Eye Exam Para Sa Bata: Heto Ang Dapat Mong Malaman

Mahalaga ang eye exam para sa bata dahil ang ilang problema sa paningin na maagang lumalabas ay pwedeng magpatuloy habambuhay. Kailan ang pinakamainam na panahon upang gawin ang pediatric eye exam, at paano ito paghahandaan ng mga magulang?

Eye Exam Para Sa Bata: Vision Screening Vs. Comprehensive Eye Exam

Bukod sa vision screening, na tutukuyin din natin bilang pediatric eye exam, maaari ding narinig mo na ang comprehensive eye exam. Ano ang pinagkaiba ng dalawang ito?

Ang vision screening ay isang uri ng eye exam kung saan ang bata ay sinusuri upang malaman kung may mga problema siya sa paningin. Kapag bumagsak sa vision screening ang isang bata, ibig sabihin nito na may napansin ang healthcare practitioner na problema o nakakita siya ng isang bagay na kailangan ng mas malalim pang pagsusuri. Ito ngayon ang panahong kailangan na ng iyong anak ng comprehensive eye exam, na may layuning matukoy ang mga sakit sa mata.

Sa isang comprehensive eye exam, gagamit ang optalmologo (doktor sa mata) ng eye drops upang lumuwag ang balintataw (pupil) ng bata. Ito ang magbibigay sa doktor ng pagkakataong makita nang lubos ang mga mata, at magiging mas madali nang makita ang mga senyales ng mga sakit sa mata.

Ang bottom line ay ito: maaaring hindi kailangan palagi ng iyong anak ang comprehensive eye exam maliban kung inirekomenda na ng doktor. Gayunpaman, kailangan ng maliit mong anak ang napapanahon at regular na pediatric eye exam.

Ang Inirerekomendang Iskedyul Para Sa Vision Screening

Hinihikayat ng American Association for Pediatric Ophthalmology and Strabismus at ng American Academy of Ophthalmology ang mga magulang na gamitin ang iskedyul para sa vision screening:

• Bagong panganak: Pagkaraang ipanganak ang iyong baby, titingnan ang fundamental indicators ng kalusugan ng mata.
• Bago ang kanilang unang kaarawan: Ang pangalawang eye exam para sa bata ay kailangang mangyari sa pagitan ng 6 at 12 buwan. Pwede nang tingnan ng doktor ang galaw at healthy alignment ng mga mata.
• Sa pagitan ng 12 at 36 na buwan: Sa kanilang pangatlong pediatric eye exam, maaaring sumailalim ang iyong anak sa photo screening. Gumagamit ng espesyal na kamera upang tingnan ang ilang factors na nagpapataas ng panganib ng problema sa paningin, tulad ng refractive errors.
• Sa pagitan ng 3 at 5 taon: Sa panahong ito, maaaring gumamit na ng chart ang doktor upang suriin ang talas ng paningin ng iyong anak. Titingnan din niya kung may mga sintomas ng lazy eye at farsightedness.
• 5 taon pataas: Titingnan ng doktor kung may mga senyales ng misalignment at nearsightedness — mga pinakakaraniwang problema sa paningin sa age group na ito.

Sakaling walang makitang problema ang doktor, malamang na susundin mo ang iskedyul na nabanggit sa itaas. Gayunpaman, maaaring i-require ng doktor na kailangang sumailalim sa mas madalas na screening o sa comprehensive eye exam ang iyong anak kapag may napansin silang problema.

Paano Paghahandaan Ang Eye Exam Para Sa Bata

Handa ka na bang dalhin ang iyong anak sa doktor para sa vision screening? Kung gayon, makatutulong ang mga sumusunod na paalala:

1. Huwag ipagpaliban ang vision screening ng iyong anak.

Ang unang tip ay huwag ipagpaliban ang eye exam para sa bata. Tandaan na kung mas maagang malalaman ang problema, mas maaga ring mareresolba o makokontrol ito.

Kung wala kang kilalang optalmologo sa ngayon, huwag mag-alala. Pwedeng suriin ng inyong family physician o ng inyong pediatrician ang paningin ng iyong anak.

2. Ihanda ang mahahalagang detalye.

Bago magpunta sa doktor, tiyaking nakahanda na ang mahahalagang impormasyon na kailangan. Ang mga halimbawa ng dapat isulat ay:

• Kasalukuyang problemang pangkalusugan ng iyong anak
• Kung may allergies siya
• Operasyong kanyang pinagdaanan
• Listahan ng mga gamot na kanyang iniinom
• Mga resulta o record ng nakalipas na eye exam
• Family history, lalo na tungkol sa kondisyon sa mata

3. Isulat ang mga tanong na nais mong malaman.

Ang eye exam para sa bata ay ang pinakamagandang oras upang makapagtanong tungkol sa kalusugan ng mata ng iyong anak. Halimbawa, pwede mong tanungin ang inyong doktor tungkol sa mga sintomas na nararanasan ng iyong anak. Kung may napapansin kang kakaiba sa mata/paningin ng iyong anak, pwede mong linawin kung normal pa ba ito o hindi.

Gayunpaman, mas maraming tanong ang maaaring lumitaw pagkatapos ng vision screening. Ilan sa mga bagay na pwede mong itanong ang:

• Ano ang diagnosis?
• Magiging maayos pa ba ang kondisyon niya?
• Paano nito maaapektuhan ang paningin ng anak ko?
• Paano ko malalaman kung tumatalab ba ang gamutan?
• Kailan kami ulit babalik para sa check-up?

4. Maaaring mag-iba ang pamamaraan ng screening.

At huli, pakitandaan na bagaman ang pamilyar na hitsura ng isang eye exam ay ang Snellen chart (chart na may iba’t ibang laki ng letra), ang paraan ng pagsusuri ay magkaiba. Nakadepende sa edad at kakayahan ng bata ang paraang isasagawa. Pwedeng pakitaan ng mga larawan o bigyan ng laruan ang mga mas batang edad na hindi pa nakapagbabasa.

Habang isinasagawa ang eksaminasyon, maaaring gumamit ang isang doktor ng ophthalmoscope, isang kagamitang naglalabas ng liwanag kapag itinapat sa mata. Manatiling kasama ng iyong anak upang hindi siya matakot o mabalisa.

Matuto pa tungkol sa Kalusugan ng Bata dito.