Ano ang Gamot sa Sipon? Alamin Dito

Ano ang gamot sa sipon?

Hindi pa rin nakakakita ng sagot ang mga eksperto kahit pa may mga pagbabago na sa larangan ng medisina.

Tinuturing ang sipon bilang isang maliit na impeksyon sa ilong at lalamunan – sa upper respiratory tract – na sanhi ng higit sa 200 na iba’t ibang mga virus. Ang rhinovirus ang pinakakaraniwang sanhi nito, na umaabot sa 10 hanggang 40 porsyento ng sipon. Kasama sa iba pang mga karaniwang sipon na virus ang coronavirus at respiratory syncytial virus.

Sanhi ng Sipon

Maaaring kumalat ang virus sa pamamagitan ng tao sa tao, o mga gamit papunta sa tao. Maaari kang magkaroon ng sipon mula sa mga droplet kapag umuubo o bumabahing ang taong may impeksyon. Maaari ding mabuhay ang virus sa kagamitan nang ilang araw.

Kung hinawakan ng taong may virus ang door knob, tasa, kutsara o tinidor, o laruan, at nagkataon na hinawakan mo rin ang parehong bagay, maaari mong makuha ang virus kapag humawak ka sa iyong ilong, bibig, o mata.

Mga Senyales at Sintomas ng Sipon

Karamihan sa matatanda ang magkakaroon ng sipon 2 hanggang 4 na beses sa isang taon. Habang magkakaroon naman ng humigit-kumulang anim hanggang 10 na beses ang mga bata, at posibleng mas marami pa kung wala pa sila sa anim na taon at nasa mga day care o child care.

Karaniwang tumatagal ng ilang araw ang mga sintomas ng sipon para lumabas pagtapos ng impeksyon. Narito ang mga senyales at sintomas ng sipon:

Mga sintomas sa ilong:

• Congestion (pamamaga/barado)
• Sinus pressure
• Tumutulong sipon
• Baradong ilong
• Pagkawala ng pang-amoy at panlasa
• Pagbahing
• Matubig na lumalabas sa ilong
• Postnasal drip o mucus na napupunta sa likod ng lalamunan

Mga sintomas sa ulo:

• Matubig na mata
• Sakit ng ulo
• Paos na boses
• Gasgas o namamagang lalamunan
• Ubo
• Namamagang mga lymph node

Mga sintomas sa buong katawan:

• Fatigue o pagkapagod
• Panlalamig
• Pananakit ng katawan
• Mababang lagnat
• Hindi mabuting pakiramdam sa dibdib
• Hirap huminga nang malalim

Sa karaniwan, tumatagal ng pito hanggang 10 araw ang sipon, ngunit maaaring mas maikli o mas matagal din ito depende sa kabuuang kalusugan ng isang tao. Kung tumagal o lumala ang mga sintomas, ito na ang oras para magpatingin sa doktor.

Ang paghahanap sa kung ano ang gamot sa sipon

Lubhang nakahahawa ang sipon, at isa rin ito sa pinakakaraniwang nakahahawang sakit sa mga tao. Maraming virus ang nagdudulot ng sipon, kabilang na ang mga coronavirus, at hindi nakagagawa ng panlaban ang katawan laban sa lahat ng ito. Ito ang dahilan kung bakit karaniwan ang sipon, at madalas na bumabalik.

Ngunit patuloy pa rin ang mga scientist sa paghahanap ng kung ano ang gamot sa sipon.

Bakit napakahirap gumawa ng gamot?

Sa kabila ng malalaking nadidiskubre para sa ikauunlad ng medisina, nananatili pa ring mailap ang gamot para sa sipon. May dalawang pangunahing rason dito:

• Hindi isang virus ang sanhi ng sipon. Rhinovirus ang sanhi ng karamihan sa mga sipon, isa itong malaking pamilya ng mga virus na may daan-daang variant. Ito ang dahilan kung bakit imposible ang pagbabakuna.
• Mabilis na nagbabago ang mga virus na ito. Kahit pa ang mga scientist, hindi sila makagawa ng mga bakuna na maaaring sumakop sa maraming uri ng rhinovirus dahil mabilis na lumalaban ang mga ito, kaya nawawalan din ng halaga ang mga bakuna.

Ang kahalagahan ng paghahanap ng gamot sa sipon

Para sa maraming tao, isang maliit na abala lamang ang pagkakaroon ng sipon. Ngunit may mabubuting dahilan para magpatuloy sa paghahanap ng pangkalahatang lunas sa sipon.

Kahit pa karamihan sa mga taong may sipon ang kinakaya ito, ang iba naman, gaya ng mga may asthma at chronic obstructive pulmonary disease, maaari silang makaranas ng mga seryosong problema sa kalusugan dahil sa mga komplikasyon mula sa sipon.

Gamot sa hinaharap

Isang potensyal na gamot ang nagmula sa proyekto nina Roberto Solari at Edward Tate sa Imperial College London, UK, at ng kanilang mga kasamahan. Noong umpisa, naghahanap ng compound ang grupo ng mga mananaliksik na lalaban sa protein na nakikita sa mga malaria parasite.

Nakatuklas sila ng dalawang molecule, at nadiskubre na ang dalawang ito ang pinakamabisa kapag magkasama. Pinagsama nila ang mga molecule gamit ang mga makabagong siyentipikong pamamaraan, at gumawa ng isang bagong compound na humaharap sa mga enzyme na nakikita sa mga cell ng tao, na tinatawag na N-myristoyltransferase (NMT).

Kinukuha ng mga virus ang NMT mula sa mga cell ng tao, at ginagamit ito upang gumawa ng shell na magiging proteksyon sa kanilang genetic information, na kilala bilang capsid.

Nabubuhay ang mga virus ng sipon dahil sa NMT. Kapag wala ito, hindi sila maaaring dumami at kumalat. Dahil gumagamit ng ganitong pamamaraan ang lahat ng mga uri ng sipon, ang pagpigil sa NMT ang hahadlang sa mga virus ng lahat ng uri ng sipon. Sinabi rin ng mga scientist na maaari itong gumana laban sa mga kaparehong virus, tulad ng mga nagdudulot ng sakit sa paa at bibig, at polio.

Bukod pa dito, hindi magiging isyu ang panlalaban ng virus dahil ang mga cell ng tao ang nilalabanan ng molecule imbis na ang virus.

Potensyal na Gamot

May potensyal para sa gamot na pinangalanang IMP-1088. Determinado ang mga scientist na makatutulong ang gamot na ito kung ibibigay nang maaga sa impeksyon. Kasalukuyan silang gumagawa ng bersyon nito na maaaring langhapin para mabilis itong makarating sa baga.

Nasubukan na rin dati ang iba pang mga gamot ngunit nakita na 100 beses na mas mabisa ang IMP-1088 kaysa sa mga nauna dito. Nakita rin na masyadong nakalalason ang mga naunang gamot. Habang hindi naman nakapipinsala ang IMP-1088 sa mga cell ng tao. Ganoon pa man, kinakailangan pa rin ng higit pang pag-aaral para masiguro ang kaligtasan ng gamot.

Gamot at Pag-iwas sa Sipon

Habang ginagawa ang isang gamot, wala tayong ibang magagawa kundi gamutin ang mga sintomas ng sipon. Nahahati sa dalawang pangunahing kategorya ang mga gamot sa sipon:

• Mga over-the-counter (OTC) na gamot – kabilang dito ang mga decongestant, antihistamine, at pain reliever, o kumbinasyon ng tatlo. Siguraduhing basahin ang label para matukoy ang tamang dosage para sa iyong kondisyon.
• Mga remedy sa bahay – kabilang sa pinakaepektibo at karaniwang remedy sa bahay ang pagmumumog ng maalat na tubig, pagpapahinga, at hydration. Hindi man magagamot ng mga halamang gamot, mineral, at iba pang produkto gaya ng echinacea, eucalyptus, bawang, honey, lemon, menthol, zinc, at vitamin C ang sipon, ngunit maaari din naman sila magbigay ng kaunting ginhawa.

Kahit pa mukha itong mahirap, mayroon din namang mga paraan para maiwasan ang impeksyon. Maaaring makatulong ang mga rekomendasyon na ito:

• Iwasan ang paglapit sa mga taong may sipon, lalo na sa mga unang araw. Ito ang panahon kung saan pinakamataas ang posibilidad na maikalat ang impeksyon.
• Magsanay ng mabuting kalinisan sa kamay. Maghugas palagi ng kamay, lalo na pagtapos hawakan ang taong may sipon, pagkatapos hawakan ang isang bagay na nahawakan nila, at pagkatapos suminga sa ilong.
• Hugasan ang mga bagay na maaaring nahawaan. Kung may sipon ang isang miyembro ng pamilya, mag-disinfect ng mga bagay na madalas hawakan, gaya ng doorknob, remote control, baso, kubyertos, at mga laruan.
• Iwasan hawakan ang iyong ilong, mga mata, at bibig para maiwasan ang impeksyon.
• Subaybayan ang humidity ng kapaligiran, para hindi matuyo ang mga sinus.
• Magsanay ng mabuting kalinisan sa respiratory. Takpan ng tissue ang iyong ilong at bibig kapag umuubo o bumabahing. Lumayo o limitahan ang paglapit sa mga taong madali lapitan ng sakit, kabilang na ang mga may asthma o isa pang chronic lung disease.

Key Takeaways

Hanggang kamakailan, pinaniniwalaan na hindi makagagawa ng isang bakuna para makapagbigay ng proteksyon mula sa iba’t ibang virus na nagdudulot ng sipon.

Ngunit isang bagong pananaliksik ang dumating, maaari itong makatulong sa pagkakaroon ng isang bakuna para sa karamihan ng uri ng mga sipon. Abot-tanaw na ang gamot sa sipon sa hinaharap, ngunit mahaba-haba pa rin ang kailangan pagdaanan.

Matuto pa tungkol sa sipon dito.