Safe Ba Ang Glutathione Sa Mga Inang Nagpapasuso?

Ang glutathione ay isang magandang antioxidant na nakatutulong sa pagsuporta sa immune system. Dahil nais ng mga nagpapadedeng ina na magkaroon ang kanilang mga anak ng pinakamalakas na resistensya, natural lamang na mapapaisip: safe ba ang glutathione sa nagpapadede na ina? Epektibo ba ito? Narito ang mga impormasyong mahalagang malaman tungkol dito at kung safe ba ang glutathione sa nagpapadede

Safe Ba Ang Glutathione Sa Nagpapadede?

Isang non-toxic antioxidant ang glutathione na natural na pinoprodyus ng katawan. Ito ay ligtas na sangkap sa supplements ng mga nakatatanda. Gayunpaman, wala pang anomang mga pag-aaral ang naisagawa tungkol sa kaligtasan ng glutathione habang nagpapasuso, kung kaya mahalagang kumonsulta sa doktor bago uminom nito nang regular.

Kung nagpapadede, ang malusog na diet na may posibleng supplementation ay nagiging mas mahalaga. Habang nagpapadede ay nasusunog ang calories, at anomang iyong kainin ay maaaring may direktang epekto sa iyong gatas. Kung kaya, mahalagang siguruhing ang mga kinakain at iniinom na supplements ay ligtas para sa sanggol.

Bagama’t ang glutathione ay isang natural na antioxidant na nakatutulong sa pagprotekta sa ina at sa sanggol mula sa toxins at maging upang labanan ang mga epekto ng oxidative stress, pinakamainam na kumonsulta sa doktor bago uminom ng anumang supplement.(Kabilang na ang pag-inom ng birth control pills).

Ang Pag-Inom Ba Ng Glutathione Ay Nakapagdaragdag Ng Antioxidants Sa Gatas Ng Ina?

Kung mayroon mang isang bagay na maaaring makaakit sa mga ina sa paggamit ng glutathione supplements, ito marahil ay ang posibilidad na “nakapagpapasa” ito ng antioxidants sa kanilang gatas, na may benepisyo sa sanggol.

Ayon sa mga ulat, ang gatas ng ina ay natural na nagtataglay ng glutathione. Ito ay maaaring makapagbigay ng proteksyon laban sa mga masasamang epekto ng oxidative stress.

Nagkakaroon ng oxidative stress kung may masyadong maraming free radicals o masyadong kaunting antioxidants. Ang masyadong maraming free radicals ay maaaring maging sanhi ng pagkasira sa cellular level na maaaring humantong sa pamamaga sa tissues at organs ng katawan.

Ang glutathione ay isa sa mga pinakamalakas na antioxidants; maaari nito tayong protektahan sa pamamagitan ng pag-neutralize sa masasamang compounds habang ang mga ito ay kusang nabubuo sa cell o tissue. Ang pagkakaroon ng sapat na glutathione sa katawan ay may benepisyo, ngunit walang sapat na datos ang nagsasabi na ang pag-inom ng supplements habang nagpapadede ay may benepisyo sa sanggol.

Mga Karagdagang Impormasyon Tungkol Sa Glutathione Supplements

Safe ba ang glutathione sa nagpapadede? Mainam na huwag uminom ng glutathione habang nagpapadede o kung buntis o kung sinusubukang magbuntis. Ito ay dahil ang kaugnayan ng supplement na nito at sa pagpapadede, fertility, o pagbubuntis ay hindi pa tiyak na napatutunayan. Imumungkahi lamang ng doktor kung ang pag-inom ng glutathione kung may mas benepisyo ito kaysa panganib.

Kung handang simulan ang pag-inom ng glutathione, magpatuloy nang may pag-iingat, partikular na kung may ibang kondisyong pangkalusugan o umiinom ng ibang gamot. Ang mga supplement ay maaaring makaapekto sa kasalukuyang sakit o maaaring may interaksyon sa gamot.

Tandaan din na katulad ng ibang supplements, maaaring makaranas ng side effects. Ang glutathione ay maaaring maging sanhi ng mga sintomasna digestive, tulad ng pagduduwal at pagsusuka. Mayroong ding posibilidad na makaranas ng allergy kung kaya mahalagang tandaan ang mga matitinding reaksyon tulad ng pamamaga at kahirapan sa paghinga.

Samantala…

Kung interesado sa pag-inom ng glutathione dahil sa mga benepisyo nitong nakapagpapaputi ng balat, tandaang may ibang paraan upang maisagawa ito. Maaaring kumonsulta sa dermatologist upang malaman ang mga paraan ng pagpapaputi nang ligtas at epektibo para sa iyo.

Kung nais mong matamo ang mga benepisyo ng antioxidant ng glutathione, tandaang marami ang mapagkukunan nito. Ang pagkain ng maraming prutas at gulay ay mainam na paraan upang magkaroon ng antioxidant.

Matuto pa tungkol sa Pagpapasuso dito.