Ano Ang Endometrial Hyperplasia, At Maaari Ba Itong Magdulot Ng Cancer?

Madalas nating marinig na ang mga kababaihan ay nagkakaroon ng cancer sa suso, obaryo, o maging sa cervix. Subalit ang tungkol sa endometrial cancer ay bihira nating marinig. Sa ikatlo at huling episode ng #HelloHealthHeroes series na kaugnay ng Pandaigdigang Araw ng Cancer, ibinahagi ng make-up artist at trainer na si Geraldine Gayoso Carlos ang kanyang sariling karanasan kung paano niya nilabanan ang cancer at endometrial hyperplasia with atypia. Subalit ano ang endometrial hyperplasia? Alamin sa artikulong ito.

Ano Ang Endometrial Hyperplasia?

Ang endometrial hyperplasia ay isang kondisyon kung saan ang endometrium — ang layer ng cells na nagbibigay ng lining sa uterus — ay hindi normal na lumalaki. Ito ay nauuri sa apat na iba’t ibang uri:

• Simple endometrial hyperplasia
• Complex endometrial hyperplasia
• Simple endometrial hyperplasia with atypia
• Complex endometrial hyperplasia with atypia

Ang bawat isa sa mga ito ay naiiba-iba batay sa kung gaano kalubha ang abnormalidad ng cells at kung ano ang tyansang lubha at maging cancer.

Ano Ang Endometrial hyperplasia? Kaugnayan Nito Sa PCOS

Sa edad na 18 taong gulang, si Geraldine ay na-diagnose na ng polycystic ovary syndrome o mas kilala bilang PCOS. Simula noon, siya ay sumasailalim na sa ilang gamutan tulad ng hormonal pills at contraceptive pills upang maging normal ang kanyang pagreregla. Gayunpaman, habang lumilipas ang panahon ay hindi niya naramdamang siya ay kakaiba kahit na nakararanas siya ng mabigat na daloy ng regla sa loob ng 21 araw kada buwan. May mga buwan ding ang kanyang regla ay lumalagpas sa 30 araw. Ito ang naging dahilan upang siya ay magpakonsulta sa obstetrician.

Sa pamamagitan ng transvaginal ultrasound, natuklasan ng kanyang doktor na siya ay makapal na lining ng endometrium na nagiging sanhi ng mabigat na daloy ng regla. Napansin din ng kanyang doktor na hindi normal ang haba ng kanyang pagreregla kada buwan kaya nagpasya itong sumailalim si Geraldine sa D&C procedure. Matapos malaman sa procedure na mayroon siyang polyps, sunod na isinagawa ang biopsy. Mula rito, kanilang natuklasang si Geraldine ay may endometrial hyperplasia with atypia. Ito ay isang uri ng endometrial hyperplasia na nagiging sanhi ng mas mataas na tyansa ng pagkakaroon ng endometrial cancer.

Ayon sa isang pag-aaral noong 2013, ang endometrial cancer ay 2.7 na beses na maaaring mas maranasan ng mga kababaihang may PCOS. Ang matagal na pagkakalantad ng endometrium sa mahinang estrogen dulot ng anovulation ay isang pangunahing salik upang tumaas ang tyansa na mangyari ito.

Ano Ang Endometrial Hyperplasia? Stages At Gamutan

Ang pag-alam sa stage ng endometrial cancer ay nagaganap matapos ang diagnosis. Ito ay nangyayari matapos ulitin ang D&C. Sa pag-alam sa stage ng cancer, natutuklasan ang dami ng cancer sa katawan. Nakatutulong din ito upang matukoy ang kalubhaan ng sakit at kung ano ang pinakamainam na paraan upang magamot ito.

Tulad ng ibang mga uri ng cancer, ang stage ng endometrial cancer ay mula stage 1 hanggang stage 4. Sinusunod ng lahat ng medical practitioners ang parehong sistema ng FIGO (International Federation of Gynecology and Obstetrics) at American Joint Committee on Cancer TNM staging upang maisagawa ang proseso ng staging. Iniuuri ng parehong grupo ang cancer sa tatlong karaniwang salik:

Sa kaso ni Geraldine, ang cancer nasa stage 3 na. Kumalat na ang cancer cells sa labas ng uterus. Matapos ang staging, sumailalium siya sa iba’t ibang procedures tulad ng:

• Radical hysterectomy
• Chemotherapy
• Pelvic radiation
• Brachytherapy

Inabot ng halos lima hanggang anim na buwan ng pagsasagawa ng chemotherapy (anim na sessions sa kada 21 araw) bago niya nagawa ang kasunod na course ng gamutan. Huli siyang sumailaim sa brachytherapy, na isang non-invasive outpatient procedure na nangangailangan ng tatlong sessions. Pakiramdam niya na ito ang pinakamalubha sa lahat ng mga gamutan. Subalit sa kabila nito, kakaunti lamang ang side effects nito. Matapos ang lahat ng gamutan at pagkalagas ng buhok, idineklara ng kanyang doktor na wala na siyang cancer noong huling bahagi ng Oktubre 2021.

Panoorin ang buong interbyu ni Geraldine Gayoso Carlos dito.

At matuto tungkol sa Pandaigdigang Araw ng Cancer dito.