Ubo Sa Gabi, Ano Ang Mabisang Solusyon Para Dito?

.Ang pagkakaroon ng ubo sa gabi ay isang discomfort na iniiwasan natin dahil mahalaga ang pagtulog upang makabawi ng lakas ang ating katawan. Ngunit paano tayo makakakuha ng magandang kalidad ng pagtulog kung inuubo tayo at hindi natin ito makontrol? Basahin at alamin mo sa artikulong ito kung paano ihinto ang hindi mapigilang pag-ubo sa gabi at kung bakit nagaganap ito.

Ano Ang Mga Dahilan Ng Hindi Mapigilang Ubo Sa Gabi?

Totoong sobrang nakakaabala para sa atin ang hindi makontrol na pag-ubo lalo na kapag paulit-ulit itong nangyayari. Dahil maaaring magresulta ito ng mga negatibong epekto sa iyong kalusugan na pwede mong ikapahamak.

Ayon sa mga doktor, ang pag-ubo ay isang paraan upang maalis ang foreign particles, irritant, at fluids mula sa’yong respiratory system.

Maraming mga isyu sa kalusugan at kapaligiran ang maaaring mag-trigger ng iyong pag-ubo at narito ang ilan sa mga dapat mong malaman:

• Mga allergy — Ang allergies ay isa sa karaniwang sanhi ng ubo ng tao at madalas nakukuha ang allergy sa iba’t ibang anyo, mula sa hay fever hanggang sa allergic reactions sa alikabok.
• Runny nose — Ang runny nose ay mula sa komon na sipon, sinusitis, at trangkaso kung saan pwedeng humantong ito sa sa uhog na nangingiliti sa iyong lalamunan kaya ka nauubo.
• Hika — Pwedeng magpasikip ng air tubes sa baga ang hika na kinalaunan ay maaaring humantong sa pag-build up ng uhog at maging sanhi para mahirapan ka sa paghinga.
• GERD — Ang acid mula sa gastroesophageal reflux disease (GERD) o heartburn ay maaaring makaapekto sa iyong passage mula sa tiyan patungo sa bibig.
• Paninigarilyo — Maraming toxin ang pwedeng makuha ng ating baga dahil sa paninigarilyo at upang maialis ito lumilikha ang katawan ng pag-ubo para matanggal ang mga dumi sa daanan ng hangin.
• Pag-inom ng gamot para sa blood pressure — Kung gumagamit ka ng ilang mga gamot para makontrol ang presyon ng dugo maaaring humantong ito sa patuloy na pagkakaroon ng tuyong ubo.

Ang pag-ubo ay isang normal at tipikal na tugon ng ating katawan para maalis ang mga dumi sa atin. Ngunit, mayroong mga pagkakataon na nagiging problema ito dahil sa discomfort at sakit na dulot ng pag-ubo sa gabi. Maaaring makagambala ito sa iyong pagtulog at humantong sa maraming health complication.

Paano Ihinto Ang Hindi Mapigilang Ubo Sa Gabi

Ang hindi mo makontrol na pag-ubo ay pwedeng magdulot ng iritasyon. At sa ilang malalang kaso maaaring makagambala ito  pang-araw-araw na paggana mo.

Ipagpatuloy mo ang pagbabasa sa artikulong ito para sa tips na pwede mong subukan para mabawasan ang iyong ubo sa gabi.

1. Gumamit ng mga humidifier o vaporizer

Kapag ang humidity level ng isang silid ay bumaba sa 30% pwedeng magresulta ito sa tuyong hangin. Ang tuyong hangin mula sa air conditioning o heating system ay maaaring magpalala ng iyong ubo sa gabi. Para labanan ito magsaksak ka ng cool-mist humidifier o steam vaporizer para mapataas ang moisture level sa’yong kuwarto. Maaari kang magdagdag ng essentials oils upang magkaroon ng aromatherapy at makatulong sa pagpawi ng iyong ubo.

Ipinakita ng iba’t ibang pag-aaral na ang eucalyptus, cinnamon, rosemary, nutmeg, cypress, thyme, geranium, peppermint, at lavender ay maaaring makatulong sa ilang mga problema sa paghinga, kabilang ang pag-ubo.

Lumilikha ang mga humidifier ng mist mula sa malamig o room-temperature water. Ang vaporizers naman ay nagpapainit ng tubig at inilalabas ito bilang singaw. Ang mga humidifier ay mas mahusay para sa mga tahanan na mayroong mga bata at matatandang magulang dahil ang matinding init ng vaporizer ay pwedeng magdulot ng mga aksidente.

Ngunit mahalagang tandaan mo pa rin na ang sobrang kahalumigmigan ay maaari ring maging dahilan ng pagkakaroon ng amag sa paligid at mga bagay. Ang amag ay isang allergen na pwedeng mag-trigger ng pagkakaroon mo ng allergic reactions at pag-ubo.

2. Alisin ang allergens

Makakatulong para sa’yo kung matatanggal ang allergens na nagdudulot ng pag-ubo sa gabi. Tulad na lamang ng amag, alikabok, o buhok ng alagang hayop.

Narito ang ilan sa pwede mong gawin para maalis ang allergens:

• Regular na mag-vacuum gamit ang High Efficiency Particulate Air (HEPA) filtration. Dahil ang filter na taglay nito ay nakakakuha ng microscopic allergens. Ligtas itong gamitin at madali mong maitatapon ang allergens at dumi pagkatapos maglinis.
• Itapon ang mga libro, magasin, at iba pang bagay na maaaring makakolekta ng alikabok. Magtabi ka na lamang ng mga libro at magazine kung kinakailangan. Ngunit siguraduhin na regular itong punasan para alisin ang mga alikabok sa mga bagay na ito.
• Regular na palitan ang mga kumot at hugasan ang mga gamit sa mainit na tubig. Makakatulong ito sa pagpatay ng bakterya, amag, at iba pang mga virus.
• Maligo bago ka matulog upang alisin ang allergens na maaaring dumikit sa iyong balat at damit.

3. Manatiling hydrated at paginhawahin ang namamagang lalamunan

Bilang karagdagan sa pagligo at paglilinis ng katawan bago matulog, mayroon pang isang tip sa kung paano itigil ang hindi mapigilang ubo sa gabi. Ito ay ang pagpapanatiling hydrated ng iyong bibig at lalamunan.

Kung hindi mo gusto ang tsaa, maaari kang magmumog ng maligamgam na tubig na hinaluan ng asin. Ito ay upang mapawi ang makating lalamunan at mailabas ang plema.

Ang mainit na tsaa o lemon water na may honey ay isang traditional remedy para sa makati o tuyong lalamunan. Napatunayang mabisang sangkap ang honey sa pagpapagaan ng ubo. Gayunpaman, huwag magbigay ng honey sa mga sanggol na wala pang isang taong gulang. Ito ay pwedeng magdulot ng pagkakaroon ng food poisoning.

4. Itaas ang iyong ulo para walang maging harang sa paghinga

Para magkaroon ka ng maayos na paghinga sa pagtulog, mainam na itaas mo ang iyong ulo gamit ang ilang unan. Isa itong mabisang paraan kung paano mapipigilan ang hindi makontrol na pag-ubo sa gabi. Lalo na kung ang iyong kondisyon ay sanhi ng karaniwang sipon. Sa pamamagitan kasi ng pamamaraan na ito pinapayagan nitong dumaloy ang uhog mo sa throat nang hindi naiirita ang iyong lalamunan.

Paano Ihinto Ang Hindi Mapigil Na Pag-Ubo Sa Gabi: Mga Interbensyong Medikal

Kung ang iyong pag-ubo ay lumala at ang home remedies ay hindi na epektibo, isaalang-alang ang pag-iskedyul ng isang konsultasyon sa’yong doktor.

Ang doktor ay maaaring magreseta ng mga over-the-counter na gamot sa ubo, tulad ng mga cough suppressant at expectorant. Malaki ang naitutulong ng mga ito dahil ang cough suppressant ay mabuti para sa mga tuyong ubo. Ang mga expectorants naman ay tumutulong sa pag-alis ng uhog.

Pwede ring iresata ng doktor ang saline spray upang mabawasan ang pagkatuyo ng iyong lalamunan.  Napahihina rin nito ang uhog kung ikaw ay may sipon, at maalis ang allergens at iba pang mga irritant na nakakulong sa’yong ilong.

Kung ikaw ay may hika, pwedeng irekomenda sa’yo ang paggamit ng de-resetang inhaler. Ito ay tutulong sa’yo para mas madali kang makahinga.

Paalala

Tandaan mo na kahit ang ilang gamot ay makukuha nang walang reseta, mas mabuting kumunsulta sa iyong doktor. Ito ay upang talakayin ang iba’t ibang gamot at uri ng treatment kung paano mapipigilan ang hindi makontrol na pag-ubo sa gabi.

Matuto nang higit pa tungkol sa Kalusugan sa Respiratory dito.