Ozempic: Ito Na Nga Ba Ang Solusyon Sa Pagpapapayat?

Para sa marami sa atin, ang pagpapapayat na siguro ang isa sa pinakamahirap na bagay na gawin. Kaya nga nauuso ang iba’t-ibang mga diet o kaya mga paraan ng pagpapapayat tulad na ng fasting. Ngunit mayroong nauusong gamot, ang Ozempic, na sinasabi ng marami na mabisa at madaling paraan upang pumayat.

Gaano nga ba ito katotoo, at ligtas ba ang paggamit ng gamot na ito? Magbasa dito at alamin.

Ano ang Ozempic?

Ang Ozempic ay ang brand name ng gamot na semaglutide. Ang semaglutide ay isang injectible na gamot na nakatutulong para sa mga taong mayroong type 2 diabetes.

Ayon sa manufacturer nito, nakatutulong ang gamot upang magpababa ng blood sugar, panganib ng mga sakit sa puso, panganib ng stroke, at posible rin daw itong makatulong sa pagpapapayat. Nagagawa ito ng Ozempic dahil ginagaya nito ang isang natural na hormone ng katawan na sinasabi sa iyong utak na busog ka na. Bukod dito, pinapabagal rin nito ang digestion sa pamamagitan ng pagpapahaba ng oras na namamalagi ang pagkain sa loob ng katawan.

Bagama’t isang side effect ng gamot na ito ang pagbaba ng timbang, nililinaw ng manufacturer ng Ozempic na hindi ito weight-loss drug. Hindi rin aprubado sa Pilipinas ang paggamit ng Ozempic bilang weight-loss drug.

Simple lamang ang paggamit ng gamot na ito. Mayroong prescribed na dosage depende sa pangangailangan ng pasyente, at ito ay itinuturok sa hita, baywang, o kaya sa braso. Ang isang dosage ay tumatagal ng isang linggo, kaya once-a-week lang ang pagturok ng semaglutide. Long-term rin o pangmatagalan ang gamutan na kinakailangan sa Ozempic.

Dapat ring tandaan na hindi over-the-counter medication ang Ozempic. Ibig sabihin, kinakailangan munang kumuha ng rekomendasyon ng doktor bago gumamit nito, at hindi nirerekomendang gumamit nito ng basta-basta.

Ano ang resulta ng mga pag-aaral tungkol dito?

Base sa mga isinagawang mga pag-aaral tungkol sa Ozempic, napag-alamang epektibo at mabisa nga ito pagdating sa pag-kontrol ng blood sugar at pagpapababa ng panganib ng sakit sa puso, stroke, at iba pang konektadong karamdaman. Bukod dito ay side effect rin ng gamot ang pagpapababa ng timbang. Para sa mga taong may type 2 diabetes, malaking bagay ang pagkakaroon ng ganitong gamot dahil nakakatulong itong maibsan ang sintomas ng kanilang karamdaman.

May masamang epekto ba ang paggamit ng Ozempic?

Ligtas ang paggamit ng Ozempic basta’t mayroon itong direksyon mula sa doktor. Ito ay dahil isa itong prescription drug at mahalagang maibigay ang wastong dosage at dalas ng paggamit nito.

Gayunpaman, mayroong ilang mga side effects ang gamot na ito. Kabilang na dito ang:

• Kabawasan ng gana sa pagkain
• Pagdighay
• Constipation
• Diarrhea
• Pagkahilo
• Fatigue
• Sakit sa tiyan
• Gastrointestinal disorder
• Hypoglycaemia o low blood sugar
• Pagsusuka
• Pagduruwal
• Pagbawas ng timbang

Tandaan, hindi dapat basta-basta umiinom ng gamot na ito, lalong-lalo na sa mga taong walang diabetes o problema sa blood sugar. Ito ay dahil posibleng mas maging malala ang mga side effects ng gamot na ito kung basta na lang ito iinumin.

Mayroon ring mga balitang kumakalat kung saan nagkakaroon raw ng bentahan ng Ozempic online na hindi kinakailangan ng reseta ng doktor. Lubhang mapanganib ang ganitong gawain dahil bukod sa hindi ligtas ang paggamit nito ng basta-basta, hindi rin masisigurado kung tunay ba ang gamot na ibinebenta. Posibleng nahaluan na ito ng ibang kemikal na maaaring makasama pa sa kalusugan.