Paninilaw Ng Balat, Anu-Ano Ang Posibleng Dahilan? Alamin Dito

Ang paninilaw ng balat at mga mata ay sobrang kinababahala ng maraming tao, dahil maaari itong maging indikasyon ng problema sa atay. Bukod pa rito, pwede ka ring makaranas ng panginginig ng kalamnan, lagnat, maitim na kulay ng ihi, pagsakit ng tiyan, at pagkakaroon ng maputlang kulay ng dumi sa oras na magkaroon ka ng problema sa’yong atay. 

Kaugnay ng mga nabanggit, makikita ang kahalagahan ng pagkakaroon ng kaalaman tungkol sa paninilaw ng balat at mata upang magkaroon ng ideya sa kung paano natin pwedeng harapin ang kondisyong ito.

Basahin mo ang artikulong ito para sa mga mahahalagang impormasyon tungkol sa paninilaw ng balat.

Bakit Naninilaw Ang Balat At Mga Mata?

Kilala rin bilang “jaundice” ang kondisyon kung saan nagkakaroon ng paninilaw ng balat at mata ang isang tao. Ayon rin sa iba’t ibang pag-aaral at artikulo pwedeng magkaroon ng paninilaw sa balat at mga mata ng tao kung naipunan ang katawan ng “bilirubin.” Ang bilirubin ay isang type ng kulay dilaw na dumi na kinakailangang ilabas ng ating katawan sa pamamagitan ng pagdumi o pag-ihi. Kaya naman sa oras na ang ating atay ay may problema, pwedeng hindi makalabas sa katawan natin ang bilirubin. Sapagkat kinakailangan na maiproseso muna ng ating atay ang bilirubin bago ito mailabas ng ating katawan.

Sinu-Sino Ang Mga Posibleng Magkaroon Ng Paninilaw?

Pwedeng maapektuhan ng paninilaw ng balat at mata ang mga matatanda at bagong panganak na sanggol. Subalit, kadalasang normal lamang ito sa mga sanggol dahil naninibago pa ang kanilang atay. Kapag hindi naman malubha ang paninilaw ng baby (infant jaundice), pwedeng bumalik nang kusa ang normal na kulay ng balat ng bata pagkatapos ng 1-2 linggo.

Gayunpaman, sa kaso ng matatanda, ang paninilaw ng kanilang balat ay madalas na palatandaan ng iba pang mga nakababahalang kondisyon o problema sa atay.

Paano Nagagamot Ito?

Ang paraan ng paggamot sa paninilaw ng balat at mga mata ay iba-iba. Ito ay nakadepende sa kung sino ang tinamaan ng jaundice. Halimbawa, kung ang naapektuhan ng paninilaw ng balat ay isang sanggol kailangan na dalasan ng ina ang pagpapasuso at pagpapaaraw sa bata tuwing umaga.

Pwede ring isailalim ang sanggol sa mga sumusunod na paraan kung ito ay irerekomenda ng inyong doktor:

• Phototherapy
• Intravenous immunoglobulin
• Exchange blood transfusion

Kapag naman matatanda ang nagkaroon ng jaundice, kinakailangan na gamutin ang mga kondisyon at problema sa atay para mawala ang paninilaw na nararanasan.

Mga Uri Ng Paninilaw Sa Balat At Mata

• Pre-hepatic jaundice — Mayroong mataas na dami ng bilirubin sa blood vessels o daluyan ng dugo ng tao. Hindi kinakaya ng atay ng tao na iproseso ang lahat ng dami ng bilirubin sa katawan.
• Hepatocellular jaundice — Ito naman ang mismong pagkakaroon ng problema sa mismong atay. Sinasabi na pwede kang magkaroon ng problema sa’yong atay kung ito ay nagtataglay ng mga sugat. Hindi magagawang gampanan ng atay ang responsibilidad nito na iproseso at ilabas sa katawan ang bilirubin.
• Obstructive jaundice — Sa type na ito, nagkakaroon ng pagbabara sa mga bile duct ng ating atay na sanhi para maipon ang bilirubin sa katawan ng tao at hindi mailabas bilang mga dumi. 

Mga Dahilan Ng Paninilaw Ng Iyong Balat At Mata

Narito ang mga posibleng dahilan ng jaundice:

Para sa mga bagong silang na sanggol:

• Pagkakaroon ng magkaibang blood type ng mag-ina
• Naninibago ang atay ng sanggol
• Isinilang ang sanggol na kulang sa buwan
• Hindi napapasuso gaano ang baby
• Pagkakaroon ng sanggol ng urinary tract infection o UTI

Para sa pre-hepatic jaundice:

• Kinagat o nakagat ng lamok at nagkaroon ng malaria
• Pagkakaroon ng sakit sa dugo tulad ng thalassemia at sickle cell disease

Para sa hepatocellular jaundice:

• Pagkawasak o sira ng atay dahil sa sobrang pag-inom ng alak
• Pagkakaroon ng pagsusugat ng atay o liver cirrhosis
• Naapektuhan ang isang tao ng mga hepatic virus

Para sa obstructive jaundice:

• Pagkakaroon ng mga tumor
• Pagkakasakit ng kanser sa lapay, apdo, atay, at iba pang mga malapit o karatig-bahagi ng atay ng tao

Mga Sintomas Ng Jaundice

Hindi lamang paninilaw ng balat at mata ang indikasyon ng jaundice, dahil marami pang mga sintomas ang jaundice na pwedeng ipakita. Narito ang mga sumusunod:

May mga pagkakataon na pwedeng hindi maranasan ng pasyente ang lahat ng mga nabanggit na sintomas. Gayunpaman, dapat mong tandaan na sa oras na makita mo ang paninilaw sa’yong balat o sa ibang tao, huwag mag-atubili na magpakonsulta agad sa doktor dahil maaaring indikasyon ito ng jaundice.

Komplikasyon 

Narito ang listahan ng mga komplikasyon na pwedeng maranasan sa jaundice:

• Kernicterus
• Brain encephalopathy
• Insomnia dahil sa matinding pangangati
• Pagkakaroon ng pinsala sa utak
• Hindi mapigilang pagdurugo

Paano Maiiwasan Ito?

Para sa mga sanggol:

• Pagsasagawa ng blood test na pwedeng irekomenda ng doktor
• Tiyakin na magkakaroon ka ng malusog na pagbubuntis
• Dalasan ang pagpapasuso sa sanggol
• Paarawan ang anak sa umaga

Para sa mga matatanda:

• Magkaroon ng healthy lifestyle at diet
• Pag-eehersisyo
• Pag-inom ng tamang dosage ng gamot upang hindi masira ang atay

Matuto pa tungkol sa Iba Pang Isyu sa Digestive Health dito.