Gamot sa Bungang Araw: Home Remedies na Maaaring Subukan

Ang prickly heat rash o miliaria ay isang uri ng butlig na nabubuo kapag ang pawis ay bumabara sa loob ng balat. Sa Pilipinas, karaniwang tinatawag na bungang araw.

Gamot sa Bungang Araw

Karamihan sa kaso ng bungang araw ay maaaring malunasan sa bahay. Kung sakali’y nagkaroon ng bungang araw ang anak mo, tandaan ang mga sumusunod:

Paliguan Sila ng Malamig na Tubig

Isa sa mga epektibong gamot sa bungang araw ay isang pagligo gamit ang malamig na tubig. Tandaan lang na dapat hindi sobrang lamig at tama lang ang temperatura ng tubig. Ito’y dahil ang bungang araw ay nangyayari kapag masyadong naiinitan ang mga bata. Siguraduhing  feeling fresh sila upang ibsan ang rashes nila.

Kapag pinapaliguan ang iyong anak, pinakamainam na iwasan ang matapang na soaps o cleansers. Maliban dito, siguraduhing tuyuin sila nang lubusan pagkatapos maligo. Tandaan: ang mamasa-masang balat ay maaari ding maging irritated.

Importante ring tandaan na kahit na kumakalma ang bata sa paliligo, huwag masyadong madalas ang pagligo. Ito’y dahil maaari nitong tanggalin ang natural na skin moisture at gawin silang mas prone sa irritation. Kapag tag-init, ang pagligo na dalawang beses sa isang araw ay sapat na.

Iwasan ang Pagpapawis

Isa sa mga best remedies para sa prickly heat rash ay ang pag-iwas sa pagpapawis. Pero ang ma-achieve ito ay challenging dahil ang mga bata’y madalas na gustong maglaro.

Dahil dito, mag-isip ng mga iba pang indoor activities na hindi sila papawisan. Mga halimbawa nito’y pagbigay sa kanila ng librong maaaring basahin at art materials na maaari nilang gamitin sa drawing o painting. Puwede rin silang hayaang manood ng nakakaaliw at educational na TV shows; mag-ingat lamang na huwag lumagpas sa recommended screen time for kids.

Maaari mo ring gawin ang mga ito upang maiwasan ang pagpapawis:

• Hayaan silang manatili sa well-ventilated o air-conditioned na kuwarto. Iwasan ang sun exposure.
• Alisin ang excess na damit. Ang best choice ay damit na gawa sa cotton dahil light at breathable ito.
• Panatilihing presko ang kanilang sleeping area; alisin ang makakapal na kumot at kuchon.

Gumamit ng Cool at Damp na Tela

Kapag naging iritable ang iyong anak dahil sa masyadong makati na rash, dampian lamang ng cool, damp cloth ang kanilang balat. Matapos nito, pahanginan lamang ang area. Hindi na kailangang gumamit ng iba pang tuwalya upang i-dry ang balat.

Iwasang Maglagay ng mga Skincare Products

Kahit na nakaka-tempt na ituloy ang skincare routine ng iyong anak, hindi nirerekomenda ng mga eksperto ang lotions at creams sa mga batang may bungang araw. Ang mga produkto na ito ay maaaring magbara sa sweat ducts at magdulot ng irritation.

Pero maaari din namang gamitin pa rin ito kung i-recommend ng doktor ang particular na produkto bilang gamot sa bungang araw. Ang mga halimbawa nito ay calamine lotion at low-strength hydrocortisone cream.

Senyales na may Bungang Araw ang Iyong Anak

Madalas madali lamang ma-recognize ang bungang araw. Hindi lamang madaling ma-identify ang sintomas nito, pero marami rin sa atin ang familiar na sa kanila.

Kung may bungang araw ang iyong anak, maaaring mag-complain sila dahil sa pangangati. At kapag tinignan mo ng malapitan, maaaring mapansin mo na ang affected area ay may maliliit na bukol na mukhang pimples.

Para sa iba, ang mga bukol na ito’y maaaring magsugat kung kaya’t madalas silang ma-irritate.

Kahit na kumakalat ang bungang araw sa katawan, ang bungang araw ay hindi nakakahawa. Ang rashes ay madalas lumalabas sa likod, dibdib, leeg, at balikat.

Kailan Dapat Kumunsulta sa Doktor?

Hindi na kumukonsulta sa mga doktor para sa bungang araw dahil sapat na ang mga home remedies. Pero kung nakaranas ng labis na pangangati, kumonsulta para sa tamang gamutan.

Kumonsulta na rin sa doktor kung:

• Ang mga butlig ay may nana sa loob
• May magang lymph nodes
• Masamang pakiramdam
• Ang butlig ay tumagal ng higit sa tatlong araw
• Ang mga butlig ay mas mapula, mas maga, at mas mainit
• Nagkaroon ng lagnat

Alamin ang latest news and updates sa Child Skincare dito.