Alamin: Ano Ang Pinagkaiba Ng Vertigo At Motion Sickness?

Maraming tao ang patuloy na nalilito sa pagkakaiba ng vertigo at motion sickness dahil sa ilang mga sintomas nila na magkakatulad. Napakahalaga na malaman ang pagkakaiba ng dalawang ito upang mas maging maliwanag sa atin kung paano natin iiwasan ang pagkakaroon ng vertigo at motion sickness. Ang mga sakit na ito ay pwede nating maranasan sa kahit saang lugar, sitwasyon, at panahon, kaya ipinapayo sa atin na magkaroon ng kamalayan tungkol sa dalawang kondisyon na ito.

Pero bago natin alamin ang pagkakaiba ng vertigo at motion sickness, tukuyin muna natin ang mga bagay na pwedeng maranasan sa pagkakaroon ng mga kondisyong ito.

Ano Ang Vertigo?

Kapag ang isang tao ay nahihilo na tila gumagalaw o umiikot ang kanyang buong paligid, maaaring nakararanas siya ng vertigo. Sa kondisyong ito, pwede ka ring mawalan ng balanse sa’yong sarili.

Marami ang pwedeng maging sanhi ng vertigo, dahil ito ay posibleng sintomas ng iba’t ibang medikal na kondisyon. Dagdag pa rito, ang isa sa kadalasang rason kung bakit nagkaka-vertigo ang isang tao ay dahil sa pagkakaroon niya ng problema sa kanyang inner ear.

Ano Ang 2 Uri Ng Vertigo?

Peripheral vertigo – Ito ang pagkahilo at pagkawala ng balanse dahil sa problema sa inner ear.
Central vertigo – Nagaganap ito kapag mayroong isyu sa ating utak gaya ng impeksyon, tumor, stroke, at traumatic brain injury.

Anu-Ano Ang Mga Posibleng Dahilan Ng Vertigo?

Acoustic neuroma
Head injuries
Ear surgery
Benign paroxysmal positional vertigo (BPPV)
Labyrinthitis
Syphilis
Cholesteatoma
Meniere’s disease
Migraine
Vestibular neuritis
Mababang presyon ng dugo
Diabetes
Sakit sa utak

Anu-Ano Ang Karaniwang Sintomas Ng Vertigo?

Pagsakit ng ulo
Pagkahilo
Pagsusuka
Kawalan ng balanse
Pagkakaroon ng parang tumutunog sa loob ng iyong tenga
Pagkakaroon ng pakiramdam na para bang puno ang iyong tenga

Motion Sickness

Ang pagkakaroon ng vertigo at motion sickness ay maituturing na parehong balance disorder, kung saan maaari mong maramdaman na wala ka sa iyong balanse. Dagdag pa rito, kadalasan na nararamdaman ang motion sickness sa loob ng umaandar ng mga sasakyan gaya ng bus, kotse, barko, eroplano, at iba pa.

Anu-Ano Ang Mga Posibleng Dahilan Ng Motion Sickness?

Pagsakay sa mga nakakalulang rides gaya ng ferris wheel
Pagsakay sa mga sasakyan
Sobrang paglalaro ng video games
Labis na panonood ng TV
Pagbabasa ng libro habang gumagalaw o nasa motion
Pagkakaroon ng family history ng motion sickness
Paggamit ng hormonal birth control
Pagkakaroon ng menstruation period
Migraine
Parkinson’s disease
Pagbubuntis

Anu-Ano Ang Karaniwang Sintomas Ng Vertigo?

Pagkakaroon ng malamig na pawis
Pagkapagod
Pagkahilo
Pagsakit ng ulo
Pagiging iritable
Kawalan ng kakayahan na magpokus
Pagtaas ng laway
Pagsusuka
Pagduduwal
Maputlang mukha o balat
Mabilis na paghinga o paglunok para sa hangin

Pagkakaiba Ng Vertigo At Motion Sickness

Bagamat parehong sangkot ang pagkahilo sa dalawang kondisyon na ito, mayroon pa rin silang pagkakaiba na dapat mong malaman.

Ang vertigo ay ang pagkahilo o pakiramdam na para bang umiikot ang iyong buong paligid na pwedeng may kasamang sobrang pagpapawis, pagsusuka, at pagkakaroon ng abnormal na paggalaw ng iyong mga mata. At ang motion sickness naman ay ang pagkahilo dulot ng pagsakay sa mga sasakyan at pagkakaroon ng pakiramdam na para bang wala ka sa iyong balanse.

Key Takeaways

Ang pag-alam sa pagkakaiba ng motion sickness at vertigo ay makakatulong sa’yo upang maiwasan ang mga bagay na pwedeng magdulot ng pagkahilo. Huwag mo ring kakalimutan na sa oras na napapadalas na ang iyong pagkahilo ay magpakonsulta na agad sa doktor para mabigyan ka ng angkop na medikal na atensyon, na nakaayon sa iyong kasalukuyang kondisyon at pangangailangan. Hindi ka rin dapat maging padalos-dalos sa’yong paggamot na isasagawa sa sarili lalo na kung ikaw ay nahihilo, mas maganda kung magiging sigurado ka muna sa ugat ng iyong pagkahilo para sa pagkakaroon ng wastong treatment. At para makuha ito, mahalaga na makipag-usap o kumonsulta ka sa iyong doktor para maiwasan ang maling paggamot at medikal na komplikasyon.

Matuto pa tungkol sa Ear Conditions dito.