Nakatutulong Ba Ang Essential Oil Para Sa Sakit Ng Ulo?

Mabilis na nauso ang paggamit ng essential oils (EO). Pinatotohanan ng mga gumagamit nito mula sa iba’t ibang bahagi ng mundo na marami nitong benepisyo sa kalusugan. Ngunit may gamot ba ang essential oil para sa sakit ng ulo? Kung oo, anong uri ng essential oil ang mabisa para sa sa sakit ng ulo? Alamin sa artikulong ito ang essential oil para sa sakit ng ulo.

Rosemary

Kilala ang rosemary EO sa mga mahuhusay nitong benepisyo sa buhok. Subalit may ilang ulat ang nagmungkahing ito ay nagpapaginhawa sa sakit ng ulo.

Natuklasan sa isang pag-aaral na ang rosemary ay parehong may anti-inflammatory at peripheral antinociceptive na gawain na nakatutulong upang mawala ang pamamaga at maibsan ang pananakit.

Sa iba pang imbestigasyon, binanggit ng mga mananaliksik na ang rosemary ay isang epektibong gamot para sa mga pananakit ng katawan at ulo, at maging sa pangingisay.

Lavender

Hindi na bago para sa atin ang mga nakapagpapagaling na epekto ng lavender. Dahil sa mga sangkap nitong nakapagpapababa ng stress at nakarerelaks, maraming mga produkto ang gumagamit nito tulad ng mga lotion at tsaa. Kaya kung ikaw nakararanas ng pananakit ng ulo dulot ng stress, maaaring ang lavender ang angkop na essential oil para sa iyo.

Narito ang magandang balita: maganda ring option ang lavender kung nakararanas ng pag-atake ng migraine.

Sa isang pag-aaral, naitala ng mga mananaliksik ang kabuoang 129 na migraine sa mga kalahok nito. Ang 92 sa mga kalahok ay gumaan ang pakiramdam nang langhapin ang lavender EO. Ito ang dahilan upang sabihin ng mga mananaliksik na ang lavender ay maaaring epektibo at ligtas na gamot para sa migraine.

Eucalyptus

Kilala na ang eucalyptus bago pa man maging sikat ang EOs bilang home remedy. Maraming vapor rubs, pain patches, at oil ang naglalaman ng eucalyptus dahil sa nakarerelaks nitong epekto. Nilalanghap din ng mga tao ang eucalyptus essential oil kung sila ay nakararanas ng baradong ilong dahil nakakatulong itong alisin ang bara.

Maaaring mainam na gamitin ang eucalyptus essential oil sa pananakit ng ulo na dulot ng baradong ilong.

Maliban sa pananakit ng ulo na dulot ng baradong ilong, ang eucalyptus ay maaari ding makatulong upang maibsan ang iba pang uri ng sakit sa ulo. Ayon sa isang ulat, ang eucalyptus oil ay ginagamit upang kontrolin ang maraming system ng katawan, tulad ng nervous system, para sa mga problema tulad ng neuralgia at pananakit ng ulo.

Chamomile

Ang mga taong gustong magrelaks at mawala ang kanilang stress ay kadalasang umiinom ng chamomile na tsaa. Ito ay dahil tulad ng lavender, ito ay kilala sa mga nakarerelaks nitong sangkap. Epektibo rin ang chamomile para sa mga nais matulong nang mahimbing.

Dahil dito, kung ikaw ay nakakaranas ng pananakit ng ulo dulot ng stress, pagkabalisa, o kakulangan sa tulog, ang paggamit ng chamomile essential oil ay maaaring makatulong sa iyo.

Gayunpaman, tandaan na wala pang pag-aaral tungkol sa kung paano ang chamomile essential oil ay direktang nakaaapekto sa sakit ng ulo.

Peppermint

Ang tension headache ay ang pinakakaraniwang uri ng sakit sa ulo na nararanasan ng mga tao. Kaya naman tinatawag ito bilang “everyday headaches.”

Kung ikaw ay nakararanas ng tension headache, isaalang-alang ang paggamit ng peppermint essential oil. Ayon sa isang ulat, ang karaniwang panggamot sa sakit ng ulo na peppermint oil ay tunay na mas epektibo kaysa sa placebo. Sinabi rin ng ulat na ito na ang epekto ng peppermint oil ay maihahambing sa paracetamol at acetylsalicylic acid.

Paano Gamitin Ang Essential Oil Para Sa Sakit Ng Ulo

Ito man ay para sa sakit ng ulo o iba pang mga problema sa kalusugan, narito ang ilang mga paraan sa paggamit essential oil:

Masahe

Upang magamot ang sakit ng ulo, ihalo ang essential oil na iyong piniling gamitin sa carrier oil (tulad ng coconut oil). Matapos nito, maaaring imasahe ang hinalong oil sa sentido o noo.

Tandaan: Huwag maglagay ng hindi hinalong oil nang direkta sa balat. Tandaan na ang EOs ay concentrated extracts; ang hindi hinalong EO ay maaaring makairita sa balat.

Paglanghap

Isa pang karaniwang paraan ng paggamit ng essential oil para sa sakit ng ulo ay ang paglalagay nang kaunting patak nito sa tissue paper atsaka ito ilagay sa ilalim ng ilong. Ang iba ay naglalagay ng kaunti pang patak nito sa isang mangkok ng mainit na tubig upang langhapin ang singaw nito.

Maaari ding isaalang-alang ang paggamit ng diffuser. Gayunpaman, maging maingat. May ilang EOs na maaaring maging sanhi ng sintomas sa respiratory, lalo kung may asthma o allergies. Dagdag pa, huwag sobrang gamitin ito.

Ang pag-diffuse ng EOs sa loob ng ilang oras ay maaaring hindi maganda para sa kalidad ng hangin sa loob ng silid o bahay. Magkaroon ng regular na pagtigil sa bawat paggamit, at siguraduhing ang bawat paggamit ay hindi tatagal sa loob ng 30 minuto.

Pagligo

Panghuli, maaaring magdagdag ng kaunting patak ng EO sa panligong tubig at magbabad dito sa loob ng ilang minuto.

Matuto pa tungkol sa Mga Halamang Gamot dito.