Hindi na kaila sa mga taong mayroong diabetes na dapat maingat sila sa kanilang kinakain. Madalas ay kailangan bantayan ang kinakain nila na carbohydrates at maging mapili sa prutas. Ngunit ano nga ba ang mga mainam na prutas para sa mga diabetic? Alamin dito ang kasagutan.
Bakit Kailangan ang Prutas para sa mga Diabetic?
Ang mga prutas ay maraming carbohydrates, kaya dapat maingat ang mga mayroong diabetes sa pagkain ng mga ito. Ngunit ang mga prutas ay marami ring vitamins, minerals, at iba pang nutrients na mahalaga sa kalusugan. Kaya’t kung ikukumpara sa ibang matamis na pagkain, di hamak na mas mabuti ang prutas para sa mga diabetic.
Anu-Ano ang Prutas para sa mga Diabetic?
Ang katotohanan ay wala naman talagang prutas na ibinabawal sa mga diabetic. Ibig sabihin nito, kahit anong prutas ay maaari nilang kainin, at hindi sila dapat mag-alala sa magiging epekto nito sa kanilang diabetes. Ngunit ang dapat tandaan ay ang dami ng prutas na kinakain.
Halimbawa, kung may 15 grams ng carbohydrates ang isang prutas, at ang iyong carb count ay nasa 45 to 60 grams, mayroon ka na lamang 30-45 grams ng carbohydrates na natitira.
Maaari ring piliin ang mga prutas base sa kanilang glycemic index (GI).
Ang glycemic index ay ang nagsasabi kung gaano kabilis mapapataas ng isang pagkain ang blood sugar. Ang pagkain na may mababang glycemic index (0 to 55) ay mainam sa mga diabetic.
Pero anu-ano ang prutas para sa mga diabetic? Heto ang ilan sa mga ito:
Mansanas
Masustansya ang mga mansanas, at marami silang nutrients tulad ng potassium, vitamin A at C, calcium, fiber, at iron. Ang GI rin nito ay mababa at nasa 36 lamang. Ang ½ ng isang medium na mansanas ay tinatayang mayroong 15 grams ng carbs.
Abokado
Ang abokado ay mayroong healthy fats, fiber, vitamin C, at iron. Tinatayang sa bawat 30 grams ng abokado ay mayroong 3 grams ng carbs. Mababa rin ang glycemic index nito, nasa 15 lamang.
Saging
Ang saging ay isa sa mga sikat na prutas dito sa Pilipinas. Bukod dito, ang saging ay isa sa mga mainam na prutas para sa mga diabetic.
Ang isang saging ay mayroong fiber, vitamin A at C, iron, at siyempre, potassium. Ang ½ na banana ay may 15 grams of carbs, at ang GI nito ay nasa 51.
Berries
Naghahanap ka ba ng matamis at antioxidant-rich na prutas? Huwag kalimutan ang mga berries. Ang mga prutas tulad ng strawberries, blueberries, blackberries, cranberries, at raspberries ay may glycemic index na 49.
Kung nagbibilang ka ng calories, ang mga berries na ito ay mayroong 15 grams ng carbs.
- 1 cup ng blackberries
- 1 cup ng raspberries
- ¾ cup ng blueberries
- 1 and ¼ cup ng whole strawberries
Mangga
Pagdating sa prutas para sa mga diabetic, hindi nawawala sa usapin ang mga mangga.
Ayon sa US FoodData Central, ang 100 grams ng mangga ay mayroong 15 grams of carbs. Para naman sa glycemic index, ito ay tinatayang nasa 51.
Oranges
Ang mga orange ay kilala para sa kanilang vitamin C content.
Ang isang medium orange ay mayroong fiber, vitamins A at C, at calcium; mayroon rin igton 19 grams ng carbohydrates. Ang glycemic index para sa orange ay nasa 43.
Key Takeaways
Mahalagang piliing mabuti ang iyong mga prutas na kinakain kapag ikaw ay may diabetes. Bukod dito, mahalaga rin na huwag basta-basta haluan ng syrup o kaya matamis na cream ang mga prutas. Ito ay dahil magbabago ang kanilang glycemic index, at maaari itong makasama sa kalusugan.
Ngunit paano ang mga dried at de lata na prutas? Puwede ba na prutas para sa diabetic ang mga ito?
Ayon sa American Diabetes Association, puwede naman kumain ng mga dried at de lata na prutas, pero mas maliit dapat ang serving size. Para sa mga de lata, hanapin ang mga label na “no added sugar,” “unsweetened,” at “packed in its own juices.”
Kung mayroon ka pang mga tanong, huwag mag-atubiling kausapin ang iyong doktor.
Alamin ang tungkol sa Diabetes dito.
[embed-health-tool-bmi]
