Pagdating usapin tungkol sa stroke, napakahalaga ang paghingi ng tulong sa loob ng mga unang minuto. Mahalaga para sa mga tao maging maalam sa pagsasagawa ng first aid sa stroke dahil ang mga impormasyong ito ay maaaring makapagligtas ng buhay.
Paano Gamutin Ang Stroke: First Aid Sa Stroke
Ang stroke ay isang malubhang medikal na emergency. Bagama’t totoo na ang stroke ay nangangailangan ng gamutan sa hospital, may mga bagay na maaaring gawin upang mapataas ang posibilidad na mailigtas ang buhay ng pasyente.
Narito ang 5 mahahalagang first aid sa stroke:
1. Huwag Mag-Panic
Kung sa palagay mong ang isang tao ay nakararanas ng stroke, huwag mag-panic. Dapat kang manatiling alerto at alamin kung ano ang nangyayari upang masagip ang kanyang buhay.
Ang mainam na paraan upang malaman kung ang isang tao ay nakararanas ng stroke ay ang pagtanda sa acronym na F.A.S.T.
- Face – Suriin ang mukha kung may paglaylay sa isang bahagi.
- Arms – Kung kayang itaas ng pasyente pareho niyang mga kamay, tingnan kung mas mataas ang isang braso kaysa sa isa. Ito ay maaaring senyales ng stroke.
- Speech – Hindi ba maintindihan ang kanyang pagsasalita o nahihirapan ba siya sa pagsasalita?
- Time – Tandaan kung gaano na katagal na nararanasan ang mga sintomas na ito.
2. Tumawag Sa 911 o Emergency Hotline
Ang kasunod na dapat gawin ay pagtawag sa 911 o sa anumang emergency hotline sa lalong madaling panahon. Maaari ding humingi ng tulong mula sa mga taong nasa iyong paligid kung walang kakayahang tumawag upang humingi ng tulong.
Mainam din na ideya kung hindi direktang dadalhin ang pasyente sa emergency room. Ito ay dahil maaaring simulan ng paramedics ang gamutan sa kanilang pagdating. Ngunit kung dadalhin ang pasyente sa hospital, maaaring mawala ang ilang minuto na mahalaga upang sila ay mabuhay.
Maganda ring ideya na palaging hawakan ang telepono at ilagay ang numero ng emergency sa speed dial. Ito ay makatutulong upang agad na makahingi ng tulong, na napakahalaga dahil oras ang kalaban sa stroke.
3. Itala Ang Oras
Isa sa mga mahahalagang first aid sa stroke ay ang pagtatala ng oras kung kailangan nangyari ang stroke sa pasyente. Ito ay dahil ang mga tiyak na gamot na ginagamit sa mga pasyenteng nakararanas ng stroke ay epektibo lamang sa loob ng 4.5 na oras mula sa oras na mag-umpisa ang stroke.
4. Magsagawa Ng CPR Kung Kinakailangan
Kung sumailalim sa training sa pagsasagawa ng CPR, maaaring magsagawa ng CPR kung kinakailangan ito ng pasyente. Ito ay karaniwang isinasagawa kung walang malay ang pasyente o biglang nawalan ng malay.
Huwag matakot kung hindi ka sumailalim sa training sa pagsasagawa ng CPR; maaaring tumawag sa emergency hotline at aalalayan ka ng operator sa pagsasagawa nito.
Mainam din na sumailalim sa CPR o first aid training. Ito ay isang kasanayang nakapagliligtas ng buhat ba dapat matutuhan ng lahat.
5. Manatili Sa Kanilang Tabi Hanggang Sa Dumating Ang Tulong
Panghuli, mahalaga na manatili sa tabi ng pasyente hanggang sa dumating ang tulong. Sa paraang ito, mamomonitor mo kanyang mga sintomas at mapanatiling ligtas.
Mainam ding iwasang bigyan ang pasyente ng anumang pagkain, tubig, o gamot sa pagkakataong ito. Ito ay dahil ang pagkakaroon ng stroke ay maaaring makaapekto sa kakayahan ng tao na lumunok, maaari silang mabulunan kung kakain o iinom.
Key Takeaways
Ang stroke ay isang malubhang alalahanin sa kalusugan, ngunit kung agad na magagamot, ang prognosis ng pasyente ay maaaring maging positibo.
Pagdating sa first aid sa stroke, ang paghingi ng agarang tulong ay ang pinakamahalaga. Habang naghihintay ng tulong, panatilihing komportable ang pasyente at itala ang mga sintomas na kanyang nararanasan upang matulungan ang medical responders.
Matuto pa tungkol sa Stroke at Aneurysm dito.
