Glutathione Habang Breastfeeding, Ligtas Ba Sa Ina At Baby?

Matapos ang panganganak, maaari mong mapansin ang mga pagbabago sa iyong balat. Dahil dito, naisip mong manumbalik sa pag-inom ng glutathione upang gumanda muli ang iyong kutis. Ngunit, bago mo ito ituloy, bigla kang napatanong — ligtas ba ang paggamit ng glutathione habang breastfeeding para sa iyo at para sa iyong anak. Halina’t talakayin natin ito. 

Ano Ang Glutathione?

Bago tayo tumungo sa bisa at kaligtasan ng paggamit ng glutathione habang breastfeeding, kilatisin muna natin kung ano ang glutathione at para saan talaga ito. 

Bagaman maraming kumikilala sa glutathione bilang sangkap na pampaputi, marami pa itong ginagawa sa iyong katawan higit pa sa pagpapaputi lamang. 

Ang glutathione ay tumutukoy sa isang tripeptide na binubuo ng tatlong amino acid (cysteine, glutamic acid, at glycine). Karamihan sa mga ito ay matatagpuan sa mammalian tissue. Maraming ginagampanang papel ang glutathione sa katawan, kabilang ang mga sumusunod:

• Antioxidant
• Free radical scavenger
• Detoxifying agent

Bukod pa rito, ilang mga pag-aaral at pananaliksik ang nagbahagi kung paano nakatutulong ang naturang compound sa iba’t ibang kondisyon.

• Pag-iwas sa pag-unlad ng cancer sa katawan
• Pagbawas ng cell damage sa liver disease
• Pagpapabuti ng insulin sensitivity sa diabetes
• Pagbawas ng ulcerative colitis damage
• Pagbawas ng sintomas ng Parkinson’s disease
• Paggamot ng autism spectrum disorders
• Pagbawas ng mga sintomas ng respiratory disease
• Paglaban mula sa mga autoimmune disease

Ilan lang ito sa mga posibleng dahilan kung bakit interesado ang ibang mga nanay sa pag-inom ng glutathione habang breastfeeding. 

Ligtas Ba Ang Pag-Inom Ng Glutathione Habang Breastfeeding?

Sa katotohanan, isang malaking katanungan pa rin kung posible bang uminom ng glutathione habang breastfeeding ang bagong ina. Walang sapat na pag-aaral na nagbibigay pahintulot sa mga ina na ituloy ito. 

Ngunit, nabanggit ng isang pananaliksik na nakatatanggap ang mga sanggol ng glutathione mula sa gatas ng kanilang ina. Para sa mga bagong silang, ang breastmilk ang nagiging mahalagang pinagmumulan ng kanilang dietary glutathione na siyang kailangan nila sa buhay.  Isang bagay na maaari nating isaalang-alang sa diskusyon na ito.

Dapat ding makonsidera kung ang nanay ay sensitibo sa pag-inom ng oral glutathione. Kung kaya, mainam na konsultahin ang iyong doktor tungkol dito. Maaaring payagan ka niya basta hindi ito makakaapekto sa kasalukuyang kondisyon mo at ng iyong anak. Kung hindi man, maaari ka rin niyang alukin ng alternatibo para rito. 

Paano Pataasin Ang Glutathione Levels Sa Natural Na Paraaan

Kung nais mo talagang magkaroon ng glutathione habang breastfeeding hindi lang para sa iyong sarili kundi para na rin matanggap ng iyong sanggol ang nasabing nutrisyon, maaari mo namang ikonsidera ang pagsasagawa nito sa natural na paraan. 

Kumain Ng Mga Pagkain Na Sagana Sa Sulfur

Ang sulfur ay nagaganap sa ilang amino acid, kabilang ang methionine at cysteine. Ang dalawang ito ay kinikilala bilang mga precursor para sa glutathione, samakatuwid nag-aambag sa synthesis nito.

Ayon sa isang pag-aaral, ang mga kabute ay kabilang sa mga pinakamahalagang pinagmumulan ng glutathione at ergothioneine, na ang huli ay isang sulfur amino acid. Gayunpaman, ang mga antas ng mga compound na ito ay maaaring mag-iba nang malaki depende sa mga partikular na kabute.

Bukod sa kabute, maaari ka ring kumain ng mga sumusunod:

• Karne
• Itlog
• Isda
• Kanin
• Tinapay
• Pasta
• Bawang
• Sibuyas
• Broccoli
• Kale
• Repolyo 

Mag-Ehersisyo

Alam mo ba na makatutulong ang pag-eehersisyo upang matamasa ang glutathione habang breastfeeding? Sa katunayan, inirerekomenda ito ng ilang mga doktor sa kanilang pasyente upang masuportahan ang pisikal at mental na kalusugan ng bagong ina. 

Iminumungkahi rin ng pananaliksik na ang ehersisyo ay mabisa sa pagbabawas ng oxidative stress sa pamamagitan ng pagtaas ng mga glutathione levels. Sa isang pag-aaral noong 2014, naobserbahan ng mga mananaliksik na ang mga matatanda na lumahok sa regular na pisikal na aktibidad sa buong buhay nila ay mayroong mas mataas na antas ng glutathione.

Alamin ang iba pa tungkol sa Pagiging Ina dito.