Sa 2050 halos 2.5 bilyong tao ang inaasahang magkakaroon ng ilang antas ng pagkawala ng pandinig. Maaaring iba’t-iba ang sanhi ng pagkabingi nila. Samantala, hindi bababa sa 700 milyon ang mangangailangan ng rehabilitasyon sa pandinig.
Ang antas ng tunog na maaari mong marinig ay sinusukat sa pamamagitan ng decibel. Lahat ng tunog sa pagitan ng 31-60 dB ay itinuturing na tahimik. Para mas maintindihan, ang 50 dB ay kasing lakas ng isang tahimik na pag-uusap o di kaya ng isang tahimik na refrigerator. Ang disabling hearing loss ay tumutukoy sa pagkawala ng pandinig na higit sa 35 dB sa mas magandang pandinig na tainga.
Sanhi ng pagkabingi: Sitwasyon sa Pilipinas
Halos 80% ng mga taong may kapansanan sa pandinig ay nakatira sa mga bansang mababa at nasa gitna ang kita. Ang mga kadahilanan na nauugnay sa isang mas malaking panganib ng pagkawala ng pandinig sa mas mahusay na tainga ay ang pagkakaroon ng mga kondisyon sa tainga at socioeconomic status.
Ayon sa pag-aaral na nailathala sa Asia Pacific Journal of Public Health, halos isa sa anim sa Pilipinas ay may malubhang problema sa pandinig. Umaabot ng 15% ang pangkalahatang prevalence ng katamtaman o mas malala na pagkawala ng pandinig sa populasyon ng Pilipinas. Natuklasan din na ang pagkalat ng malubhang pagkawala ng pandinig ay mas mataas sa Pilipinas kaysa sa mga high income na bansa. Ang mga kaso ng pagkabingi ay ang sumusunod:
- 7.5% sa mga bata
- 14.7% sa mga nasa hustong gulang sa pagitan ng 18 at 65 taon
- 49.1% sa mga nasa hustong gulang na 65 taong gulang o mas matanda
Antas at sanhi ng pagkabingi
Maaaring mangyari ang pagkawala ng pandinig kapag ang anumang bahagi ng tainga ay hindi gumagana sa karaniwang paraan. Kabilang dito ang panlabas na tainga, gitnang tainga, panloob na tainga, pandinig (acoustic) nerve, at auditory system.
Maaaring banayad, katamtaman, malubha, o malalim ang pagkawala ng pandinig. Nakakaapekto ito sa isang tainga o magkabilang tainga, at humahantong sa kahirapan sa pandinig ng pakikipag-usap o malakas na tunog. Ang ‘hard of hearing’ ay tumutukoy sa mga taong may pagkawala ng pandinig mula sa banayad hanggang sa malala. Kadalasang may malalim na pagkawala ng pandinig, na nagpapahiwatig ng napakakaunti o walang pandinig ang mga taong bingi. Madalas silang gumagamit ng sign language para sa komunikasyon.
Ang mga taong mahina ang pandinig ay kadalasang nakikipag-usap sa pamamagitan ng pasalitang wika at maaaring makinabang sa sumusunod:
- Hearing aid
- Cochlear implants
- Iba pang pantulong na device
- Paglalagay ng caption
Mga sanhi ng pagkabingi
Genetic
Ang ilang uri ng pagkabingi ay maaaring mamana. Kung ang kawalan ng pandinig ay umiiral sa iyong pamilya, maaaring makatulong ang genetic na impormasyon upang matukoy ang sanhi ng iyong kondisyon. Maaari rin nitong tukuyin kung malamang na magkaroon ka ng anak na magkakaproblema sa pandinig.
Pagtanda
Ang pagkawala ng pandinig na may kaugnayan sa edad na tinatawag ding presbycusis ay natural na nangyayari habang ikaw ay tumatanda. Humigit-kumulang isa sa tatlong tao sa Estados Unidos sa pagitan ng edad na 65 at 74 ay may pagkawala ng pandinig, at halos kalahati ng mga mas matanda sa 75 ay nahihirapan na makarinig.
Malakas na ingay sanhi ng pagkabingi
Ang pagkalantad sa malakas na ingay ay maaaring makapinsala sa mga sensory hair cell sa iyong tainga, ayon sa Centers for Disease Control and Prevention (CDC). Habang nasira ang mga selula ng buhok na ito, unti-unti kang nawawalan ng kakayahang makarinig. Bagama’t posibleng makaranas ng pagkawala ng pandinig pagkatapos ng pagkakalantad sa isang malakas na ingay, tulad ng pagsabog, ang paulit-ulit na pagkakalantad sa malalakas na tunog ay mas malamang na magdulot ng pagkawala ng pandinig. Ayon sa CDC, ang pakikinig sa malakas na musika sa pamamagitan ng mga headphone ay isang karaniwang sanhi ng pagkawala ng pandinig.
Pamumuo ng dumi sa tenga
Ang earwax ay maaaring maging sanhi ng pagkabingi. Sa katunayan, ang earwax impaction (o blockage) ay ang pinakakaraniwang sanhi ng conductive hearing loss. Kapag naipon nang labis ang wax, maaari itong maipit sa lugar, at nagsisilbing hadlang sa pagpasok ng tunog sa panloob na tainga.
Ang earwax o cerumen, ay ginagawa ng katawan upang protektahan ang mga tainga. Ito ay may lubricating at antibacterial properties. Kapag hindi ginamot na pagbara ay maaaring humantong sa pagkawala ng pandinig, pangangati, at pananakit sa tainga. Maaari ring itong humantong sa pagkahilo, pagrinig ng ‘tugtog’ sa tainga at iba pang problema.
Alamin pa ang tungkol sa tenga dito.
