Pamumula Sa Balat: Paano Ito Magagamot At Maiiwasan?

Napakalaki at komplikadong organ ang ating balat kaya naman iniiwasan ng marami sa’tin ang pagkakaroon ng pamumula sa balat gaya ng rashes. Maaari kasing maging palatandaan ito ng pagkakaroon ng mga problema at sakit sa balat na dapat mong tugunan.

Ang pamumula sa balat ay hindi dapat balewalain lalo na kung naging rashes ito at nagkaroon ka ng mga sumusunod: pagsusugat, panunuyo, pangangati, at paghapdi ng balat. Kaya naman mahalaga na malaman mo ang ugat ng pamumula ng iyong balat para sa wastong medikal na atensyon.

Narito ang mga sumusunod na dahilan ng pamumula sa balat:

• Allergic reactions o exposure sa mga allergen
• Pagkakaroon ng bacterial infection
• Bisyo
• Kakulangan sa vitamin D
• Pagkakaroon mo ng disorder sa immune system
• Reaksyon ng iyong katawan at balat sa gamot na iniinom
• Pagiging dry ng balat
• Pagkakaroon ng matinding stress
• Pagtama ng balat o katawan sa mga bagay na mabigat 
• Napalo o nahampas

Bukod pa sa mga nabanggit maaari rin na magkaroon ng pamumula sa balat ang isang tao dahil sa iba’t ibang kondisyon ng balat gaya ng mga sumusunod:

• Contact dermatitis
• Eczema
• Ringworm/Tinea corporis
• Seborrheic dermatitis
• Psoriasis
• Dermatographism
• Heat rash
• Intertrigo
• Shingles

Paano Magagamot Ang Pamumula Sa Balat?

Para magamot ang pamumula sa balat, narito ang ilang home remedies na pwede mong subukan:

• Gumamit ng lotion na angkop sa pangangailangan ng iyong balat
• Pag-iwas sa mga allergen at irritant
• Paggamit ng anti-itch cream at ointment
• Ugaliin na maging malinis sa’yong katawan

Maaaring magreseta ang doktor o magbigay ng ilang treatment sa’yong balat kapag nakita nila na naging malubha na ang pamumula ng iyong balat. Ang mga paggamot na ibibigay sa’yo ng doktor ay depende sa’yong skin condition at pangangailangan. Sa madaling sabi, maaaring mag-iba ang paggamot sa bawat tao batay sa iba’t ibang medical factors.

Paano Maiiwasan Ang Pamumula?

Narito ang listahan ng ilang mga paraan para maiwasan ang pamumula sa’yong balat:

• Ugaliin umiwas sa mga bagay at sitwasyon na pwedeng makasakit sa’yong balat gaya ng pagtanggap ng panghahampas o palo ng ibang tao
• Pag-iwas sa pagkamot ng sobrang dalas sa balat
• Pagsusuot ng mga komportableng damit para maiwasan ang skin friction na dahilan ng discomfort ng balat
• Siguraduhin na angkop o hiyang ka sa mga skin product na gagamitin sa’yong balat
• Pagkakaroon ng proper hygiene sa’yong balat
• Pag-inom ng sapat na tubig
• Pag-iwas sa stress

Kailan Ka Dapat Magkonsulta Sa Doktor?

Sa oras na nagkaroon ka ng lagnat kasabay ng pamumula ng iyong balat, magpakonsulta agad sa doktor lalo na kung 3 araw ka nang nakakaranas ng lagnat. Maaari kasing may iba ka pang sakit na dapat malaman at matugunan sa lalong madaling panahon upang maiwasan ang anumang medikal na komplikasyon.

Matuto pa tungkol sa Kalusugan ng Balat dito.