home

What are your concerns?

close
Inaccurate
Hard to understand
Other

Share


Or copy link

New

Constipation Symptoms: Paano Mo Malalaman Kung Chronic Constipation Ito?

Constipation Symptoms: Paano Mo Malalaman Kung Chronic Constipation Ito?

Maraming bagay ang maaring maging sanhi ng constipation. Halimbawa, ang kakulangan sa tubig at fiber ay posibleng magdulot ng constipation. Ngunit paano kung ilang linggo nang ganito ang iyong problema? Anu-ano nga ba ang chronic constipation symptoms at paano ito maaaring gamutin sa bahay?

Ano ang Chronic Constipation?

Bago natin alamin ang chronic constipation signs at symptoms, atin munang alamin kung ano nga ba ang kondisyong ito.

Ang constipation ay tinatawag na chronic kung ilang buwan ka nang nahihirapang dumumi.

Posible rin na regular ang iyong pagdumi, pero parang bitin o hindi pa tapos ang iyong pagdumi. Ayon sa mga reports, ang pagkakaroon rin ng ganitong pakiramdam ay senyales ng pagkakaroon ng chronic constipation.

signs and symptoms of chronic constipation

Chronic Constipation Symptoms

Tingin mo ba ay mayroon kang chronic constipation? Syempre, ang pinakamainam na paraan upang malaman ay magpakonsulta sa doktor.

Kapag ikaw ay nagpakonsulta, tatanungin ka ng doktor tungkol sa iyong bowel movement. Kaya mabuti kung malaman mo ang mga chronic constipation symptoms na sumusunod:

Minsanan at Mahirap na Pagdumi

Upang malaman mo kung ikaw ay may chronic constipation, dapat alamin mo kung gaano ka dalas ka dumudumi.

Kung nakakaranas ka ng mas kaunti sa 3 pagdumi sa isang linggo, sa loob ng 3 buwan, posible itong chronic constipation.

Palaging Umiire Para Dumumi

Sinasabi nila na kapag nahihirapan kang dumumi ay mayroon kang constipation. Pero ano nga ba ang ibig sabihin ng “mahirap” dito?

Ayon sa mga eksperto, ito ay kung kinakailangan mong umire, o kaya mag-“push” palagi kapag ikaw ay dumudumi.

Matigas ang Iyong Dumi

Ang normal, healthy na dumi ay mayroong hugis na parang “sausage o snake-shaped”. Sintaba ito ng saging, at smooth dapat ang texture nito.

Isa pa ay hindi dapat ito nadudurog kapag nag-flush ka. Ibig sabihin nito ay mayroon itong sapat na tubig.

Kapag mayroon kang chronic constipation, ang iyong dumi ay “matigas” at posibleng maging alin sa mga sumusunod:

  • Mala-pebble na dumi. Ang ganitong uri ng dumi ay katulad ng sa kambing o kaya sa mga rabbit. Ayon sa mga doktor, maaaring maging masakit ang paglabas ng ganitong dumi dahil ibig sabihin nito ay matagal itong naipon sa iyong tiyan.
  • Bukol-bukol na dumi. Kung bukol-bukol ang iyong dumi na parang sausage, posible itong chronic constipation symptoms. Para rin itong pebbles, ngunit ang pinagkaiba ay hindi ito naghihiwa-hiwalay.
  • May cracks ang dumi. Posibleng mukhang buo ang iyong dumi, ngunit mayroon itong mga crack. Halos katulad rin ito ng dumi ng malusog na tao, pero ang pinagkaiba ay may mapapansin ka ritong mga cracks. Ang ibig sabihin nito ay mayroon kang constipation na posibleng dulot ng iyong lifestyle o ng iyong kinakain.

Pakiramdam na Hindi Tapos ang Pagdumi

Bukod sa bihirang pagdumi, at sa pag-alam ng hugis nito, isa pang sintomas ng chronic constipation ay ang pakiramdam na parang hindi ka pa rin tapos dumumi.

Ibig sabihin nito ay kakatapos mo lang magbanyo, pero nararamdaman mo na “mayroon pa rin” at tila gusto mo pa ulit dumumi.

Iba Pang Chronic Constipation Symptoms

Kung mayroon kang chronic constipation, ito ang ibang posibleng maging sintomas:

  • Pakiramdam na mayroong nakabara sa iyong puwit. Posible itong maging epekto ng fecal impaction, kung saan nakabara ang dumi sa iyong rectum.
  • Cramps at pananakit ng tiyan.
  • Pagiging bloated o kaya nasusuka.

Kailan Dapat Magpatingin?

Pagdating sa pagpapatingin sa doktor, hindi mo kinakailangan maranasan ang lahat ng mga sintomas na nakalista sa taas. Kung sa tingin mo ay mayroon kang chronic constipation, mainam na bumisita na agad sa iyong doktor.

Mahalaga rin magpatingin sa doktor kung ikaw ay nakakaranas ng pananakit ng tiyan, bloating, o kaya biglaang pagbabago ng iyong bowel habits. Heto pa ang ilang sintomas na dapat mong alamin:

signs and symptoms of chronic constipation

Paano Malulunasan ang Chronic Constipation sa Bahay?

Kung gusto mong lunasan ang chronic constipation sa bahay, heto ang ilang bagay na puwede mong gawin:

  • Pag-inom ng maraming tubig. Ang golden rule sa tubig ay pag-inom ng 8-10 baso araw araw. Pero kung matindi ang iyong constipation ay dapat mong dagdagan ang iniinom na tubig.
  • Pagdagdag ng fiber sa iyong diet. Ang pinakamainam na source ng fiber ay ang mga prutas at gulay. Ngunit maaari ka rin magdagdag ng nuts, beans, at oats sa iyong diet.
  • Pag-ehersisyo. Ang hindi pag-ehersisyo ay posibleng maging sanhi ng constipation. Ayon sa mga eksperto, hindi mo kinakailangan maging atleta para malunasan ang constipation. Kahit ang mga simpleng exercise tulad ng walking, jogging, at cycling ay makakatulong upang malunasan ang chronic constipation.
  • Pagtigil sa paninigarilyo. Ang paninigarilyo ay maaaring makadagdag sa risk ng constipation.

Mahahalagang Kaalaman

Paulit-ulit na sinasabi ng mga eksperto na wala naman talagang “real normal” pagdating sa bowel habits. Ito ay dahil maraming mga factors tulad ng edad, kasarian, mga kondisyon, at kung nagbubuntis ba, na maaaring makaapekto dito.

Basta’t dumudumi ka ng higit sa tatlong beses isang linggo, at hindi ka naman nahihirapan dito, wala ka dapat ipag-alala.

Ngunit kung mayroon kang pag-aalinlangan, o kaya sa tingin mo mayroon kang chronic constipation, huwag mag dalawang-isip na magpakonsulta sa iyong doktor.

Learn more about Constipation here.

Hello Health Group does not provide medical advice, diagnosis or treatment.

Sources

Chronic Constipation, http://uclacns.org/patients/disease-information/chronic-constipation/, Accessed September 12, 2020

Constipation, https://www.nhsinform.scot/illnesses-and-conditions/stomach-liver-and-gastrointestinal-tract/constipation, Accessed September 12, 2020

Constipation, https://my.clevelandclinic.org/health/diseases/4059-constipation, Accessed September 12, 2020

Constipation, https://www.mayoclinic.org/diseases-conditions/constipation/symptoms-causes/syc-20354253, Accessed September 12, 2020

When is constipation an emergency? https://www.emsuklearning.co.uk/when-is-constipation-an-emergency/, Accessed September 12, 2020

What Does the Color and Consistency of Your Poop Say About You? (Infographic), https://www.unitypoint.org/livewell/article.aspx?id=d7a92af5-f39d-46fa-81ef-a17dce49788f. Accessed September 12, 2020

Picture of the authorbadge
Written by Lorraine Bunag, R.N. Updated Oct 25
Medically reviewed by Elfred Landas, M.D.