Bakuna Para Sa Cancer, Epektibo Nga Ba Ito Para Sa Kalusugan?

Kapag ang usapan ay bakuna para sa cancer, maraming tao ang duda sa pagiging epektibo nito, lalo na kung wala naman silang sapat na kaalaman sa bagay na ito. Idagdag mo pa ang pagkalat ng maling kaisipan tungkol sa bakuna na ito raw ay nakakapinsala. 

Gayunpaman ayon sa mga eksperto, doktor, mga pag-aaral, ang bakuna para sa cancer ay maaaring makapagligtas ng buhay. Upang mas malinawan ka tungkol sa bagay na ito, basahin ang artikulong ito. 

Ano ang pagpapabakuna?

Para sa kaalaman ng lahat, ang pagbabakuna ay isang proseso ng pagbibigay ng vaccine sa tao upang maiwasan ang ilang mga sakit na pwedeng maging sanhi ng kamatayan at karamdaman. Isa pa sa mga benepisyo ng bakuna ay nagkakaroon tayo ng pang-iwas sa viral infections na pwedeng magdulot ng cancer. Kaya naman hindi nakapagtataka kung inirerekomenda ng mga doktor ang pagpapabakuna.

Paano gumagana ang bakuna?

Sa oras na ang virus o bakterya ay pumasok sa katawan, ang immune system ang nakikipaglaban sa mga ito. Ito ang dahilan kung bakit nagkakasakit ang isang tao. Maaaring indikasyon ito na lumalaban ang ating katawan sa virus. 

Sa madaling sabi, ang mga bakuna ay gamot na may kakayahang mag-stimulate sa immune system ng tao na hindi kinakailangang malantad sa isang partikular na sakit.

Bakit mahalaga ang bakuna para sa cancer?

Maaaring makatulong ang mga vaccine para maiwasan ang mga partikular na virus at maging immune. Ang ilan nga sa mga bakuna para sa cancer na kilala ay ang vaccine sa Human Papillomavirus o HPV. Nakakatulong ang bakunang ito sa pagpigil sa mga impeksyon mula sa mga uri ng HPV na masasabing kaugnay sa maraming kanser. Ang ilan sa mga kanser na ito ay ang mga sumusunod:

• Kanser sa puwerta (panlabas na bahagi ng puwerta ng babae)
• Kanser sa puwet (babae at lalaki)
• Cervical cancer
• Kanser sa lalamunan
• Kanser sa ari ng lalaki

Tandaan mo rin na ang bakuna para sa HPV ay nakakatulong rin sa pagpigil ng impeksiyon mula sa mga type ng HPV na nagdudulot ng kulugo sa ari ng babae at lalaki. Gayunpaman, ayon sa Vaccine Information Statement: HPV (Human Papillomavirus) Vaccine, ang pagbabakuna ng vaccine para sa cancer ay hindi dapat maging kapalit ng pagpapa-screen sa kanser sa cervix. Hindi naibibigay ng bakuna sa HPV ang proteksiyon sa lahat ng uri ng HPV na maaaring magdulot ng kanser sa cervix. Dapat ka pa ring regular na magpa-Pap test, partikular ang mga babae.

Aprubado ba ng FDA ang bakunang HPV?

Oo, ang bakunang ito ay inaprubahan ng Food and Drug Administration. Inirerekomenda rin ito ng Centers for Diseases Control and Prevention. Maaari itong matanggap ng mga nasa taong 9 hanggang 26 gulang.

Dapat ba ko magpabakuna kapag may sakit ako?

Sa oras na ikaw ay nagtataglay ng mild na sakit gaya ng sipon maaari ka pa ring magpabakuna. Gayunpaman kung ikaw ay may katamtaman o kaya matinding sakit, dapat ka munang maghintay sa iyong paggaling.

Pwede ka ring magpatingin sa doktor upang mas masigurado ang iyong kaligtasan sa pagpapabakuna.

Matuto pa tungkol sa Balitang Pangkalusugan dito.