaga ang good viewing habits dahil may negatibong epekto sa pag-unlad ng bata ang sobra at hindi naaangkop na screen time.

Upang lubos na makuha ang mabubuting epekto ng panonood ng telebisyon, inirerekomenda ng mga eksperto ang mga sumusunod:

Sundin ang inirerekomendang screen time

Gustuhin mo mang samantalahin ng iyong anak ang mga benepisyo ng panonood ng telebisyon, huwag kalimutang sundin ang inirekomendanmg screen time. 

Pwedeng makaapekto ang sobrang screen time sa development ng utak, makapagdulot ng eyestrain, at makapagpataas ng panganib ng obesity dahil sa kakulangan sa pisikal na aktibidad.

Planuhin nang maaga

Iwasan ang random na pagbubukas ng telebisyon nang hindi alam kung aling mga programa ang kasalukuyang ipinalalabas. Tandaang mahalaga kung ano ang kanilang napapanood.

Pumili ng hindi bababa sa dalawang programang pambata at hayaan ang iyong anak na pumili mula sa mga ito.

Pumili sa telebisyon ng mga programang pang-edukasyon na aktibong nagtuturo ng mga aralin. Kung wala kang mahanap sa sandaling ito, sapat na ang mga cartoons, ngunit maging maingat dahil hindi lahat ng cartoons ay kid-friendly.

Umiwas muna sa mga drama at variety show sa ngayon. Marami sa mga ito ay may mga content na hindi akma para sa mga bata, tulad ng peligrosong pag-uugali at karahasan.

Manood kasama nila

Ang panonood sa telebisyon kasama ng iyong anak ay nagsusulong ng interaktibong panonood kung saan pwede kang magsalita tungkol sa mabubuti at masasamang anggulo ng programa. Batay dito, matutulungan mo silang makita ang pagkakaiba ng totoo sa likhang isip lamang.

Bukod dyan, kung kasama ka nilang nanonood, madali mong mapapatay o mai-mu-mute ang telebisyon sakaling may makita kang hindi angkop na bahagi ng palabas. 

Maging maingat sa mga patalastas

Maaaring madaling madala ng mga patalastas ang mga bata dahil hindi pa nila naiintindihan ang mga konsepto nito.

Ipaliwanag sa kanila na ang layunin ng mga patalastas ay makapagbenta, kahit ng mga bagay na hindi naman natin kailangan. Kung nagustuhan nila ang mga produktong napanood, ipaalala sa kanila na ganoon talaga ang layunin ng mga patalastas. 

Turuan silang maging matalinong mamimili sa pamamagitan ng pagtatanong sa kanila ng “Sa tingin mo, masustansya ‘yan?” at “Bakit sa tingin mong mas maganda ‘yan kumpara sa ginagamit na natin?”.

Matuto rito nang higit pa tungkol sa school-age na bata.