Paano Maiiwasan Ang Pagkakaroon Ng Parkinson's Disease? Alamin

Bagama’t ang mga siyentista ay maraming tinutukoy na salik na nagiging dahilan ng pagkakaroon ng Parkinson’s Disease (PD), hindi pa rin malinaw kung ano ang tiyak na sanhi nito. Ito ang dahilan kung kaya’t mas mahirap mapigil ang PD bago pa man ito magkaroon nito ang isang tao. Sa artikulong ito, alamin ang mga maiinam na paraan na posibleng makatulong kung paano maiiwasan ang Parkinsons.

Mga Katangian Ng Parkinson’s Disease (PD)

Bago malaman ang mga maiinam na paraan kung paano maiiwasan ang Parkinsons, alamin muna ang pathological features ng sakit na ito. Ang pathological features ay ang mga katangian at pagbabagong karaniwan sa mga pasyenteng may tiyak na sakit.

Sa usapin ng PD, natuklasan ng mga siyentista na ang mga pasyente ay may mababang lebel ng dopamine. Ito ay isang neurotransmitter na nagpapadala ng mensahe sa nerve cells. Dagdag pa, sila ay may mataas na lebel ng protina na tinatawag na alpha-Synuclein o alpha-Syn.

Itinuring ng mga mananaliksik ang mga pagbabagong ito bilang bahagi ng mga posibleng sanhi ng PD. Gayunpaman, sinusubukan pa rin nilang malaman kung bakit ito nangyayari. Ang tiyak na sanhi ng PD ay nananatili pa ring misteryo.

Mabuti na lamang, tayo ay maaaring gumawa ng mga simpleng hakbang upang mapabuti ang mga lebel ng ating dopamine and alpha-Syn. Ayon sa pananaliksik, ang mga sumusunod na paraan ay posibleng makatulong upang maiwasan ang Parkinson’s Disease.

3 Paraan Kung Paano Maiiwasan Ang Parkinsons

1. Regular Na Ehersisyo

Isang praktikal na paraan upang mabawasan ang tyansa ng pagkakaroon ng Parkinson’s Disease ay ang pagiging pisikal na aktibo.

Ang ehersisyo ay isa sa inirerekomendang treatment practices para sa PD. Binigyang-diin ng mga doktor na ang mga pasyente ay dapat magkaroon ng lakas, balanse, at endurance dahil kakailanganin nila ang mga ito upang labanan ang mga epekto ng mga komplikasyon ng huling yugto ng sakit na ito.

Ngayon, may mabuting dahilan upang paniwalaan na ang ehersisyo ay maaari ring makatulong upang maiwasan ang Parkinson’s Disease. Ayon sa iba’t ibang mga pag-aaral, ang mga taong may pinakamataas na lebel ng katamtaman hanggang matinding pisikal na mga gawain ay ang may pinakamababang tyansa na magkaroon ng PD. Binigyang-tuon ng isang partikular na pag-aaral na may mahigit 213, 000 na mga kalahok na ang pisikal na gawain ay nakapagpapababa ng tyansa ng pagkakaroon ng PD nang halos 40%.

Paano nakatutulong ang ehersisyo:

Bagama’t hindi pa malinaw kung paano tiyak na nakatutulong ang ehersisyo upang maiwasan ang Parkinson’s Disease, naniniwala ang mga mananaliksik na ito ay dahil ang ehersisyo ay nagbibigay ng maraming benepisyong nagbibigay-proteksyon sa utak. Kabilang dito ang mga sumusunod:

• Pag-activate sa neurons na responsable sa motor control
• Pagpapabilis ng daloy ng dugo sa iba’t ibang bahagi ng utak
• Pagpapabuti sa neural plasticity, na nakapagpapabuti ng balanse at motor control; ang plasticity ay ang kakayahan ng utak na magkaroon ng koneksyon sa brain cells
• Pag-iwas sa pagkawala ng dopamine
• Pag-iwas sa pamumuo ng alpha-Syn protein

Ano ang maaari mong gawin:

Isaalang-alang ang pagpapataas ng lebel ng mga katamtaman hanggang matinding pisikal na gawain. Ang mga halimbawa nito ay ang mga sumusunod:

• Mabilis na paglalakad
• Pagbibisikleta
• Paglalaro ng badminton
• Tennis
• Pag-akyat sa bundok
• Jogging
• Paglalaro ng basketball

Paalala lamang: Huwag kalimutang komunsulta sa doktor tungkol sa anomang plano na baguhin ang routine sa pag-eehersisyo.

2. Uminom Ng Kape

Ang kasunod na simpleng hakbang upang maiwasan ang Parkinson’s Disease ay ang pag-inom ng kape. Natuklasan sa isang pag-aaral na nilahukan ng 8, 000 mga kalalakihang Japanese-American, ang pag-inom ng kape ay nakapagpapababa ng tyansa ng pagkakaroon ng PD.

Ang mga resulta ng pag-aaral ay independent sa iba pang mga salik tulad ng paninigarilyo. Ibig sabihin, ang pag-inom ng kape ay nakapagpapababa ng tyansa ng pagkakaroon ng PD sa mga kalahok na hindi naninigarilyo, dating naninigarilyo, o kasalukuyang naninigarilyo.

Binigyang-diin din ng mga mananaliksik na walang malaking kaugnayan sa pagitan ng tyansa ng pagkakaroon ng PD at ibang nutrisyong taglay ng kape. Gayundin, ang mga resulta ay hindi naapektuhan ng gatas at asukal.

Sa kabuoan, naging konklusyon ng pag-aaral na ang mga taong hindi umiinom ng kape ay limang beses na mas maaaring magkaroon ng PD kaysa sa mga kalahok na umiinom ng 28oz (828 ml o 3.5 tasa) ng kape araw-araw.

Paano nakatutulong ang kape:

Kailangan ng maraming pang mga pag-aaral upang matiyak kung paano nakatutulong ang kape na mapababa ang tyansa ng pagkakaroon ng PD. Subalit ang mga komento sa nabanggit na pag-aaral ay nagsasabing ang pag-inom ng kape sa loob ng mga taon ay maaaring humadlang sa pagkawala ng dopamine na kaugnay ng pagtanda.

Ano ang maaari mong gawin:

Maaaring isaalang-alang ang pag-inom ng kape. Ayon sa USFDA, ang pag-inom ng 400 mg (4 hanggang 5 tasa) ng kape araw-araw ay sa kabuoan walang kaugnayan sa mga malulubhang epekto. Gayunpaman, ang pagiging sensitibo sa kape ay iba-iba sa bawat tao. Kaya naman, komunsulta muna sa doktor tungkol sa wastong pagkonsumo ng kape.

3. Uminom Ng Green Tea

At huli, upang maiwasan ang pagkakaroon ng Parkinson’s Disease, maaaring uminom ng green tea. Wala pang naisagawang human clinical trials para masuri ang mga epekto ng green tea sa Parkinson’s Disease. Gayunpaman, tinukoy ng mga siyentista ang tiyak na components na mayroon ito na maaaring makatulong upang mabawasan ang tyansa ng pagkakaroon ng PD.

Paano nakatutulong ang green tea:

Ayon sa mga ulat, ang polyphenols sa green tea ay may kakayahang protektahan ang neurons na nagpoprodyus ng dopamine. Dagdag pa, binigyan-diin ng mga mananaliksik na ang neuroprotective property ay “tumataas depende sa dami ng nakonsumo.”

Ang isang antioxidant sa green tea na tinatawag na Epigallocatechin Gallate o EGCG ay sinasabing “pumipigil” sa protein alpha-Syn.

Ano ang maaari mong gawin:

Dahil wala pang human clinical trials tungkol sa green tea at sa mga epekto nito sa tyansa ng pagkakaroon ng PD, ang pinakamabuting gawin ay komunstulta sa doktor.

Ayon sa mga eksperto, ang pag-inom ng kaunting tasa (hanggang 5) ng green tea araw-araw ay maaaring makapagbigay ng maraming benepisyo sa kalusugan. Gayunpaman, huwag damihan ang pag-inom. Gayundin, tiyaking piliin ang brands ng green tea na may magandang kalidad at hindi mga inuming may maraming dagdag na asukal.

Matuto pa tungkol sa Parkinson’s Disease dito.