Ano Ang German Measles At Paano Nagkakaroon Ang Isang Tao Nito?
Ang German measles ay kilala rin sa tawag na rubella, isang sakit na dulot ng virus. Ang impeksyon na dulot nito ay kadalasang banayad na may lagnat at pantal. Ngunit delikado para sa isang buntis na makakuha ng German measles dahil ang virus ay pwedeng magdulot ng miscarriage, panganganak ng patay, premature delivery, at malubhang depekto sa panganganak o birth defects. At kaugnay nito, makikita na pwede maging mapanganib ang rubella sa kalusugan ng tao, at nakakalungkot isipin na hindi lahat ay may kaalaman sa kung ano ang German measles.
Basahin ang artikulong ito para malaman ang mahahalagang impormasyon tungkol sa rubella.
Ano Ang German Measles?
Ang rubella ay isang nakakahawang sakit na dulot ng virus RuV. Maaaring makita ang German measles sa anyo ng kakaibang pulang pantal nito sa balat ng tao. Dagdag pa rito, sinasabi rin na hindi lahat ng tao na infected ng rubella ay nakakaranas ng mga sintomas nito.
Anu-Ano Ang German Measles Symptoms?
Sa mga bata, ang rubella ay karaniwang mild at may kaunting kapansin-pansing na mga sintomas. Pwede silang magkaroon ng mga pulang pantal bilang kadalasan na unang senyales nila.
Karaniwan din na mas kitang-kita ang mga pulang pantal pagkatapos maligo sa isang mainit na shower. Unang lumilitaw ang mga pantal na ito sa mukha at pagkatapos ay kumakalat sa iba pang bahagi ng ating katawan, na tumatagal ng mga tatlong araw.
Ang iba pang mga sintomas ay maaaring mangyari ng 1 hanggang 5 araw bago lumitaw ang mga pantal, at ito ay kinabibilangan ng mga sumusunod:
- Banayad na kulay rosas na mata (pamumula o pamamaga ng mga puti ng mata)
- Pangkalahatang kakulangan sa ginhawa
- Mababang antas ng lagnat o low grade fever (mas mababa sa 101 degrees)
- Ubo
- Tumutulong sipon
- Pagsakit ng ulo
- Pamamaga at malalaking lymph nodes
Karamihan naman sa mga nasa hustong gulang na nagkakasakit ng rubella ay karaniwang nagkakaroon sila ng banayad na karamdaman o mild illness, na may mababang antas ng lagnat, namamagang lalamunan, at isang pantal na nagsisimula sa mukha na kumakalat sa iba pang bahagi ng ating katawan.
At bago lumitaw ang mga pantal sa katawan ng mga matatanda, pwede sila magkaroon at makaranas ng mga sumusunod:
Paano Dina-Diagnose Ang German Measles?
Tatanungin ka ng iyong doktor tungkol sa’yong mga sintomas at susuriin ang iyong pantal. Maaari rin nilang itanong kung sa tingin mo ay nakipag-ugnayan ka sa sinumang nagtataglay ng rubella. Asahan mo rin na tatanungin ka ng iyong doktor tungkol sa iyong kasaysayan ng pagbabakuna.
Kung pinaghihinalaan ng iyong doktor na maaaring mayroon kang rubella, pwede ka nilang i-refer para sa pagsusuri ng dugo upang kumpirmahin ang diagnosis. Maaari ka rin nilang i-refer para sa iba pang mga test para maalis ang mga sakit na may mga katulad na sintomas.
Paano Naipapasa Ang German Measles?
Nakakahawa ang rubella at naipapasa ito sa bawat tao sa pamamagitan ng maliliit na patak ng fluid na mula sa kanilang ilong at lalamunan. Dahil sa pagbahing at pag-ubo, pwedeng mailipat ang sakit na ito kapag malanghap ng isang indibidwal ang fluid.
Maaari ring makuha ng isang tao ang rubella sa pamamagitan ng pagbabahagi ng pagkain o inumin sa isang taong nahawaan o infected.
Sinasabi na ang mga taong may german measles ay mas nakakahawa mula sa 1 linggo bago hanggang 1 linggo pagkatapos lumitaw ang kanilang mga pantal sa katawan. Dagdag pa rito, ang isang taong nahawaan pero walang sintomas ay pwede pa ring makahawa at makapagkalat ng virus.
Huwag ding kakalimutan na ang virus ay maaari ring dumaan sa daluyan ng dugo ng isang buntis para mahawahan ang kanyang hindi pa isinisilang na anak. Ang mga sanggol na ipinanganak na may congenital rubella syndrome ay nasa panganib para sa mga seryosong problema sa:
- Paglaki
- Pag-iisip
- Puso
- Mata
- Pandinig
- Atay
- Pali o spleen
- Bone marrow
Sino Ang Nasa Risk Na Magkaroon Ng Rubella?
Kahit anong edad at kasarian ay maaaring magkaroon ng rubella, lalo na kung walang bakuna ang isang tao para dito.
Ano Ang Mga Komplikasyon Na Pwedeng Idulot Ng German Measles?
Ang rubella ay hindi karaniwang nagdudulot ng mga komplikasyon maliban sa mga hindi pa isinisilang na sanggol. Sa napakabihirang mga kaso, ang rubella ay pwedeng magdulot ng joint inflammation (arthritis) o mga problema sa neurological.
Kung mayroon kang rubella at nakakaranas ng malalang sintomas, makipag-usap sa iyong doktor o magpakonsulta.
Paano Maiiwasan Ang German Measles?
Ang pagpapabakuna ang isa sa pinakamahusay na paraan upang maiwasan ang rubella. Maaaring gamitin ang measles-mumps-rubella (MMR) upang makatulong na maprotektahan ang sarili laban sa rubella.
Dapat ring tiyakin ng mga kababaihan na protektado sila mula sa rubella bago magbuntis upang maging ligtas din ang batang nasa sinapupunan. Hindi na kasi sila pwedeng magpabakuna ng rubella vaccine kapag sila ay buntis na o nagtataglay ng mahinang immune system.
Paano Ginagamot Ang Rubella?
Walang partikular na gamot o paggamot para sa rubella. Ang antibiotics ay hindi makakatulong sa’yo na maka-recover mula sa rubella nang mas mabilis, dahil virus at hindi bakterya ang dahilan ng German measles. Dagdag pa rito, ang mga antibiotic ay para sa paggamot sa mga impeksyong dulot ng bakterya.
Karamihan sa mga tao na mayroong rubella ay gumagaling nang mag-isa, kahit walang medikal na paggamot na ginawa. Gayunpaman may estratehiya na pwedeng gawin para mapawi ang iyong mga sintomas na kinabibilangan ng mga sumusunod:
- Pagkakaroon ng maraming pahinga
- Pag-inom ng maraming fluid
May Kinalaman Ba Ang Rubella Vaccine Sa Autism?
Ayon sa ulat na mula sa American Academy of Pediatrics, National Academy of Medicine, at Centers for Disease Control and Prevention sinasabi nila na walang siyentipikong napatunayang ugnayan sa pagitan ng bakunang MMR at autism.
Dagdag pa rito, napansin ng mga organisasyon na ito na ang autism ay madalas na nakikilala sa mga batang nasa pagitan ng edad na 18 at 30 buwan, na malapit sa oras na mabigyan ang mga bata ng kanilang unang bakuna sa MMR. Gayunpaman ang pagkakataong ito sa timing ay hindi dapat ipagkamali bilang isang cause-and-effect relationship.
Matuto pa tungkol sa Nakakahawang Sakit dito.
