Hormone Pills Para Mabuntis, Epektibo Nga Ba?

Marami na ngayong mga paraan upang mapalakas ang fertility ng isang tao at mapataas ang tsansang mabuntis. Karamihan sa mga mag-asawa ay mas pinipili pa ring gawin ito sa natural na paraan. Gayunpaman, wala namang masama kung gagamit ng hormone pills bilang alternatibong paraan. Ngunit epektibo ba ang paggamit ng hormone pills para mabuntis?

Bago magpunta sa option na ito, dapat malamang may ilang panganib ito sa iyong kalusugan. Kung nais mong malaman pa ang mga impormasyon tungkol dito, patuloy na basahin ang artikulong ito dahil tatalakayin natin ang iba’t ibang hormone pills para mabuntis at ang mga posibleng side effect nito.

Mga Karaniwang Hormone Treatment Option

Dati, ginagamit ang hormone treatment upang mabawasan ang menopausal symptoms at mapabuti ang kalusugan ng isang babae. Ngunit ngayon, malawakang ginagamit na rin ito upang isulong ang fertility sa kababaihan. Narito ang ilan sa mga karaniwang gamot at hormone pills para mabuntis. Tandaan, gagamit lamang nito kung inirerekomenda na ng doktor. Kumonsulta sa doktor.

Clomiphene Citrate (Clomid)

Kadalasan itong iniinom ng babae. Isa ang Clomid sa mga pinakakaraniwang fertility drugs. Kaya naman, malaki ang posibilidad na ireseta sa iyo ito ng doktor. 

Ang clomiphene ang dahilan ng paggawa ng pituitary gland ng utak ng mas mataas na dami ng follicle stimulating hormone (FSH) at LH (luteinizing hormone). Ginagawa ito sa pamamagitan ng paglilinlang sa katawan ng babae upang isipin na ang level ng kanyang estrogen ay mababa. Ito ang nagiging sanhi upang maglabas ng mas maraming itlog (egg cells) ang obaryo. Karaniwang inirereseta ng doktor ang 50mg ng Clomid sa loob ng limang araw. Pagkaraan ng isang linggo, magkakaroon ng ovulation ang babae, kaya’t tumataas ang tsansang mabuntis ng babae.

Gonadotropins

Itinuturok ang gonadotropins at direktang nagpapasigla ng mga obaryo kumpara sa clomiphene na nagpapasigla naman ng pituitary gland. May pareho silang mekanismo ng clomiphene dahil ang gonadotropins ang isa sa pinatataas ng clomiphene.

Ang luteinizing hormone (LH) at follicle-stimulating hormone (FSH) o ang gonadotropins ay iba pang mga epektibong gamot. Tinutulungan nitong palakasin ang fertility ng parehong babae at lalaki.

Pinararami nito ang testosterone ng mga lalaki, habang pinararami naman ang produksyon ng itlog ng mga babae. Dapat ding tandaan na may mataas na panganib para sa mga babae na magbuntis nang higit sa isang sanggol sa sinapupunan kung gumagamit ng gonadotropin upang pasiglahin ang kanyang fertility.  

Aromatase Inhibitors (AI)

Ang Als ay isa pang paraan upang pasiglahin ang fertility ng parehong lalaki at babae. Karaniwan itong ginagamit upang gamutin ang breast cancers. Gayunpaman, may ilang mga pag-aaral ang nagpapakita na epektibo rin ito sa pagdudulot ng ovulation sa mga babae.

Binabalanse rin nito ang estrogen at testosterone imbalances sa testes ng lalaki, na nagbibigay ng mas malaking tsansang magtagumpay ang lalaki na magkaroon ng anak. Isa sa karaniwang Al na gamot na maaaring ireseta ng doktor ay ang letrozole. 

Prolactin

Isa pang uri ng hormone ang prolactin na kadalasang ginagamit sa hormone therapy upang pasiglahin ang fertility ng isang tao. Karaniwang ginagamit ito upang pataasin ang produksyon ng gatas ng ina, ngunit pinipigilan din ng prolactin ang FSH at hormones na naglalabas ng gonadotropin na may mahalagang gampanin sa pagpapataas ng tsansa ng fertilization.

Metformin

Ang gamot na ito ay hindi talaga isang fertility drug, ngunit isang gamot para sa infertility lalo na sa mga babae. Nakatutulong ang Metformin upang mapababa ang blood sugar ng katawan, pati na rin ang resistance nito sa insulin na nagpapalakas ng tsansa ng fertility. Kadalasang inirereseta ang gamot na ito ng mga doktor sa mga babaeng napag-alamang may polycystic ovarian syndrome (PCOS), lalo na kung gusto pa nilang mabuntis.

Ano Ang Mga Posibleng Side Effect?

Ang hindi maganda sa paggamit ng mga gamot na ito at hormone pills para mabuntis ay ang naidudulot nitong posibleng panganib sa kalusugan. Bagaman maaaring makatulong ito upang mapataas ang tsansang maging fertile ka, mayroon pa ring mga panganib na dapat mong malaman.

Narito ang ilan sa mild side effects na maaari mong maranasan kapag nagdesisyon kang gumamit ng fertility drugs:

• Naduduwal
• Nasusuka
• Pakiramdam na bumabaliktad ang sikmura
• Pananakit ng tyan

Mayroon ding mas seryosong komplikasyon sa kalusugan na naidudulot ng mga gamot na ito gaya ng depression at ovarian hyperstimulation syndrome (OHSS) para sa mga babae.

Dagdag pa, sa pag-inom ng mga hormone pills para mabuntis, inilalagay ng mga babae ang kanilang sarili sa panganib ng pagkakaroon ng ovarian tumors kalaunan. Kaya naman, laging napakahalaga na kumonsulta sa doktor bago magdesisyong uminom ng mga gamot na ito at pills upang pasiglahin ang iyong fertility.

Key Takeaways

Napatunayang epektibo para sa mga mag-asawa na nais makabuo nang mabilis ang pag-inom ng hormone pills para mabuntis. Napatataas din nito ang tsansang magkaroon ang isang ina ng klase ng pagbubuntis na may higit sa isang sanggol sa sinapupunan na gusto ng ilang mga mag-asawa. 

Gayunpaman, mahalaga ring malaman na mayroong side effects sa katawan ang pamamaraang ito. Ilan sa mga ito ay maaaring mild lamang, ngunit mayroon ding maaaring maglagay sa iyong kalusugan sa panganib. Palaging humingi ng payong medikal at kumonsulta sa iyong doktor bago uminom ng kahit na anong gamot at medikasyon. 

Matuto pa tungkol sa Pagbubuntis dito.