Esophageal Cancer: Mga Senyales At Sintomas

Ang esophagus ay ang hollow na tubo na nagsisilbing daanan ng pagkain at liquid mula sa bibig hanggang sa tiyan. Ang esophageal cancer ay nangyayari kung ang cells ng esophagus ay nagsimulang lumaki nang hindi makontrol.

Kung nagsimulang kumalat ang esophageal cancer, lumalagpas ito sa lining ng esophagus at kumakalat sa malapit na lymph nodes. Kapag ang cancer cells ay pumasok sa lymphatic system, maaari itong makarating sa buong katawan.

Maaaring kakitaan ng ilang mga limitadong sintomas ang esophageal cancer o kaya’y maging asymptomatic sa mga unang yugto nito. Nagiging dahilan ito upang maging mahirap ma-diagnose at magamot ang sakit na ito. Alamin sa artikulong ito ang iba pang mga kaalaman sa esophageal cancer.

Kaalaman Sa Esophageal Cancer: Mga Uri Nito

Adenocarcinoma

Nangyayari ito sa lining ng ibabang bahagi ng esophagus na malapit sa tiyan kung saan napo-prodyus ang mucus. Ang mucus na ito ay nakatutulong sa pagdaan ng pagkain.

Squamous Cell Carcinoma

Nagsisimulang lumaki ang cancer cells sa flat cells na makikita sa loob na layer ng esophagus.

Kaalaman Sa Esophageal Cancer: Mga Mapanganib Na Salik

Kadalasang nangyayari ang esophageal cancer sa mga kalalakihang edad 50 taong gulang pataas. Ang mga taong naninigarilyo at labis na umiinom ng alak ay maaari ding may mataas na tyansang magkaroon ng esophageal cancer. Ang mga taong obese o kulangan sa nutrisyon ay may tyansa ring magkaroon nito.

Kabilang ang mga sumusunod ang kondisyong nakapagpapataas ng tyansa ng pagkakaroon ng esophageal cancer:

• Gastroesophageal reflux disease (GERD). Ito ay nangyayari kung ang liquid mula sa tiyan ay bumalik sa bibig na nagiging sanhi ng burning sensation sa dibdib (heartburn).
• Barrett’s esophagus. Ang Barrett’s esophagus ay isang komplikasyon ng GERD. Ang cells sa esophagus ay nagbabago upang maging kamukha ng cells na bumubuo sa intestine dulot ng matagal na pagkakalantad sa acid mula sa tiyan.
• Achalasia. Ang Achalasia ay isang kondisyon kung saan ang nerves ng esophagus ay nasisira at napaparalisado, na nagpapahirap upang ang pagkain ay bumaba sa tiyan.

Nauugnay sa esophageal cancer ang mga genetic na sakit tulad ng Bloom syndrome, Fanconi anemia, at Howel-Evans syndrome.

Kaalaman Sa Esophageal Cancer: Mga Sintomas

Sa mga unang yugto, ang mga sintomas ng esophageal cancer ay maaaring mapagkamalan bilang iba pang mga kondisyon tulad ng GERD. Kadalasang lumulubha ang mga sintomas habang lumalala ang cancer.

Kabilang sa mga sintomas ang mga sumusunod:

• Kahirapan sa paglunok
• Pananakit sa dibdib
• Heartburn
• Hindi maipaliwanag na pagbaba ng timbang
• Patuloy na pag-ubo
• Dugo sa dumi
• Pagsuka ng dugo
• Paghina ng gana sa pagkain
• Hindi pagkatunaw ng kinain
• Bukol sa ilalim ng balat sa dibdib

Ang esophageal cancer ay maaaring kumalat sa ibang mga bahagi ng katawan na maaari ding magdulot ng iba’t ibang sintomas depende sa apektadong organ. Maaaring kabilang sa mga sintomas ang mga sumusunod:

Kaalaman Sa Esophageal Cancer: Diagnosis

Magsasagawa ang doktor ng pisikal na pagsusuri para sa anomang mga bukol lalo na sa itaas na bahagi ng gastrointestinal tract. Isasaalang-alang din ang mga salik sa paraan ng pamumuhay at medical history. Ang mga pagsusuring isasagawa na makatutulong sa pag-diagnose ng esophageal cancer ay kinabibilangan ng mga sumusunod:

• Barium Swallow. Ang pasyente ay iinom ng barium upang ang contours ng esophagus ay mas makita sa x-ray. Ang esophagus ay karaniwang makinis ngunit kung ang x-ray ay kakitaan ng anomang abnormalidad, ito ay maaaring senyales ng cancer.
• Esophagoscopy. Ang isang tubo na may camera ay padaraanin sa esophagus ng pasyente at makiikita ang mga larawang may mataas na resolution upang mas masusing tingnan ng doktor ang panloob na layer ng esophagus.
• Biopsy. Habang isinasagawa ang esophagoscopy, kukuha ang doktor ng sample ng esophageal tissue. Ang tissue ay susuriin sa ilalim ng microscope para sa mga senyales ng cancer.

Bukod sa X-ray, isasagawa din ang iba pang imaging test tulad ng CAT, MRI, at PET scan lalo na kung may hinala na ang esophageal cancer ay kumalat na sa iba pang bahagi ng katawan.

Kaalaman Sa Esophageal Cancer: Gamutan

Ang esophageal cancer ay lumulubha at nagiging sanhi ng kamatayan lalo na kung ito ay na-diagnose sa mga huling yugto nito. Kung mas maaga ang diagnosis at paggamot, mas mataas ang tyansa ng pag-recover. Ang paggamot ay depende sa yugto ng kanser at sa uri ng esophageal cancer.

Maaaring kabilang sa gamutan ang mga sumusunod:

• Operasyon. Maaaring kabilang dito ang isang esophagectomy, ang proseso  ng pagtanggal ng lahat o ng bahagi ng esophagus. Ang lymph nodes na maaaring naimpeksyon at ang isang bahagi ng tiyan ay maaari ding alisin upang mapigilan ang pagkalat ng cancer.
• Radiation therapy. Ang beam radiation ay itinututok sa tumor upang makagambala sa paghahati at paglaki ng cancer cells.
• Chemotherapy. Ang mga gamot ay ipinaiinom o itinuturok upang patayin o pigilan ang paglaki ng cancer cells. Sa ilang mga pagkakataon, ginagamit ang chemotherapy upang bawasan ang laki ng tumor bago ang operasyon.
• Supportive Care. Ang mga taong apektado ng terminal esophageal cancer ay maaaring piliin ang palliative care. Maaari silang tumanggap ng mga gamutang maaaring maibsan ang sakit at mabawasan ang kalubhaan ng mga sintomas.

Ang mga taong apektado ng esophageal cancer ay maaari ding piliing lumahok sa clinical trials na makatutulong sa pananaliksik sa cancer.

Matuto pa tungkol sa Cancer dito.